Yeremiya 51 - Mawu a Mulluku

Ovirellella ollakiwa wa Babiloni

¹ Apwiya enallota wi, “Kineerorumiha ephevo yawi emoononge Babiloni ni athu a mwiillaponimmo.

² Kineerewaarumiha alleto o Babiloni wi emuveethe ni oshellellaatu ddittheddene ddookhalla mu ellapwaaye. Alliwa eneeromuwukila ovenyera o embali ddittheddene va nllapo nawoopihanno.

³ Amiira ahikoke miira ddaye, ahiware yoowaraaye yakhoto. Asombwaaye muhaahiyevo naari mmodda navettho akhotwaaye attheene muwoononge.

⁴ Aneerophoriihiwa ni okhwella virive veko m'misewuni dda m'mizindani ddiwa.

⁵ Israele ni Yuda kheyaahiyiwe ni Mullukwiiwa, Apwiya Amasiva Mattheene naari ellapwiiwa eddanlle ni machimo oomuvevulla Aweella a Israele.

⁶ Arive muthu mwa nyuwaano athawe, avenyewo o Babiloni wi avulluse okumaaye. Muhiiphiwena nimodda aallakiwaka. Nna sika nllapo nno Apwiya enaallakiiwa ni waahokollosella ddoonanara wunchichi.

⁷ Vawi Babiloni aari wonanko kapu agolide m'mattani mwa Apwiya wi alezelihe ellapo yavatthi ettheene. Mitundu ddinchichi dda athu ddaamuwirya vinywaaye sika ekaambiiwa ddasavuwalliiwa.

⁸ Babiloni oomora moorurumusa nave ohoonongeya. Mwinllelleni, mwinnyeni murete apaalle ttuuchira.

⁹ Amodda yaallota wi, ‘Naheesa omwinnya murete koma khaachinre. Hankoni nimuhiye, nimvenyerevo nave arive muthu aye owaniwa. Vawi mullatwaaye woowella oddullu, woophiya omiraponi.’ ”

¹⁰ Vano Apwiya ahooniha vaweella echilungamwaahu. Hankoni nillalleye o Ziyoni nnddo Apwiya Mullukwaahu, eneerelliiwa.

¹¹ “Tthokollani mipaamba, kusani ezishango. Apwiya aanyanyulla mirima dda mamwene a Amedi vawi yoopaalliiwa tti yawi emoononge Babiloni. Enapaalla emuhokolloselle yoonanara kaambiiwa ahoononga enyumbiiwa.

¹² Imesani embendera nave moononge mipanda dda Babiloni. Mwaallipihe ooteteza, mwaahiyevo alonda nave mukhozekelle waatthollosa.” Apwiya aaganizera nave eneereweera nnddo yallotilliiwa dda athu a o Babiloni.

¹³ Nyu mookhalla ni mihinje ddinchichi nave mookhalla ni eyuuma koma enthawi yohuumallellani, okumaanyu woomalla.

¹⁴ Apwiya Amasiva Mattheene yaallupella va weekhiiwa wi, “Kineerewaaruma athu ooheerengeya wonanko nazombe wi yuuhelleni ekhoto nave eneerokhuwa moopambana.”

Nchipo nawaathokoza Apwiya

¹⁵ Apwiya sika yaphatusalle ellapo yavatthi ni masiviiwa, yaapanga ddittheddene ni ezeru ddiwa, mweeruso yahaanddellella eddullu.

¹⁶ Apwiya yallota, onniiweya onyakulla wa maaddi ooddullu, ennawiiha mirapo ovenyera okomenlle ellapo yavatthi. Ennasherimiha ettari dda murimu, ennoopiha ephevo ovenyera nko enayisungiiwa.

¹⁷ Athu attheene tti ookarangeya, khenna ezeru, arive muthu eeruso annawulliwa muru ni mafanwaaye. Mafano ayo aapangilleeye tti awoottha, mwa alliwa khamuri okumi naari vang'ono.

¹⁸ Mafano khenna mutteko, tti oophwanella waavevulla, voollakiwani eneerewoonongiwa.

¹⁹ Koma Mulluku a Yakobo khari wonanko mafanwaalla, olliye sika oophatusa a ddittheddene. Israele tti mutundu wa yoohallanaaye, nnddina niwa tti Apwiya Amasiva Mattheene. Apwiya enallota wi,

Hamala a Apwiya

²⁰ We Babiloni tti hamalaaka, echidaaka yakhoto. Ni weyaano kinnaphwinya mitundu dda athu, kinnawoononga mamwene.

²¹ Ni weyaano kinnaaphwinyaphwinya akavalo ni oowellavwiiwa. Ni weyaano kinnaaphwinyaphwinya magareta ni aweetihiiwa.

²² Ni weyaano kinnaaphwinyaphwinya allopwana ni atthiyana. Ni weyaano kinnaaphwinyaphwinya awuulluvalla ni asombwe.

²³ Ni weyaano kinnaaphwinyaphwinya abusa ni eziweto ddiwa. Ni weyaano kinnaaphwinyaphwinya oollima ni eng'ombe ddiwa ddoollima. Ni weyaano kinnaaphwinyaphwinya enduna ni oohoollella ekhoto.

Ollakiwa wa Babiloni

²⁴ Apwiya enallota wi, “Nyu moonaka, kineeromuhokollosella ddoonanara Babiloni ni attheene ookhallamo ekaamba ya machimo mattheene eerilleeye o Ziyoni. Mi Apwiya koollota.”

²⁵ We mwaango wawoononga, we ootthollosa ellapo yavatthi ettheene, kinawiipa mullatu. Kineerottaphurusa nnatta voopalla wuullaka ni wuukakhella vatthi ovenyera o mallukwaawo nave kineerewuutthattusa mwaango woosha. Mi Apwiya koollota.

²⁶ Khaniivo nlluku nawo naari nimodda ninaapharihiwe mutteko monga nlluku noopaalleyesesa vawi onaakhalle wonanko echipululu wa enthawi yoohimalla. Mi Apwiya koollota.

²⁷ “Imesani embendera veellaponi nave opani nipallapata wi mitundu dda athu ddiwe. Ithanani mitundu dda athu ddittheddene wi ddimuhelle ekhoto Babiloni. Ithananittho moomwene a o Ararati, a o Mini ni o a o Ashikenazi. Mutthoolleni oohoollella ekhoto wi awane ni Babiloni. Muweena akavalo anchichi wonanko nazombe.

²⁸ Tthukumanihani mitundu dda athu wi emuhelle ekhoto nave muwiithane mamwene o Medi, enduna ddiwa, oolamulelliiwa ni akhoto a ellapo ddittheddene anaalamulelleeye.

²⁹ Ellapo yavatthi enimatthukumella, enimanyiphireya ekaamba ya ovoreya vawi Apwiya enakwakhwanihella nnddo Apwiya yaganizalliiwa ddoomutthattusa Babiloni echipululu, ellapo yoohikhalla ni athu.

³⁰ Akhoto a o Babiloni aahiya owana ekhoto, erimoonokeraatthi mu mipanda ddiwa vawi masiviiwa aamalla nave tti wonanko atthiyana. Enyumba ddaye ddohoosiwa ni munllo nave mikoko ddaaye ddoollipiha ddookothowa.

³¹ Amithenga ennarumihiwa moothwarana wi yamulleelle mwene a o Babiloni dda waakhiwa wa embali ddittheddene dda muzindaaye.

³² Moollapuwella mutthemwene mohaakhiwa, mapuro awiipitthawo alonda aahelliwa munllo nave akhotwaaye attheene ahaapheella miru.

³³ Babiloni ari wonanko voomuuputhella tirigu va enthawi yoomuuputha. Nave naanweene vaava enthawi yoohata eneerophiya. Mi Apwiya Amasiva Mattheene, Mulluku a Israele, koollota.”

³⁴ Nebukadinezara mwene a o Babiloni oonoononga, oonipwesa ni onitathilla wonanko epalli yoohikhalla ni mutteko. Oonimirya wonanko ekonya, oovona ddoocha ddahu ddooddiva, vatulli viwa oonirapheya.

³⁵ Athu a o Ziyoni ellote wi, “Ekuku Ababiloni yaneerelliiwa ni aniihu yaahokollweelle!” Athu ookhalla o Yerusalemu ellote wi, “Nikhame nahu nno natathilleye naamorelle Ababiloni monga ollakiwa wiwa.”

Apwiya eneerewaakavihera Aisraele

³⁶ Nave Apwiya yaallota wi, “Kineerowiimellellani va mullatwaanyu nave kineerewaahokollosella ddoonanara adanaanyu. Kineerewummiha maaddi a o Babiloni, aneetuutwaaye attheene eneerowelleella.

³⁷ Sika Babiloni aneerotthattuwa ntepe, nipuro na akhuddupa, nipuro nawoopiha ni nipuro noosoonyiha, noohikhalliwa ni arive muthu.

³⁸ Ababiloni eneerothuruma wonanko mukango nave eneerewinlla wonanko anamwani a mukango.

³⁹ Yakuserera ottutthuwa, kineeroweerella machellello. Sika kineerowaalezeliha nave eneerohakallalla ni okona ekhove ddoohirurumuwana, ddoohivenyanattho.

⁴⁰ Kineerowaakusella wawiiphiwa wonanko anamwani a enkhosa, anankhoro a enkhosa apaalle a epuri. Mi Apwiya koollota.”

Otulli wa Babiloni

⁴¹ Ddawoona, Babiloni oogonjihiwa, muzinda oyo ellapo yavatthi ettheene yawukotelliiwa wohaakhiwa. Babiloni ootthattuwa ello yawoopiha wa mitundu dda athu!

⁴² Enyanja yooddalla ophiyera yommirya Babiloni, ookhuneelliwa ni mafunde oonyakulla.

⁴³ Mizinda ddaye ddootthattuwa matepe, ellapo yawumma ni yeechipululu, ellapo yoohikhalla ni athu apaalle weetamo arive muthu.

⁴⁴ Kineeromullaka Beli, mulluku a Ababiloni, kineeromurapheyiha nnddo amiryalleeye. Mitundu dda athu kheddiwa ddiyattho wa olliye. “Mipanda dda Babiloni ddoomora!

⁴⁵ Nyu athwaaka, khumanimoni mu Babiloni! Vullusani okumaanyu o osha murima wawoopiha wa Apwiya!

⁴⁶ Muhitathille murima nave muhoove epilli eyo evuwalle mwiillaponi. Orive muyakha onniiweya epilli yakhoto va ellapo yavatthi navettho ddawi mwene awi yoori animawana ni mukhwaaye.

⁴⁷ Vano enthawi enimawa mvo kinaallakeemi mafano a Babiloni. Ellapo ettheene eneerowulliwa muru nave athwaaye attheene eneerewiiphiwa.

⁴⁸ Vatulli viwa oddullu ni ellapo yavatthi vamodda ni ddittheddene ddookhalla mwemmo ddineerewiipa moohakallalla ekaamba ya omora wa Babiloni. Athu awoononga oovenyera ompoto eneeromugonjiha.

⁴⁹ Babiloni anaphwanella omora ekaamba ya ayo yiiphiwe o Israele wonanko mmo yamorelle athu a va ellapo yavatthi ettheene ayo yiiphiwe ni olliye. Mi Apwiya koollota.”

Othenga wa Apwiya wooya wa Aisraele a o Babiloni

⁵⁰ Apwiya enallota ni athwiiwa a o Babiloni wi, “Nyu muvulluwalle o nsupada na Babiloni, muvenyevo, muhiselliwe! Muwuupuwelle Apwiya ni Yerusalemu naari murekamenlle ni owaninyu.

⁵¹ Nyu munallota wi, ‘Ninawulliwa muru ekaamba ya ovevulliwa nko nikumanneehuna. Ekhove ddahu ddoomora ekaamba ya athu eelleto yoovollowa o mapuro oopatuleya o enyumba ya Apwiya.’

⁵² Koma mi kinallota wi, ‘Enthawi enimawa mvo kinaallakeemi mafano a o Babiloni nave wiipullella wa athu oohomiwa oneerewiiweya mu ellapwaaye ettheene.

⁵³ Naari Babiloni iitukhulleve ophiyera oddullu, allipiha mattatthaaye, kineeromuruma awoononga wi amugonjihe. Mi Apwiya koollota.’ ”

Ovirellella woonongeya wa Babiloni

⁵⁴ Apwiya enallota wi, “Ngiiwani winlla ovenyera o Babiloni, onyakulla wa woonongeya wuullupalli wa ellapo ya Ababiloni.

⁵⁵ Ddawoona, Apwiya enamoononga Babiloni, eneeronimalliha ntapha naye nuullupalli. Okhuwa wa athwaaye onniiweya wonanko mafunde oonyakulla, ntapha nno ninnonjerereyanjerereya.

⁵⁶ Awoononga aamukhumellella Babiloni, akhotwaaye attheene aaphariwa, miira ddiwa ddookothowa. Vallethi Apwiya tti Mulluku oohokollosella, eneerewaahokollosella ddoonanara Ababiloni.

⁵⁷ Kineerolezeliha enduna ddaye ni eezerwaaye, oolamulellaaye, oohoollella ekhoto ni akhotwaaye. Eneerokona ekhove ddoonanara ddoohirurumuwana, mi, mwene, koollota, nnddina naka tti Apwiya Amasiva Mattheene.

⁵⁸ Esiri dduullupalli dda Babiloni ddineeropwaramwasiwa, millako ddaye ddoorekama ddineerewoosiwa. Mitundu dda athu ddapharelle mutteko nivuddo, athu yaarimoona wiitopiha voomakani, vano ddinasha ni munllo.”

Yeremiya anarumiha othenga o Babiloni

⁵⁹ Mwene Zedekiya aakhalla ni mulangizi muullupalli nnddina naye Seraya mwaana a Neriya, edduullu ya Maaseiya. Va muyakha waneesese wa omwene wa Zedekiya a o Yuda, Seraya aathaana ni mwene oya o Babiloni. Sika namallotella Yeremiya aamwinnyera othenga.

⁶⁰ Yeremiya aalemba mu nibukhu dda woonongeya nko onaamooneyelle Babiloni ni ddimodda ddittheddene.

⁶¹ Yeremiya aamulleella Seraya wi, “Waphiya o Babiloni, ohilephele weerenga mawu mattheenaalla vamiitthoni va athu.

⁶² Vatulli viwa wavekelle wi, ‘Nyu Apwiya moollalleya yoolingaanyu yoopaalla woononga nipuronna, oohihiyavo ello, muthu apaalle enama. Nave enaakhalle echipululu wa enthawi yoohimalla.’

⁶³ Wamalliha weerenga nibukhunno, wanimakellelle onllukuni nave onivokhelle mu muhinje wa Yufurate.

⁶⁴ Nave wallote wi, ‘Mmu sika Babiloni aneereeye apwinelle. Khawa avenyattho ekaamba ya ddawoopiha ddittheddene kinammorihelleemi.’ ” Mawu a Yeremiya emallelle vaava.