Yeremiya 50 - Mawu a Mulluku

Omora wa Babiloni

¹ Alla tti mawu a Apwiya oollota dda Babiloni ni athwaaye oyeella mwa namallotella Yeremiya wi,

² Vuwiha ni ollalleya wa athu a mitundu ddittheddene. Imesa embendera! Ohivitthe erive ello! Babiloni oogonja! Mullukwaaye Beli oowullihiwa muru, Merodaki ootathilla murima. Mafano a Babiloni aawullihiwa muru wunchichi, milluku ddaye ddootathilla murima.

³ “Mutundu wa athu oompoto woowuhella ekhoto muzinda wa Babiloni. Ellapwaaye eneeroyitthattusa ntepe nave wenko khowa okhalla muthu apaalle enama.”

Ohokollowa wa Israele

⁴ Apwiya enallota wi, “Mallapo yaayo, enthawi yeeyo Aisraele ni Ayuda eneerotthukumana vamodda, eneeroowa yinllaka. Eneerewaashaasha ddoopaalla dda Apwiya Mullukwiiwa.

⁵ Eneerokohera dda ettilla ya o Ziyoni nave eneerowaamba olendo woohokollweella wenko. Nave eneerewiipataaniha wa Apwiya mwa a echipangano ya wa enthawi yoohimalla, yoohitiwalleya.

⁶ “Athwaaka tti wonanko enkhosa ddoohollowa. Abusiiwa yahaavirikaniha ni waahollosa omiyaangoni. Yeeta shisha o asimiyaango ni omiyaangoni ophiyera yaatiwalla owaniwa.

⁷ Arive muthu aaphwanyille aawoononga. Nave adaniiwa yaanallota wi, ‘Hi kheninna mullatu ekaamba yawi alliwaalla yahaachimwella Apwiya ayo eri vookhalla viwa vawoona, ayottho makhollwiiwa yaaroromelliiwa.’

⁸ “Muthawe o Babiloninko, muvenyewo o ellapo yeeyo, mwaambe okhumawo nyuwaano wonanko anankhoro vahoollo va eziweto.

⁹ Kineerotthoolla ni owaana mutundu wakhoto wamasiva wa malloko mamodda a athu oovenyera ompoto wi niwane ni Babiloni. Mipaamba ddiwa ddiri wonanko akhoto oosha murima, kheddinakusha.

¹⁰ Ababiloni eneerewaakhiwa ddayiwa nave attheene oowaakha eneerovona. Mi Apwiya koollota.”

Omora wa Babiloni

¹¹ “Nyu Ababiloni, mwahoononga yoohallanaaka. Naari mweelliweve murima, muhakallalleve, mulluphellupheve wonanko musaanaang'ombe oomuuputha tirigu apaalle mwinlleve mwawiitukhulla wonanko akavalo,

¹² muzindaanyu oneerowullihiwa muru wunchichi. Muzinda oyo tti wonanko amowaanyu oneeronyaambusiwa. Ddawoona, Ababiloni enaakhalle oomallihella mwa mitundu ddittheddene dda athu. Mizinda ddiwa ddinaakhalle wonanko nihaka apaalle ellapo yawumma yeechipululu.

¹³ Khokhalla athu ekaamba ya osha murima wa Apwiya nave onaakhalle matepeve. Arive muthu oovira o Babiloni eneerottikhina ni woopa musoonyo ekaamba ya makhwata a muzindooyo.

¹⁴ “Nyu ookoka miira, khozekani wi mumwaapheelle Babiloni embali ddittheddene. Vokhani mipaamba ddanyu ddittheddene kaambiiwa ahaachimwella Apwiya.

¹⁵ Mukhuwelleni virive veko vawi oogonja nave mattatthaaye aamora, mipanda ddayettho ddohoonongeya. Nngu sika ohokollosella wa Apwiya. Sika muhokolloselleni ddoonanara moollikana ni mmo aweerelleeye amodda.

¹⁶ Mumwiikarewo arive oomidda mmiddo o Babiloninko navettho arive oomuphadda tirigu ni echikwakwaaye voohatani. Vawoovani nsupada na owaahoosa, arive mulleto aneerorukunuwella wa athwaaye ni othawella owaniwa.”

Ohokollowa wa Israele

¹⁷ Aisraele tti wonanko enkhosa ddoopallalleya, ddawiikarihiwa ni mikango. Mwene o Asiriya sika aambille owiipha Aisraelaayo, vatulli viwa aaphiya Nebukadinezara mwene a o Babiloni oyo aattakhunne ni makhuveene.

¹⁸ Sika ekaambiiwa Apwiya Amasiva Mattheene, Mulluku a Israele, enallotiiwa wi, “Kineeromullaka mwene a o Babiloni ni ellapwaaye wonanko mmo kamullakelleemi mwene a o Asiriya.

¹⁹ Kineeromuhokollosella Israele obusani waye nave anaachelleke o Karimele ni o Bashani. Aneerekovona o miyaango dda o Efuremu ni o Giliyadi.

²⁰ Mallapo yaayo, enthawi yeeyo yaphiya, eneerewaashaasha ddoonanara dda Israele koma khephwanyeya naari emodda. Eneerewaashaasa machimo a Yuda koma kheyaaphwanya naari vang'ono. Vawi oohalla kaahiyalleemaalle kineerewaakhululukella. Mi Apwiya koollota.”

Apwiya enamweeruza Babiloni

²¹ Apwiya enallota wi, “Muyihelle ekhoto ellapo ya Merataimu ni athu ookhalla o Pekodi. Muwiiphe ni nsupada nave mwaatthollose. Mweere ddittheddene nnddo kuulamulalleemini. Mi Apwiya koollota.

²² Okhuwa weekhoto onniiweya navettho vookhalla woononga wuullupalli.

²³ Ngoonani mmo aphwinyeyelle olle aari wonanko hamala a ellapo yavatthi. Ngoonani mmo Babiloni atthattuwelleeye ello yawoopopiha va mitundu dda athu.

²⁴ We Babiloni, kohuureya musampha nave woomakiwa koma khonadduwella. Woophwanyeya nave woophariwa ekaamba yawi waallipana ni Apwiya.

²⁵ Apwiya aahulla enyumba ya ezida ddiwa nave aakhumiha ezida dda osha murima wiwa. Vawi mi Apwiya Mulluku Amasiva Mattheene kinapaalla kiphare mutteko mu ellapo ya Ababiloni.

²⁶ Muwane ni Babiloni ovenyera o embali ddittheddene nave muhulle ekhokwe ddaye. Athwaaye muwuukellelle wonanko mapwiddi a tirigu nave mwaatthollose wi vihikhalle naari mmodda oovulluwa.

²⁷ Muwiiphe ni waatthollosa asombwe akhoto attheene. Otulli wohaamorella vawi nllapo nawi ellakiwe noophiya.”

²⁸ Kinnawiiwa athu oothawa ekhoto ya o Babiloni ellalleyaka dda ohokollosella ddoonanara wa Apwiya Mullukwaahu ekaamba yahoononga enyumbiiwa.

²⁹ “Muwiithane attheene oovokha miira, oodduwella ovokha mipaamba wi emuhelle ekhoto Babiloni. Mumwaapheelle ni misasa ddakhoto wi vihithawe naari muthu mmodda. Mullakeni moollikana ni machimwaaye nave mumweerelle ddoollikana ni nnddo aweerenlleeye amodda vawi ahaavevulla Apwiya, Aweella a Israele.

³⁰ Sika asombwaaye eneerewiiphelliwa m'mapuroni mwaye nave akhotwaaye attheene eneerewoonongeya nllapo nenno. Mi Apwiya koollota.”

³¹ Apwiya Mulluku Amasiva Mattheene enallota wi, “We Babiloni, kineerewuuhella ekhoto ekaamba yawi onnitukhulla vawi enthawaawo yookwakhwana, noophiya nllapo nawo na ollakiwa.

³² We ellapo yawiitukhulla, oneerokwakwatuwa ni wiikuha nave khaavo oyo anuuvenyihe. Mizinda ddawo kineeroddoosa ni munllo nave oneeroshellelliha ddittheddene ddawaatamana ni mizindannddo.”

³³ Apwiya Amasiva Mattheene enallota wi, “Athu a o Israele ni a o Yuda enimahoosiwa. Athu attheene ayo yaaphanre okaporo ahaapharesesa, khenapaalla waattaphulla.

³⁴ Koma oovullusiiwa tti amasiva, nnddina naye tti Apwiya Amasiva Mattheene. Aneerowiimellella vamullatuni wi awiihe murendelle va ellapo yavatthi ettheene koma aneerewaahoosa athu a o Babiloni.”

³⁵ Apwiya enallota wi, “Nsupada nakhoto nimmorelle Babiloni, okhwa ophiye va athu a o Babiloni, va enduna ddiwa ni athwiiwa eezeru.

³⁶ Nsupada nimorelle va athu awoombesa wi etthattuwe ookarangeya. Nimorellettho va akhotwaaye wi yoonongeye.

³⁷ Nsupada nimorelle va akavalwaaye ni va magaretaaye, nimorellettho va milloko dda akhoto eelleto wi ekhalleke wonanko atthiyana. Nsupada nimorelle va eyuumaaye ettheene wi yaakhiwe.

³⁸ Nndduwa nummihe maaddaaye wi mihinje ddiwelleelle. Valle Babiloni tti ellapo yamafano, athwaaye aakarangeyana mafanwaayo.

³⁹ “Sika o Babiloni enama ddamuhakani ddinaakhallelleke nimodda ni akhuddupa ni enthiwatiwa. Vano wenko khowa okhalla athu wa enthawi yoohimalla naari muthu mmodda va mibado ddittheddene.

⁴⁰ Wonanko mmo woonongeyelle muzinda wa Sodomu ni wa Gomora ni mizi dda vakhuviru, emoddamoddave yeeyo khohalla naari muthu mmodda wenko. Khaavo naari mmodda anaaphwanyeye wenko.

⁴¹ Ngoonani, athu ovenyera o ellapo ya ompoto enimawa, mutundu wa athu amasiva wootimulla ovenyera woorekama.

⁴² Ekusalle miira ni mavaka, tti athu awumma murima, khenna echifundo. Enanyakulla wonanko enyanja, ewenlle va akavalwiiwa okhozekella owana ekhoto ni we Babiloni.

⁴³ Mwene a o Babiloni ohiiwa epilliiwa, masiva ammallella. Annakhupanya ni wiiwa ovoreya wonanko wa mutthiyana vooyarani.

⁴⁴ “Wonanko mukango wookhuma mu otthako dda o Yordani onoopopiheriiwa nikholla na enkhosa nooteteziwa phaama, moorurumusa kineerowiikarihella Ababiloni woorekamella ni owaniwa. Vatulli viwa kineerewaahiyera awaalamulella kinaampaalleemi mwaneenaaka. Ethiyo ttaani anaaphwanaphwane ni miyaano? Ethiyo ttaani anaawore okiipa mullatu miyaano? Ethiyo tti mbusa oovi anaawore ollipana ni miyaano?

⁴⁵ Sika vano apellani maaru nnddo kikeraatthihalleemi ddoomullakella Babiloni ni nnddo kinapaalleemi weera va Ababiloni. Ddawoona, aniiwa eneerophariwa nave athu attheene eneerotathilla murima ekaamba ya otulliiwa.

⁴⁶ Ellapo yavatthi eneerotthukumella ekaamba ya ogonja wiwa. Winlla wiwa oneerewiiweya o Enyanja Yoofiira.”