Yeremiya 49 - Mawu a Mulluku

Apwiya enamweeruza Amoni

¹ Apwiya enallota dda Amoni wi, “Ethiyo a Israele khenna anamwani aallopwana? Ethiyo khenna awaakhella yoohallana? Kaambiiwa tini vano athu oomullapella Milikomu yaakhilliiwa ellapo ya Gadi nave enakhalla m'mizindani ddaye?

² Koma enthawi enimawa mvo kineeriheemi okhuwa wa ekhoto o Raba, muzinda muullupalli wa Amoni. Muzinda yoolla oneerotthattuwa ntepe noohikhalla ni athu nave mizi ddiwa ddineerewoosiwa. Sika Israele aneerowaakha adani ayo yamwaakhille ddaaye.

³ Nyu athu a o Heshiboni, inllani vawi muzinda wa Ai wohoonongeya. Nyu anamwani aatthiyana o Raba, warani eziguduli vawoonihani ethakaraka, inllani, muthawelle nngu ni nngu muwari variyari va mipanda. Mullukwaanyu Milikomu aneerophariwa okaporo ni allupa mukuthwaaye ni enduna ddaye.

⁴ Nyu athu oohiroromelleya, kaambiiwa tini muniitukhullella tini ni matapwaanyu? Kaambiiwa tini mwaroromelleenyu eyuumaanyu voollotani wi khaavo anaallipane ni nyuwaano?

⁵ Apwiya Mulluku Amasiva Mattheene enallota wi, ‘Chenjerani vawi muneerewoona ddawoopiha ovenyera wa attheene oowaapheellani. Eneerowiikarihani attheenenyu oohikhallavo naari mmodda awuutthukumanihanittho oothawanyu.

⁶ Koma vatulli viwa kineerewaahokollosellattho murendelle Aamoni. Mi Apwiya koollota.’ ”

Ollakiwa wa Edomu

⁷ Apwiya Amasiva Mattheene enallota dda Edomu wi, “Ethiyo ezeru ddohaamallella athu a o Tema? Ethiyo athu eezeru olangiza wiwa woomalla? Ethiyo ezeru ddiwanndde ddooriirya?

⁸ Nyu athu a o Dedani hokollowani, thawani mwiipitthe! Vawi kineerollaka edduullu dda Esau va nllapo na weeruziwa wiwa.

⁹ Oohata mpesa yaawiilleke wa nyuwaano, yaweere wuuhiyerani mpesa va enthambi. Allupa wiiya yaphiyalleke mahiiyu, ddaano ekusallevo ddoopaalleyave.

¹⁰ Koma mi kohaakha eyuuma ettheene ya edduullu dda Esau. Kohooniha vaweella nipuro niwa nawiipitthavo, khennattho vawi ttuuwiipitthavo. Aniiwa, abaliiwa ni akhwiiweene yahoonongeya sika khaavo ahanllewo.

¹¹ Ahiyeni akhwaadduni wi kaallelle nave anaamukhwellaanyu enaakiroromelleke miyaano.

¹² “Naari ayo yahiphwanenlle omuwiryella kapu a ollaka, emuwiryelle. Muhiddoottotthe wi nyuwaano sika khemullakiwa. Khe ddiiddo, ddawoona muneerollakiwa nave muneeromuwiryella kapooyo.

¹³ Kinimallupella, muzinda wa Bozira oneerotthattuwa ello yawoopiha, yoottheyiwa, yoohikhalla ni mutteko ni yootembeleliwa. Nave mizi ddiwa ddittheddene ddinaakhalle matepe wa enthawi yoohimalla. Mi Apwiya koollota.”

¹⁴ Apwiya aakinnya othenga woollota dda Edomu wi, “Tthukumanani vamodda wi muwane ni Edomu, venyani wi mukhozekelle ekhoto!

¹⁵ Kineerewuuyeviha variyari va mitundu ddittheddene nave athu attheene eneerewuunyaambusa.

¹⁶ Wiitukhulla wawo wohuulleka, woopopiha wawo wohuuhollosa, we ookhalla m'mallukuni ni omiyaangoni. Koma naarive omakille enyumbaawo vaddullu wonanko emphuru ya echiwombankhanga kineerewuukitthiha. Mi Apwiya koollota.”

¹⁷ Apwiya yaallota wi, “Ellapo ya Edomu kineeroyitthattusa nipuro nawunkha ni nawoopiha musoonyo. Arive muthu ooviravo oneerekoriiryiwa mwiilli vawoonani woonongeya wiwa.

¹⁸ Wonanko mmo woonongeyelle muzinda wa Sodomu ni wa Gomora ni mizi dda vakhuviru, emoddamoddave yeeyo khohalla naari muthu mmodda wenko. Khaavo naari mmodda anaaphwanyeye wenko.

¹⁹ Wonanko mukango wookhuma mu otthako dda o Yordani onoopopiheriiwa nikholla na enkhosa nooteteziwa phaama, moorurumusa kineerowiikarihella Aedomu woorekamella ni owaniwa. Vatulli viwa kineerewaahiyera awaalamulella kinaampaalleemi mwaneenaaka. Ethiyo ttaani anaaphwanaphwane ni miyaano? Ethiyo ttaani anaawore okiipa mullatu miyaano? Ethiyo tti mbusa oovi anaawore ollipana ni miyaano?

²⁰ Sika vano apellani maaru nnddo kikeraatthihalleemi ddoomullakella Edomu ni athu a o Temani. Ddawoona, aniiwa eneerophariwa nave athu attheene eneerotathilla murima ekaamba ya otulliiwa.

²¹ Ellapo yavatthi eneerotthukumella ekaamba ya ogonja wiwa. Winlla wiwa oneerewiiweya o Enyanja Yoofiira.

²² Ngoonani, mutundu mmodda oneerovava ni omumorella Bozira wonanko mpungu ottaphurusalle muuphello. Nllapo nenno mirima dda akhoto a o Edomu ddineerotthukumella ni woova wonanko mutthiyana vooyarani.”

Apwiya enamweeruza Damasiko

²³ Apwiya Amasiva Mattheene enallota dda Damasiko wi, “Athu a o Hamati ni a o Aripadi yoopallallesiwa miru ekaamba yahiiwa othenga woonanara. Murimiiwa wooddalla ni woova, khenakeraattheya wonanko enyanja yoohikhurumuwa.

²⁴ Damasiko ootathilla murima, anapaalla othawa ekaamba yawi animoova wunchichi. Anniiwa ovoreya wonanko mutthiyana vooyarani.

²⁵ Muzinda woovuwoolle ni weehakallalloolle woohiyiwa!

²⁶ Sika ekaambiiwa asombwaaye eniikuhellekiiwa m'mathatoni mwaye nave akhotwaaye attheene eneerewoonongiwe nllapo nenno. Mi Apwiya Amasiva Mattheene koollota.

²⁷ Kineerohella munllo mipanda dda Damasiko nave oneeroshellelliha enyumba ddoollipa dda mwene Benihadadi.”

Ollakiwa wa Kedara ni Hazori

²⁸ Apwiya enallota dda Kedara ni dda mamwene a o Hazori ayo Nebukadinezara mwene a o Babiloni aagonjihalleeye wi, “Timullani mwaahelle ekhoto a o Kedara! Woonongeni athu a wookhuma nndduwa!

²⁹ Kumullani misasa ddiwa nave mwaakhe enkhosa ddiwa. Mwaakhe misasa ddiwa, ekuwo ddiwa, katundwiiwa muttheene, enkhosa ni ekamira* ddiwa. Athu eneerewaakhuwella alliwa wi, ‘Ddawoopiha ddiri virive veko!’

³⁰ “Nyu athu a o Hazori, thawani, akuvani nave ipitthani. Nebukadinezara, mwene a o Babiloni, ookhozeka wi awane ni nyuwaano.

³¹ ‘Timullani, mwawuhelle ekhoto mutundu wa athu oyo ori m'murendelleni, athu ayo eneesa wi eri vaphaama. Muzindiiwa khonna millako apaalle machiwi oowalliwa ni mikoko ddoollipa nave ori vaweekhiiwa.’

³² “Ekamira ddiwa ni eziweto ddiwa ddinchichi ddineerewaakhiwa. Kineerowiikarihella o ezigawo sese ddittheddene attheene oophaddera mphattamaaru. Kineerewaarumihella ddawoopiha ovenyera o ezigawo ddittheddene.

³³ Hazori aneerotthattuwa ntepe, nipuro na akhatwe wa enthawi yoohimalla. Khamuwamukhallattho arive muthu mwemmo. Mi Apwiya koollota.”

Ollakiwa wa Elamu

³⁴ Zedekiya, mwene a o Yuda, aambille wene olamulella, mawu a Apwiya yaawa Yeremiya dda Elamu wi,

³⁵ Apwiya Amasiva Mattheene enallota wi, “Ngoona, kineerewinttaka muura wa Elamu oyo ori echidaaye yamasiva.

³⁶ Kineerorumiha ephevo ddisese va athu a o Elamu ovenyera o ezigawo ddittheddene ddamuddullu. Kineerewaapallallesella o ephevo ddisesennddo nave khavikhalla ellapo nko ohinaaphiyeweewo.

³⁷ Athu a o Elamu kineerowoopopiha vamiitthoni va adaniiwa ni va oyo anapaalla waatthollosa. Kineerewaashella murima wunchichi nave kineerowiikara ni nsupada ophiyera kaatthollosille.

³⁸ Vano kineerokeraatthiha mpandwaaka woomwene o Elamu nko kinaamoonongeemi mwene ni enduna ddaye.

³⁹ Komave mallapo amuhoollo kineerewaahokollosellattho murendelle athu a o Elamu. Mi Apwiya koollota.”