Yeremiya 48 - Mawu a Mulluku

Woonongeya wa Mowabu

¹ Voollotani dda Mowabu, Apwiya Amasiva Mattheene, Mulluku a Israele, eni, “Otulli muzinda wa Nebo, wootthattuwa echipululu. Kiriyataimu oowullihiwa muru, oogonjihiwa, mpandaaye woollipa aawunyaambusa ni aawukumulla,

² ovuwa wa Mowabu woomalla. Yaampanganella ddoonamasikita o Heshiboni, voollotani wi, ‘Hankoni nimoononge, ahikhallettho mutundu na athu.’ Nyu ookhalla o Madimeni muneereweerihiwa ellapo tuu vawi eneerowiikarihani ni nsupada.

³ Ngiiwani winlla weethakaraka wa athu a o Horonaimu, eni, ‘Otthollosa! Woononga!’ ”

⁴ “Mowabu ohoonongeya, anaaye enoopa ekutho.

⁵ Athu eniminlla wunchichi va mutunda wa o Luhiti. Winlla wa woononga onniiweya ohito wa Horonaimu.

⁶ ‘Thawani! Ivulluseni! Thamakani wonanko embizi mu echipululu!’ ”

⁷ “Nyu muneerophariwattho vawi mwaroromella mitteko ddanyu ni eyuumaanyu. Kemoshi, mullukwaanyu, aneerophariwa okaporo ni allupa mukuthwaaye ni enduna ddaye.

⁸ Yawoononga eneerophiya va orive muzinda, khawiivo muzinda naari mmodda onaavulluwe. Mapuro a mutapo eneerewoonongeya, mapurottho oowella eneerotthollosiwa. Mi Apwiya koollota.

⁹ Mumuchenjeze Mowabu vawi naanweene vaava aneerewoonongoya, Mizinda ddaye ddineerotthattuwa matepe, khaddikhalla ni athu.”

¹⁰ Ootembeleliwa oyo anaphara moolesi mutteko wa Apwiya. Ootembeleliwa oyo anahiiha nsupada naye waakakatha ni owiipha athu.

Woonongiwa wa mizinda dda Mowabu

¹¹ Apwiya yaallota wi, “Mowabu ookhalla va murendelleni ovenyera esombwaaye wonanko vinyo ookeraattheya phaama, oohimiminelliwa m'munoni mmodda. Ekaamba yawi khanaphariweke okaporo, makhallellwaaye tti amoddamoddave navettho wunkhella waye tti omoddamoddave.”

¹² “Sika vano chenjerani vawi enimawa mallapo ayo kinaarumeemi athu awi ammimine Mowabu wonanko vinyo. Vatulli viwa mino ddaye khaddikhalla ni ello, ddineeropwesiwa.

¹³ Sika Mowabu aneerowulliwa muru ni Kemoshi, mullukwaaye, wonanko mmo Israele awulliwelleeye muru ni Betele, mulluku oyo amuroromelleeye.”

¹⁴ “Ethiyo munawora mwawiidde ollota wi, ‘Hiyaano sika oovuwa, allupa ekhoto amasiva?’

¹⁵ Yawoononga Mowabu ni mizinda ddaye oophiya, asombwaaye akitthi eneerewiiphiwa yiiphiwe. Mi mwene, Apwiya Amasiva Mattheene, koollota.

¹⁶ Omora wa Mowabu wahaatamella, ahanlle vang'ono woonongiwa.”

¹⁷ “Nyu awaatamanana attheene, nyu akhwaaye attheene oomudduwella mumoriwelleni ethakaraka. Nave mullote wi, ‘Ngoonani mmo ekothowelliiwa ekopo yoomwene ni yamasiva!’

¹⁸ Nyu a o Diboni, kitthani va nipuro nanyu nooriiheya, keraatthini vatthi vawummamva. Oomoononga Mowabu oophiya wi awane ni nyuwaano, ookumulla mipanda ddanyu ddoollipa.

¹⁹ Nyu ookhalla mu muzinda wa Aroere, imellani mukhwipi mwa musewu moone. Akoheni allopwana ni aatthiyana oothawa wi, ‘Ethiyo yeereyille tti tini?’

²⁰ Alliwa eneerewaakhulla wi, ‘Mowabu oomwareya, oowullihiwa muru, mwinllelleni mookhuwa. Llalleyani o muhinje wa Arinoni wi Mowabu ootthattuwa ntepe!’

²¹ “Echiweruzo yoophiya o ellapo yamiyaango, o mizinda dda Holoni, Yaza, Mefaati,

²² Diboni. Nebo, Betedibilataimu,

²³ Kiriyataimu, Betegamuli, Betemeoni,

²⁴ Keriyoti, Bozira ni mizinda ddittheddene dda o Mowabu, ddawoorekama ni ddavakhuviru.

²⁵ Masiva a Mowabu ahoonongeya, muwonwaaye woollipa wookothowa. Mi Apwiya koollota.”

Mowabu aneerowullihiwa muru

²⁶ “Mumulezelihe Mowabu kaambiiwa ahiitukhulla vawaawukilani Apwiya. Atthaveyiwe m'marapheywaaye nave akhalle ello yoottheyiwa.

²⁷ Mowabu, onnuupuwella mmo wamunyaambuselleewe Israele nave mmo waavevullelleewe wonanko allupaawiiya?

²⁸ “Nyu athu a o Mowabu, hiyani mizinda ddanyu! Khaweni mwakhalle variyari va malluku! Mukhalle wonanko ekhunda yoomaka emphuru o mullako wa nikhungu.

²⁹ Nohiiwa dda wiitukhulla wa Mowabu. Olliye tti awiitukhulla, awiinyarulla, awiiwa ddaayeve nave tti awiitukhulla wunchichi.

³⁰ Kinnadduwella dda wiitukhulla waye. Wiitukhulla waye khonna mutteko nave mitteko ddaye khaddiphura ello.

³¹ Sika kiniminlla ekaamba ya Mowabu, kiniminlla mweethakaraka ekaamba ya athu a o Mowabu ni o Kiriheresi.

³² Kinawinllella athu a o Sibina okhwaranya mmo kawinllenlleemi athu a o Yazere. We muzinda wa Sibina, waari wonanko mpesa eyo enthambi ddiwa ddarapille ophiya o enyanja, ophiyerattho o Yazere. Koma awoononga ootthollosa ezipaso ddawo ddamweellimweni, ootthollosa mipesa ddawo ddittheddene.

³³ Ohakallalla ni othapella wa ellapo ya ethaya yaphaama ya Mowabu woomalla. Koohiiha ovuuva wa vinyo moovotellamo mpesa. Khaavo anakhuwa moohakallalla aavotaka mpesa vawi okhuwa oniiweyanko khe woohakallalla.

³⁴ “Athu a o Heshiboni ni a o Eleyale eniminlla nave winlla wiwa onniiweya ophiya o Yaza ovenyera o Zowari ophiya o Horonaimu ni o Egilati Shelishiya. Naari maaddi a o Nimurimu yoowelleella.

³⁵ Kineerewaahiiha Amowabu ayo enavelleella mukutho o mapuro oollapellamo ni woosa lubani* wa milluku ddiwa. Mi Apwiya koollota.

³⁶ “Sika murimaaka onnamwinllella Mowabu wonanko nipallapata. Murimaaka onawinllella athu a o Kiriheresi wonanko nipallapata, ekaamba yawi eyuumiiwa ettheene yayiphwannyiiwa yoomalla.

³⁷ Muru wa arive muthu woochemiwa mpala, ereru ddiwattho ddoochemiwa, matta mattheene tti oochekeyachekeya nave muyuununi mwiwa ewanre eziguduli.

³⁸ Vaddullu va enyumba ddittheddene dda o Mowabu ni m'misewuni mwaye khamuwa mwiiweyattho ello emodda koma winllave. Koomunyenyanyenya Mowabu wonanko epalli yoohikhalla ni mutteko.

³⁹ Ngoonani mmo anyenyeyelleeye! Ngiiwaani mmo eninllella athwaaye! Ngoonani mmo iikuhelleeye moowulliha muru! Mowabu ootthattuwa ello yoonyaambuseya, ello yawoopiha wa akhwaaye awaatamanana. Mi Apwiya koollota.”

Mowabu khavulluwa

⁴⁰ Apwiya enallota wi, “Mutundu mmodda oneeromvavella ni ommorella Mowabu wonanko mpungu ottaphurusalle muuphello.

⁴¹ Mizinda ddineerophariwa nave mipanda ddineerewaakhiwa. Nllapo nenno mirima ddoollipa o Mowabu ddineerotthukumella wonanko mutthiyana vooyarani.

⁴² Mowabu aneerewoonongeya, khakhallattho mutundu wa athu vawi ahiitukhulla vawaawukila Apwiya.

⁴³ Woopiha, nlliti ni musampha ddinuutiyerellani nyu athu a o Mowabu. Mi Apwiya koollota.

⁴⁴ Oothawa woopiha anaamorelle munllitini nave ookhuma munllitini anaamakiwe va m'musamphani. Nndda sika kineereemi kimmorihelle Mowabu va enthawi ya ollakiwa waye.

⁴⁵ Oothawa enniimella va Heshiboni, ekaamba yootopa wunchichi. Koma mallumi amunllo a o Heshiboni, mallumi amunllo oovenyera o enyumba yoomwene Sihoni nave munllooyo onoononga miyaango dda o Mowabu, ellapo ya athu a maraapwa.

⁴⁶ Otulli, Mowabu! Athu oomullapella Kemoshi aatthollosiwa nave aniiwa attheene aallopwana ni aatthiyana aakusiwa okaporo.

⁴⁷ Komave mallapo a muhoollo Apwiya eneerohokollosellattho murendelle wa Mowabu.” Nndda sika ellotille Apwiya dda nnddo ddinaamweereyelle Mowabu.