Yeremiya 46 - Mawu a Mulluku

Ogonjihiwa wa Iguputo o Karikemishi

¹ Mawu a Apwiya yaawa wa Yeremiya oollota dda athu a mitundu ddimodda.

² Ollota dda Iguputo, yallotille dda mulloko wa akhoto wa Farao Neko, mwene a o Iguputo oyo Nebukadinezara mwene a o Babiloni amugonjihalleeye o Karikemishi o muhinje wa Yufurate va muyakha waneesese wa omwene wa Yehoyakimu mwaana a Yosiya mwene a o Yuda wi,

³ “Potokosani ddawiitetezella, mwaatamelle okhotoni.

⁴ Mwaamake akavalo, nyu oowellavo, muwelle. Imellani vamuzerani muwanre enduwira ddanyu, andusani mavakaanyu, waranittho malayaanyu amukoko.

⁵ Ethiyo vano kinoona tini? Ahoova, aahokollowa, akhotwiiwa aagonjihiwa, enathawa mwawoova, oohiweha mutulli.

⁶ Oothamakesesa khawora ovulluwa, naari akhoto amasiva khewora wiivullusa. Ennakwakwatuwa ni wiikuha wene, ompoto wa muhinje wa Yufurate.

⁷ Ethiyo ttaani anawella wonanko Nailo, wonanko muhinje wa maaddi a echigumula?

⁸ Iguputo sika anawella wonanko Nailo, wonanko muhinje wa maaddi a echigumula. Iguputo anallota wi, ‘Kineerowella ni oyikhupaarella ellapo yavatthi, kineerewoononga mizinda ni athu.’

⁹ Nyu akavalo, hankoni, nyu magareta, thamakani, Nyu akhoto, yaani vahoollo, nyu a o Kushi ni a o Puti, oophareella ezishango, nyu eeruso dda miira a o Ludi.”

¹⁰ Koma nllaponno tti nllapo na Apwiya Mulluku Amasiva Mattheene, nllapo nowaahokollosella adaniiwa. Nsupada niwa nineerewoononga, nineerovona ni olezela nikhame. Apwiya Amasiva Mattheene ennavelleella mukutho, ompoto, vakhuviru ni muhinje wa Yufurate.

¹¹ We namwalli a o Iguputo khawe o Giliyadi, wakuse murete. Woheesesa mirete ddoohiyanahiyana, woolephela, eretaawo khechirihiwa.

¹² Athu a mitundu ddimodda ahiiwa dda ddoowulliha muru ddawo, winlla wawo wookwakhwana ellapo yavatthi ettheene. Akhoto enimakuhanakuhana, attheene eniikuhella nimodda.

Owa wa Nebukadinezara

¹³ Nebukadinezara mwene a o Babiloni awiilleeye wi ahelle ekhoto ellapo ya Iguputo, mawu a Apwiya yaawa wa miyaano wi,

¹⁴ “Mullalleye o Iguputo, o Migidoli, o Memfisi ni o Tapanesi. Alleelleni athu a wenko wi, ‘Imellani vanipuroni vanyu nave mukhozeke, vawi ekhoto eneerowoononga ddittheddene muriinyuna.’

¹⁵ Ethiyo mullukwaanyu Apisi athawelle tini? Ethiyo nankhoro mwamullapellaanyoolle ahillipelle tini? Tti ekaamba yawi Apwiya aamukuha.

¹⁶ Athwaanyu yaakwakwatuwa ni omorellana, enallota wi, ‘Akuvani, hankoni nihokollweelle owaani, o ellapo eyo nayarelliweehuwo, nithawe nsupada na adaniihu!’ ”

¹⁷ “Farao, mwene a o Iguputo, mumuvahe nnddina nanaanweene nawi, ‘Ootokollolla, ootathilla ekaraaye.’

¹⁸ Mi Apwiya Amasiva Mattheene tti mwene, mi tti Mulluku Ookumi. Mmodda amasiva aneeroowa wonanko Tabori, mwaango wookhwaranya miyaango ddittheddene. Ari wonanko mwaango wa Karimele, wawiimella phaama mukhwipi mwa enyanja.

¹⁹ Nyu a o Iguputo mummake katundwaanyu a wuukaporoni vawi Memfisi aneerotthattuwa echipululu, wonanko ntepe moohikhalla athu.

²⁰ Iguputo ari wonanko musaanaang'ombe ooreera, koma mwiikaanga woovenyera ompoto oneerommorella.

²¹ Akhoto aganyu ariiyena, tti wonanko asaanaang'ombe ooneneva. Alliwattho aahokollweella mutulli nave aathawa vamodda, khaavo allipihenlle. Ddawoona, enthawi ya otulli yahaamorella, sika enthawi yawaallaka.

²² Iguputo anavuma wonanko enowa yoothawa kaambiiwa adanaaye aawa ni ezida ddiwa, aawa ni akottokwa wonanko awuuha miteekho.

²³ Eneerewuuha otthako wa o Iguputo naari ophimpe, kaambiiwa athwaayo yaatille wonanko nazombe, tti ooheerengeya.

²⁴ A o Iguputo eneerowulliwa muru, eneerophariwa okaporo ni athu a ompoto. Mi Apwiya koollota.”

²⁵ Apwiya Amasiva Mattheene, Mulluku a Israele, enallota wi, “Kineeromullaka Amoni, mulluku a Thebesi. Kineeromullakattho Farao ni Iguputo ni milluku ddaye, mamwenaaye ni attheene ayo enamuroromella.

²⁶ Kineerewaavelleella wa ayo enapaalla ewoononge, sika wi wa Nebukadinezara, mwene a o Babiloni ni oohoollellaaye akhoto. Komave vavira enthawi, Iguputo aneerokhallattho ni athu wonanko khalle. Mi Apwiya koollota.”

Apwiya eneerewaavullusa athwiiwa

²⁷ Koma we Yakobo, oorumeyellaaka, ohoove, we Israele, ohitathille murima, vawi kineerewuuvullusa o ellapo ddawoorekama. Kineerovullusattho edduullu ddawo o ellapo ddapharelliweewawo okaporo. Yakobo aneerohokollowa ni okhalla mwaphaama ni mwamurendelle, khaavottho mmodda anaamoopopihe.

²⁸ Apwiya enallota wi, “We Yakobo, oorumeyellaaka, ohoove vawi mi kiri ni weyaano. Kineerotthollosa mitundu ddittheddene dda athu a ellapo nnddo kawiikarelleemiwo. Koma we nguutthollosa, komave nguuhiya oohuullaka, kinuullake mweechilungamo.”