Yeremiya 44 - Mawu a Mulluku

Ochenjeziwa wa Ayuda ookhalla o Iguputo

¹ Mawu a Apwiya yaawa wa Yeremiya oollota dda Ayuda ayo yakhalla o ellapo ya Iguputo o Migidoli, o Tapanesi, o Memfisi o echigawo ya Patirosi wi,

² “Apwiya Amasiva Mattheene, Mulluku a Israele, enallota wi, ‘Mohoona ddawoopiha nnddo kamorihelleemi va Yerusalemu ni mizinda ddittheddene dda o Yuda. Vano ddittheddenennddo ddootthattuwa ntepe, khamunakhalla athu.’

³ Ddittheddenenndda ddaheereya ekaamba ya machimo a athu ayo yattatthamunlle owallaaka, vawoosellani lubani* milluku ddimodda ni oddirumeyella, milluku ddoohidduwelliwa ni alliwa, nyuwaano apaalle makhollwaanyu.

⁴ Komave miyaano kaavirellella waaruma amurummwaaka anamallotella wi yuulleelleni wi, ‘Muheereke ddoonanara nnddo mi kiniitaneemina.’

⁵ Koma makhollwaanyu kheyiiwellelle, kheyaapwathillewo naari vang'ono. Kheyaahiyalle weera ddoonanara ddiwa apaalle woosella lubani milluku ddimodda.

⁶ Sika owalli wa osha murima waka waakhara wonanko munllo m'mizindani dda Yuda ni m'misewuni dda o Yerusalemu. Mizindannddo ddaatthattuwa matepe oohiyiwa monga ddikhallelliiwa ollellova.

⁷ “Sika vano Apwiya Amasiva Mattheene, Mulluku a Israele, enakoha munaddoonongella tini mwawi ddiidda? Kaambiiwa tini munaasheenyu owiiphiha Ayuda aallopwana ni aatthiyana, anamwani ni ooyariwa wene, oohuuhiyerani naari mmodda va nlloko nanyu?

⁸ Kaambiiwa tini munattatthamulleenyu owallaaka vaweerani ddoonanara ni mattaanyu navettho vawoosellani lubani milluku ddimodda mu ellapo ya Iguputo mmo munakhalleenyu? Munaddoononga nyookha ni okhalla ello yootembeleliwa ni yoovevulliwa mmwiitthoni mwa athu a mitundu ddittheddene dda va ellapo yavatthi.

⁹ Ethiyo mootiwalla ddoonanara ddittheddene nnddo yeerille makhollwaanyu, mamwene a o Yuda ni awariwa navettho nyuwaano ni awarinyu, o ellapo ya Yuda ni m'misewuni dda mu Yerusalemu?

¹⁰ Koma ophiyera ollello khamunalape, khamunakoova nave khamuthwanre malamulwaaka ayo kawinnyalleemini nyuwaano ni makhollwaanyu.

¹¹ “Ekaamba ya yeella Apwiya Amasiva Mattheene, Mulluku a Israele, enallota wi, ‘Koosimikiza oweerella ddoonanara ni waatthollosa athu a o Yuda.

¹² Kineerewaakusa athu oohalla o Yuda ayo yallipihenlle oya o Iguputo wi yakhalle wenko, attheenaayo eneerotthollowa. Eneerewiiphelliwa mu ellapo ya Iguputo, amodda enaakhwe ni ekhoto nave amodda ni ettalla. Ang'onong'ono ni uullupalli enaakhwe ni ekhoto apaalle ni ettalla. Nave eneerotthattuwa ello yoonanara ni yooriiryiha mwiilli, ello yootembeleliwa ni yoovevulliwa.

¹³ Kineerewaallaka Ayuda ookhalla o Iguputo wonanko mmo kaallakelleemi o Yerusalemu.

¹⁴ Sika mwa athu oohalla o Yuda ayo yayiille o Iguputo, khaavo anaavulluwe apaalle okhalla ni okumi apaalle ohokollweella wi akhallettho o Yuda nko yakhallelliiwawo munkhella. Khaavo anaahokollweellewo opatula ayo enaathawe ekhoto.’ ”

¹⁵ Vano allopwana attheene ayo yadduwenlle wi awariwa yaanoosella lubani milluku ni atthiyana attheene ayo yaari vaavo athu anchichi owaakattho athu attheene ookhalla o Patirosi mu ellapo ya Iguputo. Ddawoona, athu anchichi yaamwaakhulla Yeremiya wi,

¹⁶ “Hi khaaniiwellella nnddo onilleelleewe mu nnddina na Apwiya.

¹⁷ Koma nineere ddittheddene nnddo nallupenlleehu. Nineeromoosella lubani mwene aamutthiyana ooddullu ni omuheraatthella mikutho ddaddoowirya wonanko neerelleehu ni makhollwaahu, mamwenaahu ni enduna ddahu m'mizindani dda o Yuda ni m'misewuni dda o Yerusalemu. Enthawi yeeyo naakhalla ni yoocha yinchichi nave naanavona voohikhalla ddookatamiha.

¹⁸ Koma ovenyera enthawi nahiyalleehu omoosella lubani mwenaamutthiyana ooddullu ni omuheraatthella mikutho ddaddoowirya, khaninna erive ello nave nohoonongeya ni ekhoto ni ettalla.”

¹⁹ Vano atthiyana yaallota wi, “Naanamoosella lubani mwene aamutthiyana ooddullu ni omuheraatthella mikutho ddaddoowirya. Ethiyo amamunihu kheyaakhullelle ddenndda namwaapeyelleehu buledi oolembavo ekhovaaye ni ovelleella wa olliye mikutho ddaddoowirya?”

²⁰ Vano Yeremiya iiwalleeye waakhulla wa allopwana ni atthiyana attheene, aallota wi,

²¹ “Ethiyo muneesa wi Apwiya aatiwalla apaalle khenuupuwella dda lubani moosa nyuwaano, makhollwaanyu, mamwenaanyu, enduna ddanyu ni athu a mwiillaponimmu, m'mizindani dda o Yuda ni m'misewuni dda mu Yerusalemu?

²² Ekaamba ya yeella, Apwiya kheyaawonre ovillella mitteko ddanyu ddoonanara nnddo mwaddeereenyu. Sika ellapwaanyu yaatthattuwa ntepe, ello yooryiryiha mwiilli ni yootembeleliwa, ellapo yoohikhalla ni athu, wonanko ekhallelliiwa ollellova.

²³ Otulli yoolla wohuumorellani ekaamba yawi moosa lubani ni mwahaachimwella Apwiya vookhootani wiiwellella mawiiwa ni voohithwarani malamulo ni malangizwiiwa mattheene.”

²⁴ Yeremiya ahaalleellattho athu attheene, makamaka atthiyana wi, “Nyu attheene oovenyera o Yuda munakhalla o Iguputo, ngiiwani mawu a Apwiya.

²⁵ Apwiya Amasiva Mattheene, Mulluku a Israele, enallota wi nyuwaano ni awarinyu mwaallupella ni vayanoni vanyu nave mwaheera ni mattaanyu. Nave mwaalonjeza wi muneereweera nnddo mwallupenlleenyu, omoosella lubani mwene aamutthiyana ooddullu ni omuheraatthella mikutho ddaddoowirya. Iyaayi, ddaphaama! Simikizani lonjezano nanyu ni weera nnddo mwallupenlleenyu.

²⁶ Nyu Ayuda attheene a mu Iguputo, vano iwani mawu a Apwiya. Vawi Apwiya aallupella mu nnddina niwa noopambana wi mwa athu a o Yuda khaavo naari mmodda anaaromollettho nnddina nenna mu Iguputo wi, ‘Vamiitthoni va Apwiya Mulluku Ookumi.’

²⁷ Kineerewoonesesa wi athu yaalla kiweerelle ddoonanara ohiri ddaphaama. Athu attheene a o Yuda ayo eri o Iguputo eneerewiiphiwa ni ekhoto, amodda enaakhwe ni ettalla, ophiyera kaatthollosille.

²⁸ Oovulluwa okhotoni, ayo enaahokollweelle o Yuda ovenyera o Iguputo, enaakhalle aweerengeya. Sika oohalla attheene a o Yuda ayo yakhalla o Iguputo edduwella wi ddawoona tti ddiivi, ddayiwannddo apaalle ddaakanndda.

²⁹ Kinuuvahani echizindikiro yawi kineerewuullakani o nipuro nenna wi vawi ddiiddo mudduwelle wi mawaaka awi kineerewuullakani tti awoona.

³⁰ Echizindikirweeyo tti yawi Farao Hofira, mwene a o Iguputo, kineeromvelleella wa adanaaye ni wa athu oopaalla omwiipha wonanko kamweerelleemi Zedekiya mwene a o Yuda. Vawi olliyettho kaamvelleella wa mudanaaye Nebukadinezara mwene a o Babiloni oyo apaalla omwiipha.”