Yeremiya 43 - Mawu a Mulluku

Yeremiya anakuselliwa o Iguputo

¹ Yeremiya amallihalle waalleella athu ddittheddene Apwiya Mullukwiiwa yamurummiiwa wi aalleelle,

² Azariya mwaana a Hoshaya, Yohanani mwaana a Kareya navettho athu attheene awiitukhulla, yaamulleella Yeremiya wi, “We onimoottha. Apwiya Mullukwaahu kheyuurumalle wi ollote wi, ‘Muhiyeewo o Iguputo.’

³ Baruki mwaana a Neriya sika uuwatihere wi onihiihe wi munivelleelle wa Ababiloni wi eniiphe apaalle oniphara okaporo ni oniyaana o Babiloni.”

⁴ Sika Yohanani mwaana a Kareya, oohoollella attheene a akhoto ni athu attheene a o Yuda yaakhoota owiiwellella Apwiya nave kheyaakhanlle o Yuda.

⁵ Sika Yohanani mwaana a Kareya ni oohoollella a akhoto yahaakusa athu attheene oohalla o Yuda ni ayo yahokollowille ovenyera o ellapo yapallalleyelliiwawo.

⁶ Athwaayo yaari allopwana, atthiyana, anamwani, anamwani aatthiyana a mwene ni athu attheene ayo Nebuzaradani, oohoollella a akhoto, aahiyalleeye wa Gedaliya mwaana a Ahikamu, edduullu ya Shafani. Yaamukusattho namallotella Yeremiya ni Baruki mwaana a Neriya.

⁷ Moohiiwellella mawu a Apwiya, yahaayaana athu attheene o Iguputo, ophiya o Tapanesi.

⁸ O Tapanesi mawu a Apwiya yaawa wa Yeremiya wi,

⁹ “Kusa malluku mamodda muullupalli, waavuhellelle muthaani va ettilla yoovollowella o enyumba yoomwene ya Farao o Tapanesi, Ayuda attheene yoonaka.

¹⁰ Vano waalleelle wi miyaano Apwiya Amasiva Mattheene, Mulluku a Israele, kineeromwiithana oorumeyellaaka Nebukadinezara, mwene a o Babiloni. Olliye aneerowuhiya mpandwaaye ni otthipella musasaaye va malluku eri mvaalla.

¹¹ Nebukadinezara aneeromoononga Iguputo, aneerorumiha mullilli va athu oophwanella okhwa ni mullilli eneerewiiphiwa ni mullilli, oophwanella ophariwa okaporo enaaye wuukaporoni nave oophwanella wiiphiwa ni nsupada eneerewiiphiwa ni nsupada.

¹² Aneeroviddeella munllo mu enyumba dda milluku dda o Iguputo ni oddoosa enyumbannddo nave millukunnddo aneeroddiyaana wuukaporoni. Aneereweelliha ellapo ya Iguputo wonanko mbusa anatthollelleeye ethupo mu yoowaraaye sika anaweerelleeyena nave anaakhume mu Iguputo mwamurendelle.

¹³ Aneerokumulla apoto a mulluku a nndduwa a o Iguputo. Nave aneeroddihella munllo enyumba dda milluku dda o Iguputo.”