Yeremiya 42 - Mawu a Mulluku

Athu enamuveka Yeremiya wi aavekelle wa Apwiya

¹ Vano oohoollella attheene a akhoto ni Yohanani mwaana a Kareya, Azariya mwaana a Hoshaya ni athu attheene, uullupalli ni ang'onong'ono yaaya wa namallotella Yeremiya emulleella wi,

² “Apellani maaru o oveka wahu. Pepaani, munivekelle ooyevahi wa Apwiya Mullukwaanyu. Nihanlle athu ooyevave mwa athu anchichi monga munanoonelleenyummu.

³ Muvekelle wi Apwiya Mullukwaanyu enilleelle nko ninaphwanelleehu oyaawo ni nnddo ninaaweereehu.”

⁴ Sika namallotella Yeremiya ahaalleella wi, “Kohiiwa nnddo mullotilleenyu, kineerovekella wa Apwiya Mullukwaanyu wonanko munapaallelleenyu. Nave ddittheddene Apwiya enaallotiiwa kineerewuulleellani, nguukhuwellani erive ello.”

⁵ Alliwa yaamulleella Yeremiya wi, “Apwiya ekhalle mboni awoona ni oororomelleya oonivaanyiha hiyaano naaheera nnddo Apwiya Mullukwaahu yuurumalliiwani wi munilleelle.

⁶ Khaya tti ddaphaama apaalle ddoonanara, nineerewiiwellella mawu a Apwiya Mullukwaahu ayo nuuvekilleehuni wi mwanivekellewo. Ddawoona, nineerewiiwellella Apwiya Mullukwaahu wi ddeko ddineetelle phaama.”

Apwiya enaakhulla ovekella wa Yeremiya

⁷ Emanlle mallapo khumi, mawu a Apwiya yaawa wa Yeremiya.

⁸ Sika Yeremiya aamwiithana Yohanani mwaana a Kareya ni oohoollella attheene a akhoto ayo yaari ni olliye navettho athu attheene uullupalli ni ang'onong'ono.

⁹ Ahaalleella wi, “Apwiya Mulluku a Israele ayo mwakirumalleenyuwo wi kavekelle ello mu nnddina nanyu enallota wi,

¹⁰ ‘Mwakhalla mu ellapweella, kineerewuumakellani vamodda ohiri wuukumullani. Kineerowaallani ohiri wuutullani. Kinnamoriwa ethakaraka ekaamba ya ddoohoosa nnddo kuumorihelleemini.

¹¹ Muhimoove mwene a o Babiloni oyo munamovaanyu ollello. Muhimoove mwenooyo kaambiiwa miyaano kiri ni nyuwaano wi kuuvulluseni ni owaakiherani m'mattani mwaye.

¹² Kineeroweerellani echifundo wawi olliyettho aneeroweerellani echifundo ni owaakhullellani wi mukhalle mwiillaponi mwaanyweella. Mi Apwiya koollota.’

¹³ “Koma apaalle ttuullota wi,

¹⁴ ‘Iyaayi, ninaya o Iguputo wenko, woohikhalla ekhoto, woohiiweya winlla wa nipallapata ni woohirama yoocha wi nakhalle wenko.’

¹⁵ Sika nyu oohalla o Yuda, iwani mawu a Apwiya Amasiva Mattheene, Mulluku a Israele awi, ‘Mwallipihella ddooya o Iguputo, muneeroyaawo mwakhalle wenko,

¹⁶ sika wi ekhoto munayooveenyu eneerewuugonjihani o Iguputo wenko. Ettalla munayooveenyu eneerewuuhoosani naari o Iguputo nave munaakhwelle wenko.

¹⁷ Athu attheene enallipihella ddooya o Iguputo wi yakhalle wenko enaakhwe ni ekhoto, ettalla ni mullilli. Khaavo naari mmodda anaahalle apaalle ovulluwa o ddawoopiha nnddo kineereemi kaamorihelle.’ ”

¹⁸ “Apwiya Amasiva Mattheene, Mulluku a Israele, enallota wi, ‘Wonanko mmo kaashelleemi murima athu ookhalla o Yerusalemu, emoddamoddave yeeyo kineerewuushellani murima nyuwaano mwaya o Iguputo. Muneerotthattuwa ello yoonanara ni yawoopiha, yootembeleliwa ni yoonyaambusiwa. Khamuwa moonattho nipuro nenna.’ ”

¹⁹ Sika kaavirellella ollota wi, “Nyu oohalla o Yuda, muhiyeewo o Iguputo. Kohuuchenjezani ollello.

²⁰ Valle mwaakiruma wi kuuvekelleni wa Apwiya Mullukwaanyu nave wi kuulleelleni erive ello eyo Apwiyaanyu eneeriiwa ellote nave wi muneereweera.

²¹ Kohuulleellani ddittheddene ollello koma khamwaawiiwellelle Apwiya Mullukwaanyu ddittheddene nnddo ekirumalliiwa wi kuulleelleni.

²² Ddawoona, dduwellani wi muneerokhwa ni ekhoto, ettalla ni mullilli o nipuro nno munapaalleenyu wi mwakhallekewo.”