Yeremiya 40 - Mawu a Mulluku

Yeremiya anakhalla ni Gedaliya

¹ Mawu a Apwiya yaawa wa Yeremiya va enthawi eyo Nebuzaradani oohoollella a alonda amuttaphunlleeye o Rama. Amuphwanyille amakiwe ni onyolo ni awuukaporoni amodda a o Yerusalemu ni a o Yuda ooyaana o Babiloni.

² Oohoollellooyo aamukusa Yeremiya amulleella wi, “Apwiya Mullukwaawo, yaallota wi eneerewoononga nipuronna.

³ Nave ddenndda aheera moollikana ni mmo yallotelliiwa ekaamba yawi nyuwaano athu mwahaachimwella Apwiya, khamwaawiiwellelle.

⁴ Koma weyaano Yeremiya, ollello kinimuuttaphulla onyolo m'mattanimu. Hanko o Babiloni waarimi opaallaka nave kineerewuuwehera phaama. Koma waahipaallaka, kheviri ello. Ngoona, ellapo ettheene eri vamiitthoni vawo. Oye nko onooneewe wi tti waphaama.

⁵ Waahiyaawo, ohokollweelle wa Gedaliya, mwaana a Ahikamu, mwaana a Shafani, oyo mwene a o Babiloni amutthoonlleeye wi akhalle oolamulella a mizinda dda Yuda. Wakhalle ni olliyooyo variyari va athu apaalle oye orive weko onapaalleewewo.” Vano oohoollella a alondoolle aamuvaha yoocha, aamuvahattho emphaso nave aamuhiya wi akhwaranyeke.

⁶ Sika Yeremiya aaya wa Gedaliya mwaana a Ahikamu o Mizipa nave aakhalla ni olliye variyari va athu oohalla mwiillaponimmo.

Gedaliya oolamulella a o Yuda

⁷ Nave vaakhalla oohoollella amodda ni akhotwiiwa ayo yiipittha. Alliwa ni athwiiwa yahiiwa wi mwene a o Babiloni aamutthoolla Gedaliya mwaana a Ahikamu wi akhalle oolamulella nave wi aawehereke athu oohoowesesa, allopwana, atthiyana ni anamwani, ayo yahiphariwe okaporo waayaana o Babiloni.

⁸ Sika athu yaawiille wa olliye o Mizipa yaari Ishmaele mwaana a Netaniya, Yohanani ni Yonatani anamwani a Kareya, Seraya mwaana a Tanihumeti, anamwani aallopwana a Efayi o Netofa ni Yezaniya mwaana a Maaka, alliwaayo ni athwiiwa.

⁹ Gedaliya mwaana a Ahikamu, edduullu ya Shafani, ahaallupellella attheenaayo wi, “Muhoove waapharella mutteko Ababiloni. Khallani mwiillaponimmo, mumurumeyelleke mwene a o Babiloni nave ddeko ddittheddene ddineerekoweetellani phaama.

¹⁰ Miyaano kinaahalle o Mizipa wi kiwiimellellekeni wa Ababiloni yaawaaka. Koma nyuwaano mukuse ni osunga phaama ezipaso ddanyu, vinywaanyu ni makhuraanyu nave mukhalleke m'mizindani mwaakhilleenyunnddo.”

¹¹ Ayuda a o Mowabu, a o Amoni ni a o Edomu ni a o ellapo ddimodda, alliwattho yahiiwa wi mwene a o Babiloni ahaahiyawo athu amodda o Yuda nave wi ahaahiyera Gedaleya mwaana a Ahakimu, edduullu ya Shafani, akhalle awaalamulella.

¹² Vano Ayuda attheenaayo yaawa ovenyera o ellapo ddittheddene yapallalleyelliiwawo. Yaawa o Yuda eddoonihella vamiitthoni wa Gedaliya o Mizipa. Nave emata ddiwa ddahimma ezipaso ddinchichi ni vinyo munchichi.

Wiiphiwa wa Gedaliya

¹³ Nllapo nimodda Yohanani mwaana a Kareya ni oohoollella akhoto yiipitthalle, yaaya wa Gedaliya o Mizipa.

¹⁴ Yaamukoha wi, “Ethiyo munnadduwella wi Baalisi mwene a Aamoni oomuruma Ishmaele mwaana a Netaniya wi awiipheni?” Koma Gedaliya mwaana a Ahikamu khaakhulupililalle.

¹⁵ Vano Yohanani mwaana a Kareya aamulleella vakhwipi Gedaliya wi, “Kaakhullelleni wi kamwiiphe Ishmaele mwaana a Netaniya nave khaavo anaadduwelle. Nyuwaano anaawiiphelleni tini ni waakhullella wi Ayuda attheene ewaapheellenaalla emwareye nave oohalla o Yuda yoonongiwe?”

¹⁶ Koma Gedaliya mwaana a Ahikamu aamwaakhulla Yohanani mwaana a Kareya wi, “Iyaayi, oheere ddennddo. Nnddo onalloteewe dda Ishmaele tti ddawoottha.”