Yeremiya 39 - Mawu a Mulluku

Ogonjihiwa wa Yerusalemu

¹ Va muyakha waneetthanu ni sese wa omwene wa Zedekiya o Yuda, mweeri waneekhumi, Nebukadinezara, mwene a o Babiloni, aawa ni akhotwaaye attheene o Yerusalemu nave aawaapheella muzindooyo.

² Va muyakha waneekhumi ni mmodda wa omwene wa Zedekiya, mweeri waneesese, nllapo naneetthanu ni sese na mweeri, mpanda wa muzindooyo waaphovolliwa.

³ Sika attekweene attheene a mwene a o Babiloni yaavollowa ekeraatthi va mullako wa Variyari. Alla yaari Neregali Sharezere, Samugiri Nebo, Sarisekimu muullupalli a enduna ni Neregali Sharezere mmoddattho akhoto muullupalli oohoolla vamodda ni enduna ddimodda ddittheddene dda mwene a o Babiloni.

⁴ Zedekiya mwene a o Yuda ni akhotwaaye yawoonilliiwa yaathawa m'muzindani mahiiyu oweella m'matani mwa mwene ovirella va mullako wa variyari va esiri piilli nave yathawenlle o Araba.

⁵ Koma akhoto a Ababiloni yaamuthwara ophiyera yaamphara Zedekiya o matapo o Yeriko. Empharille yaamuyaana wa Nebukadinezara mwene a o Babiloni o Ribula mu ellapo ya Hamati nko yakamunlliiwa mullatwaaye.

⁶ Vano mwene a o Babiloni aawiipha anamwani aallopwana attheene a Zedekiya o Ribula Zedekiyooyo oonaka. Mwene a o Babiloni aaddiiphattho enduna ddittheddene dda o Yuda.

⁷ Vano yaamukhumihamo miittho Zedekiya, emmaka ni onyolo emuyaana o Babiloni.

⁸ Ababiloni yaahella munllo enyumba yoomwene, enyumba ya Apwiya ni enyumba ddimodda ddittheddene nave yaakumulla mpanda muttheene wa Yerusalemu.

⁹ Voomallihellani Nebuzaradani, muullupalli a alonda akhoto ahaapharella wuukaporoni o Babiloni athu attheene oohalla m'muzindani ni ayo yiivelleelle wa olliye.

¹⁰ Nebuzaradani, muullupalli a alonda akhoto, aahiyalle athu oohoowesesave ni oohikhalla ni erive ello mu ellapo ya o Yuda. Nave ahaavaha emata ddampesa ni emata ddimoddattho.

Ottaphulliwa wa Yeremiya

¹¹ Nebukadinezara, mwene a o Babiloni, aarumiha mawu wa Nebuzaradani muullupalli a alonda akhoto oollota dda Yeremiya wi,

¹² “Mukuse, omuwehere phaama nave ohimukatamihe koma omweerelle ddoopaalla ddaye.”

¹³ Sika Nebuzaradani, oohoollella a akhotoolle, aatimulla vamodda ni Nebushazibani oohoollella muullupalli ni Neregali Sarezere oolamulella mulloko mmodda weekhoto ni enduna ddittheddene dda mwene a o Babiloni.

¹⁴ Nave yaamukusawo Yeremiya o nthato na alonda emuvelleella wa Gedaliya mwaana a Ahikamu, edduullu ya Shafani wi amuttaphulle ni omurumiha owaniwa. Sika Yeremiya aakhalla va abalaaye.

Ovulluwa wa Ebedemeleki

¹⁵ Mawu a Apwiya yaawa wa Yeremiya aariiye mundende o nthato na alonda wi,

¹⁶ Khawe wamulleelle Ebedemeleki Mukushi wi Apwiya Amasiva Mattheene, Mulluku a Israele anallota wi, “Ngoonani, ddineereweereya nnddo kallotilleemi dda muzindoolla vawi ddinaakhalle ddoonanara ohiri ddaphaama. Ddineereweereya va enthawiiwa, weyaano woonaka.

¹⁷ Koma weyaano kineerewuuvullusa nllapo nenno nave khovelleelliwa wa athu oyo onawooveewe.

¹⁸ Kineerewuuvullusa nave khawiiphiwa ni ekhoto. Oneerokhalla ni okumaawo wonanko yawaakha okhotoni kaambiiwa wookiroromella. Mi Apwiya koollota.”