Yeremiya 38 - Mawu a Mulluku

Yeremiya anavokhelliwa mu ehime yamatokwi

¹ Vano Shefatiya mwaana a Matani, Gedaliya mwaana a Pashuri, Yehukala mwaana a Shelemiya ni Pashuri mwaana a Malikiya yahiiwa nnddo Yeremiya aalleelleeye athu ddawi

² Apwiya enallota wi, “Arive muthu oohalla mu muzindoolla aneerokhwa ni ekhoto, ettalla apaalle mullilli. Koma arive muthu aniivelleelle wa Ababiloni aneerokhalla ni okumi nave aneerovullusa okumaaye.

³ Muzindoolla oneerovelleelliwa wa akhoto a mwene a o Babiloni nave eneerowaakha.”

⁴ Vano enduna ddaamulleella mwene wi, “Muthoolla anaphwanella wiiphiwa. Annaatathilliha murima akhoto ni athu attheene oohalla mu muzinda ekaamba ya ddoollota ddaye. Muthu yoolla khanawaashera ddaphaama athu, anapaalla wi yoonongiwe.”

⁵ Mwene Zedekiya ahaakhulla wi, “Tti oollathi ari m'mattani mwanyu, miyaano nginna ello yawuuvaanyihani.”

⁶ Sika yaamuvokhella Yeremiya mu ehime ya Malikiya mwaana a mwene, munthatoni na alonda nave yamukittiheremo ni mikwe. Mwiihimenimmo khemwaari maaddi koma matokwive wawi Yeremiya aatora.

⁷ Vano Ebedemeleki, Mukushi mmodda oohulliwa,* mullupa mutteko o enyumba yoomwene, ahiiwa wi Yeremiya aamuvokhella mwiihimeni. Enthawi yeeyo mwene ari o mullako wa Benjamini.

⁸ Sika Abedemeleki aaya o enyumba yoomwene mwene allota wi,

⁹ “Amwene apwiyaaka, athwaalla yoomweerella ddoonanara wunchichi namallotella Yeremiya. Aamuvokhella mwiihimeni nave vawi buledi oomalla mu muzinda anaakhwelle mwemmo ni ettalla.”

¹⁰ Vano mwene aamulamula Ebedemeleki Mukushi wi, “Akuse athu 30 wi mwamukhumihe namallotella Yeremiya ahinakhwe.”

¹¹ Sika Ebedemeleki aaya ni athwaayo enyumba yoomwene akusa matapwata mu echipinda ya ddoowara. Matapwataayo ahaakitthihella ni mikwe mwiihimeni mmo mwaari Yeremiya.

¹² Ebedemeleki Mukushi aamulleella Yeremiya wi, “Hiyani matapwataalla mukaphwani mwanyu wi mikwe ddihuuvoreyeni.” Yeremiya aheera ddennddo.

¹³ Vano yaamukhumihella otte ni mikwe nave Yeremiya aaya akhallattho o nthato na alonda.

Zedekiya anaveka ezeru wa Yeremiya

¹⁴ Nllapo nimodda Zedekiya aamwiithana namallotella Yeremiya amwaakhellella va mullako waneeraru wa o enyumba ya Apwiya. Aamulleella wi, “Kinapaalla kuukohe ello, ohinakivitthella.”

¹⁵ Yeremiya ahaakhulla wi, “Kuulleellani moohikayika naari vang'ono munimakiipha vawi naari kuulangizeni khamwiiwellella.”

¹⁶ Vakhwipi mwene Zedekiya aallupella vamiitthoni va Yeremiya wi, “Vamiitthoni va Mulluku Ookumi oyo anivahille okumi, miyaano ngiwiipha apaalle wuuvelleella m'mattani mwa athu alla enapaalla owiipha.”

¹⁷ Vano Yeremiya aamulleella Zedekiya wi, “Apwiya Amasiva Mattheene, Mulluku a Israele, eni, ‘Mwiivelleella wa enduna dda mwene a o Babiloni muneerokhalla ni okumi nave muzindoolla khewuhella munllo navettho nyu ni nibanja nanyu muneerokhalla ni okumi.

¹⁸ Koma mwaahiivelleella wa enduna dda mwene a o Babiloni, muzindoolla oneerovelleelliwa m'mattani mwa Ababiloni nave eneerowuhella munllo sika khamuvulluwa m'mattani mwiwa.’ ”

¹⁹ Koma mwene Zedekiya aamulleella Yeremiya wi, “Kinawoova Ayuda yathawenlle khalle wa Ababiloni. Kinoova wi Ababiloni ttuukivelleella wa Ayudaayo nave alliwa ttuukihoosa.”

²⁰ Yeremiya ahaakhulla wi, “Iyaayi, kheyuuvelleellani. Mwiiwellella mawu a Apwiya, kinuulleellani wi ddeko ddittheddene ddineeroweetellani phaama nave muneerokhalla ni okumi.

²¹ Koma mwakhoota wiivelleella, Apwiya aakoonihella wi

²² atthiyana attheene oohalla mu enyumba yoomwene a o Yuda eneerovelleelliwa wa enduna dda mwene a o Babiloni. Vooyaani o Babiloni, atthiyanaayo eneerekewiipa nchipo nawi, ‘Akhwaawo oororomelleya yahuulleka ni wuugonjiha, meto ddawo ddootora m'matokwini, akhwaawo aahokollweella mutulli.’ ”

²³ Nave kaallotattho wi, “Awarinyu attheene ni aniinyu eneerewaavelleella m'mattani mwa Ababiloni nave khamuwora othawa. Muneerophariwa ni mwene a o Babiloni, vatulli viwa muzindoolla oneerohelliwa munllo.”

²⁴ Sika Zedekiya aamulleella Yeremiya wi, “Ohimulleelle arive muthu ddenndda woova wi oniiphiwe.

²⁵ Attekweene yiiwa wi koollota ni weyaano, eneerewuukoha wi, ‘Wamulleelle tini mwene? Ohinaddivittha wa hiyaano vawi kheniwiipha. Mwene uulleelle tini?’ ”

²⁶ Alleelle wi weyaano waaveka wa mwene wi ohokolloselliwe o enyumba ya Yonatani wi wakhwelle wenko.

²⁷ Ddawoona, attekweene attheene yaawa wa Yeremiya wi amukohe. Olliye aawaakhulla wonanko mmo mwene amulleellelleeye. Sika yaahiya omukoha ekaamba yawi khaavo iiwalle ddookambiranannddo.

²⁸ Vano Yeremiya aakhallave mu nthato na alonda ophiyera nllapo nno muzinda wa Yerusalemu wagonjihiwiiwa.