Yeremiya 37 - Mawu a Mulluku

Zedekiya anamuveka Yeremiya

¹ Mwene Nebukadinezara a o Babiloni aamukeraatthiha Zedekiya mwaana a Yosiya va mpando woomwene o Yuda, munipuroni mwa Yehoyakini mwaana a Yehoyakimu.

² Koma Zedekiya, enduna ddaye ni athu attheene a mwiillaponimmo kheyiiwellelle mawu yallotille Apwiya oweella mwa namallotella Yeremiya.

³ Vano mwene Zedekiya aamuruma Yehukala mwaana a Shelemiya ni mullupa mukutho Zefaniya mwaana a Maaseiya wa namallotella wi amulleelle wi, “Munivekelle wa Apwiya Mullukwaahu.”

⁴ Va enthawi yeeyo Yeremiya ahinawallelliwe mundende aari oottaphuwa weeta variyari va athu.

⁵ Akhoto a Ababiloni yaari ewaapheelle muzinda wa Yerusalemu koma yiiwalliiwa wi akhoto a Farao yaallapuwa malire a ellapo ya Iguputo, yaahokollweella mutulli.

⁶ Vano mawu a Apwiya yaawa wa Yeremiya wi,

⁷ “Mi Apwiya Mulluku a Israele, kinallota wi mwene a o Yuda oyo urumme wi okiveke ezeru, wamulleelle wi, ‘Ngoonani, akhoto a Farao ayo yawiille wi yuukavihere, eneerohokollweella owaniwa o Iguputo.

⁸ Vano Ababiloni eneerohokollowa wi ehelle ekhoto muzindoolla, eneerowugonjiha navettho eneerowuuhella munllo.’

⁹ Mi Apwiya kinuuchenjezani wi muhiillekeke vooganizani wi Ababiloni eneerovenyawo ni wuuhiyani vawi khevenyawo.

¹⁰ Naari mwagonjihalle Ababiloni attheene ayo munawaneenyuna ekhoto naarittho mwa alliwa muhanlle oophoreyave m'misasani ddiwa, alliwaayo eneerotthupulluwa ni owuhella munllo muzindaanyu.”

Ophariwa ni ohiyiwa mu endende wa Yeremiya

¹¹ Akhoto a Ababiloni yaahiya ohella ekhoto muzinda wa Yerusalemu kaambiiwa yawoova akhoto wa Farao.

¹² Yeremiya aatimulla ovenyera o Yerusalemu oya o ellapo ya Benjamini wi aakhelle yoohallanaaye ya emata dda makhollwaaye.

¹³ Aphiyalleeye va mullako wa Benjamini, mulonda mmodda nnddina naye Iriya mwaana a Shelemiya mwaana a Hananiya, aamuphara Yeremiya nave allota wi, “Wethi onathawella wa Ababiloni!”

¹⁴ Yeremiya ahaakhulla wi, “Khe ddiiddo, miyaano nginathawella wa Ababiloni!” Koma Iriya khaamwiiwellenlle Yeremiya nave aamuphara amuyana wa enduna.

¹⁵ Endunanndde ddaamushella murima Yeremiya nave ddaamuukutha, ddimuwallella mu enyumba ya namalembella Yonatani eyo yayitthattunsiiwa endende.

¹⁶ Yeremiya aahiyiwa mu endende yavatthi va ethaya mmo akhanlleeyemo enthawi yoorekama.

¹⁷ Nllapo nimodda Zedekiya ahaaruma athu wi yamwiithane Yeremiya nave mwenooyo aamwaakhella. Vano mwenooyo aamukohella vakhwipi mpa mwaye wi, “Ethiyo vookhalla mawu ayo Apwiya yuulleelliiwa?” Yeremiya ahaakhulla wi, “Ee, yookhallavo. Nyu amwene muneerovelleelliwa m'mattani mwa mwene a o Babiloni.”

¹⁸ Nave aamukoha mwene Zedekiya wi, “Ethiyo kuulakwenlleni tini nyuwaano, enduna ddanyu apaalle athwaanyu wi mukihiye mu endende?

¹⁹ Ethiyo eri wuuwi anamallotellaanyu alle yuullotenlleni wi mwene a o Babiloni khawa uuhellani ekhoto nyuwaano ni ellapwaanyu?

²⁰ Vano kinuuvekani nyu apwiyaaka amwene wi mwiiwe oveka waka. Muhikihokolloselle o enyumba ya namalembella Yonatani woova wi kinaakhwelle wenko.”

²¹ Sika mwene Zedekiya aalamula wi Yeremiya asungiwe o nthato na alonda. Vano yaanamvaha yoocha nllapo ni nllapo, mwitthi mmodda wa buledi ookulliwa wa athu oomwaapeya buledi, ophiyera buledi muttheene mwiillaponimmo aamalla. Sika Yeremiya aavirellella okhalla munthatoni na alonda.