Yeremiya 36 - Mawu a Mulluku

Baruki aneerenga nibukhu mu enyumba ya Apwiya

¹ Mawu a Apwiya yaawa wa Yeremiya mu muyakha waneesese wa omwene wa Yehoyakimu mwaana a Yosiya, mwene a o Yuda wi,

² “Kusa nibukhu nave olembevo mawu mattheene ayo killotilleemi ni weyaano dda Israele ni Yuda ni dda mitundu ddittheddene dda athu ovenyera nllapo kallotilleemi ni weyaano enthawi ya Yosiya ophiyera ollello.

³ Apaalle nibanja na Yuda ttuuwiiwa dda ddawoopiha ddittheddene nnddo kinaamorihelleemi. Sika arive muthu aneerohiya makhallellwaaye oonanara. Vano kineerewaakhululukella ddoonanara ddiwa ni machimwiiwa.”

⁴ Vano Yeremiya aamwiithana Baruki mwaana a Neriya. Baruki aalemba munibukhunimmo mawu mattheene ayo Yeremiya amulleelleeye, mawu mattheene ayo Apwiya yallotilliiwa ni Yeremiya.

⁵ Aamulleella Baruki wi, “Mi aakikhootiha ovollowa mu enyumba ya Apwiya.

⁶ Sika vano onaayeewo tti weyaano munipuroni mwaka, va nllapo noohalla ocha,* weerenge mawu a Apwiya ayo kuulembihalleemi mu nibukhummu athu attheene yiiwaka. Weerenge vamiitthoni va athu attheene a o Yuda oovenyera o mizinda ddiwa.

⁷ Apaalle ttuuvekella wa Apwiya nave arive muthu ttuuhiya makhallellwaaye oonanara kaambiiwa Apwiya ahaashella murima athu yaalla ni owalli wawoopiha.”

⁸ Sika Baruki mwaana a Neriya aheera ddittheddene namallotella Yeremiya amulleelleeye. Aheerenga mawu a Apwiya oolembiwa munibukhunaalle mu enyumba ya Apwiya.

⁹ Va mweeri waneetthanu ni sese wa muyakha waneetthanu wa omwene wa Yehoyakimu mwaana a Yosiya mwene a o Yuda, athu attheene a o Yerusalemu ni attheene yavenyenre o mizinda dda Yuda yahiiwanana dda ohalla ocha wi yaapepese Apwiya.

¹⁰ Vano attheene evollowille mu enyumba ya Apwiya, Baruki aheerenga mawu a Apwiya oolembiwa munibukhuninne athu attheene yiiwaka. Aheerenga mu echipinda ya Gemariya mwaana a namalembella Shafani eyo yaari mu nthato navaddullu, vakhuviru ni Mullako Wanaanweene woovollowella o enyumba ya Apwiya.

Weerengiwa wa nibukhu vamiitthoni va enduna

¹¹ Mikaya mwaana a Gemariya, mwaana a Shafani, iiwalleeye mawu mattheene a Apwiya oolembiwa munibukhuninne,

¹² aaya o enyumba yoomwene, avollowa mu echipinda ya namalembella. Enduna ddittheddene ddaari dditthukumanne mwemmo. Namalembella Elishama, Delaya mwaana a Shemaya, Elinatani mwaana Akibori, Gemariya mwaana a Shafani, Zedekiya mwaana a Hananiya vamodda ni enduna ddimodda ddittheddene.

¹³ Vano Mikaya ahaalleella mawu mattheene iiwalleeye mvo Baruki eerengeeye nibukhu athu yiiwaka.

¹⁴ Sika enduna ddaamuruma Yehudi mwaana a Netaniya mwaana a Shelemiya mwaana a Kushi wa Baruki wi amulleelle wi aweena nibukhu nno aweerengelleeye athu. Sika Baruki mwaana a Neriya aayaana nibukhunno wa alliwaayo.

¹⁵ Endunannddo ddaallota wi, “Keraatthi mva nave oneerengelle nibukhunna.” Vano Baruki aaweerengella.

¹⁶ Yiiwalle nnddo eerengilleeye, yahaamba owehana mootthukumella ni woova. Vano aamulleella Baruki wi, “Ninaphwanella omulleella mwene mawu mattheenaalla.

¹⁷ Koma onilleelle mmo walembelleewe mawu mattheenaalla. Ethiyo tti Yeremiya uulembihalle ddenndda?”

¹⁸ Baruki ahaakhulla wi, “Ee, Yeremiya sika akilleelle mawu yaalla, miyaano kinalemba ni inki munibukhuni.”

¹⁹ Sika yaamulleella wi, “We ni Yeremiya mwiipitthe, vihikhalle muthu oodduwella nko muriinyu.”

Mwene anoosa nibukhu

²⁰ Vano alliwa yaavollowa mu nthato eya wa mwene ehiyalle nibukhunno mu echipinda ya namalembella Elishama nave yaamulleella mawu mattheenaayo.

²¹ Vano mwene iiwalleeye ddenndda, aamuruma Yehudi wi akuse nibukhunne. Yehudi anikusalle o echipinda ya Elishama aamweerengella mwene ni enduna ddittheddene ddatthukumannennddo.

²² Olla waari mweeri waneetthanu ni sese nave mwene aari mu enyumba ya va enthawi yooriirya, oothaka munllo oyo waviiddeelliwa ekaamba ya oriirya.

²³ Yehudi eerenga mapeji mararu apaalle masese a nibukhunno, mwene anaphara ni owaahulla ni mpeni nave aavokhella viikho woottotthowa. Aavirellella weera ddenndda ophiyera nibukhu nittheene nishille ni munllo.

²⁴ Komave naari mwene apaalle mmodda a enduna ddaye yiiwalle mawaalla, khaavo ooville apaalle waahulla ddoowara ddaye.

²⁵ Nave naari Elinatani, Delaya ni Gemariya yamvekille mwene wi ahoose nibukhunno, olliye khaawiiwellelle.

²⁶ Vano mwene aamulamula Yerahamele mwaana a mwene, Seraya mwaana a Aziriele ni Shelemiya mwaana a Abideele wi yamphare namalembella Baruki ni namallotella Yeremiya. Koma Apwiya yaawiipittiha.

Yeremiya analemba nibukhu nimodda

²⁷ Vano mwene oosille nibukhu nno mwaari ddittheddene Yeremiya amulembihalleeye Baruki, mawu a Apwiya yaawa wa Yeremiya wi,

²⁸ “Kusa nibukhu nimodda olembemo mawu mattheene yaari mu nibukhu nawaamba nne noosiwe ni Yehoyakimu mwene a o Yuda.

²⁹ Vano omulleelle mwene Yehoyakimu a o Yuda wi, Apwiya enallota wi wahoosa nibukhunne voollotani wi, ‘Kaambiiwa tini olembilleewe wi mwene a o Babiloni aneerewoononga ellapweella, athu ni enama ddene?’

³⁰ Sika dda Yehoyakimu mwene a o Yuda Apwiya enallota wi khaviwa viphwanyeyattho mmodda oovollowa munipuroni mwaye va mpando wa omwene wa Davide. Akhwa mutembwaaye otthaana onaakhalle vanndduwani nave mahiiyu onaakhalle vanakhuttuni.

³¹ Kineeromullaka ni edduullu ddaye vamoddattho ni enduna ekaamba ya ddoonanara ddiwa. Kineerewaamorihella alliwa ni athu attheene a o Yerusalemu ni a o Yuda ddawoopiha ddittheddene kallotilleemi kaambiiwa kheyiiwellelle mawaaka.”

³² Vano Yeremiya aakusa nibukhu nimodda amwinnya namalembella Baruki mwaana a Neriya amulembiha mawu mattheene a mu nibukhu nne Yehoyakimu mwene a o Yuda anoosilleeye nave ahoonjereravo mawu mamodda oophwanaphwanana.