Yeremiya 35 - Mawu a Mulluku

Niphwanaphwaniho na ororomelleya wa Arekabu

¹ Va enthawi eyo Yehoyakimu mwaana a Yosiya aariiye mwene a o Yuda, mawu a Apwiya yaawa wa Yeremiya wi,

² “Khawe o nibanja na Arekabu, wawiithane athu a wenko wi ewe mu echipinda emodda ya enyumba ya Apwiya. Yaphiya waavahe vinyo wi emuwirye.”

³ Sika kaawa ni Yazaniya mwaana a Yeremiya mwaana a Habaziniya ni abalaaye vamoddattho ni anaaye attheene aallopwana, sika wi nibanja nittheene na Arekabu.

⁴ Kaawaana o enyumba ya Apwiya, o echipinda ya oohuddera a Hanani mwaana a Igadaliya, muthu oomwiiwellella Mulluku. Echipinda yeella yaari vakhuviru ni echipinda ya enduna, vaddullu va echipinda ya Maaseiya mwaana a Shalumu, mulonda a vamullakoni.

⁵ Vano kaahiya mino ddooddalla ni vinyo ni makapu oowiryella vamiitthoni va Arekabu nave kahaalleella wi, “Muwiryeni vinyo.”

⁶ Koma alliwa yahaakhulla wi, “Hi khannamuwirya vinyo vawi nikhollo nahu Yonadabu mwaana a Rekabu aanilamula wi, ‘Muhiwe mumuwirya vinyo, nyuwaano ni aniinyu wa enthawi yoohimalla.

⁷ Muhiwe mumaka enyumba apaalle omidda mmiddo apaalle ollima emata ddampesa. Ddeko ddenndda muhiwe mukhallana. Munipuroni mwene, mukhalleke m'misasani mu okumaanyu muttheene wi mukhalle enthawi yoorekama mu ellapo munakhalleenyumo.’

⁸ Nohiiwellella lamulo na nikhollo nahu Yonadabu mwaana a Rekabu nave mu okumaahu muttheene khaninamuwiryeke vinyo, hiyaano apaalle awarihu, aniihu aallopwana ni aatthiyana.

⁹ Kheninamakeke enyumba wi nikhallekemo apaalle ollima emata yampesa apaalle erive emata

¹⁰ koma ninakhalla m'misasani. Sika nohiiwellella ni osunga lamulo na nikhollo nahu Yonadabu.

¹¹ Koma enthawi elle Nebukadinezara mwene a o Babiloni ahenlleeye ekhoto ellapweella, naallota wi, ‘Hankoni nitthaamelle o Yerusalemu wi nithawe milloko ddakhoto dda Ababiloni ni dda Asiriya.’ Sika ekaambiiwa ninakhalleehu o Yerusalemu wuno.”

¹² Vano Apwiya Amasiva Mattheene, Mulluku a Israele, yaamulleella Yeremiya wi

¹³ allote wa athu a o Yuda ni Yerusalemu wi, “Mi Apwiya Amasiva Mattheene kinuukohani wi ethiyo kaambiiwa tini muhinaakhullelleenyu ohumullulliwa ni wiiwa mawaaka?

¹⁴ Lamulo na Yonadabu mwaana a Rekabu nno alamunleeye edduullu ddaye wi ehiwe emuwirya vinyo, alliwa aanisunga. Khenamuwirya vinyo ophiyera ollello ekaamba yawiiwellella lamulo na nikhollo niwa. Kookhalla kuuchenjezakani wiilliwiilli koma nyu khemunakiiwellella.

¹⁵ Kahaaruma wiilliwiilli amurummwaaka anamallotella wi yuulleelleni wi, ‘Arive muthu mwa nyuwaano ahiye mitteko ddaye ddoonanara. Mupotokose makhallellwaanyu nave muhiye othwara milluku ddimodda, muhiddillapelleke. Sika muneerokhalla mu ellapo eyo kuuvahilleemini nyuwaano ni makhollwaanyu.’ Koma nyu khamwaapwathillewo, khamwaakiiwellelle.

¹⁶ Anamwani a Yonadabu mwaana a Rekabu, yahiiwellella lamulo nno nikhollo niwa nawinnyalliiwa koma nyu khemwaakiiwellelle.

¹⁷ Sika mi Apwiya Amasiva Mattheene, Mulluku a Israele, kineerowoononga ni athu attheene a o Yuda ni a o Yerusalemu kaambiiwa kheyaakiiwellelle kaalleelleemi, kheyaakaakhunlle kawiithanilleemi.”

¹⁸ Yeremiya ahaalleella Arekabu mawu a Apwiya Amasiva Mattheene, Mulluku a Israele, awi, “Ekaamba yawi mwahiiwellella lamulo na Yonadabu nikhollo nanyu nave mwaathwara malangizwaaye ni weera ddittheddene uulleelleeyeni

¹⁹ vano mi Apwiya Amasiva Mattheene, Mulluku a Israele, kinnallota wi, ‘Yonadabu mwaana a Rekabu khawa arama edduullu yookirumeyella wa enthawi yoohimalla.’ ”