Yeremiya 34 - Mawu a Mulluku

Ochenjeziwa wa Zedekiya

¹ Mawu a Apwiya yaawa wa Yeremiya mvo Nebukadinezara mwene a o Babiloni ni mullokwaaye wakhoto, moomwene mattheene a va ellapo yavatthi ayo aalamuleeye ni athu a mitundu ddittheddene yamuhenlliiwa ekhoto Yerusalemu ni mizinda ddaye ddawaapheella.

² Apwiya Mulluku a Israele, yaamulleella Yeremiya wi, “Khawe wamulleelle Zedekiya mwene a o Yuda wi Apwiya enallota wi muzindoolla kineerowuvelleella wa mwene a o Babiloni nave aneerowoosa.

³ Ddawoona, weyaano khovulluwa m'mattani mwaye vawi oneerophariwa nave oneerovelleelliwa wa olliye. Oneeromoona vamiitthoni ni vamiitthoni nave oneerollotana ni oyiiwana o Babiloni.

⁴ We Zedekiya, mwene a o Yuda, iwa lonjezo na Apwiya vawi weyaano khokhwella okhotoni

⁵ koma onaakhwe mwamurendelle. Nave valle athu yooseewavo lubani* voovitthani maliro a makhollwaawo akhalle ayo yaari mamwene weyaano ohinavollowe omwene, vano weyaanottho voovitthani malirwaawo eneerowoosattho lubani. Voowiipellani nchipo namaliro eneereke wi, ‘Ddeethakaraka! Apwiihu aakhwa!’ Mi Apwiya koollota.”

⁶ Vano ddittheddenenndda namallotella Yeremiya aaya amulleella Zedekiya mwene a o Yuda, o Yerusalemu.

⁷ Enthawi yeeyo sika mulloko wakhoto wa mwene a o Babiloni waari ohellaka ekhoto Yerusalemu ni mizinda ddoohalla dda o Yuda, Lakishi ni Azeka.

Waahoosa akaporo

⁸ Mawu a Apwiya yaawa wa Yeremiya enthawi eyo mwene Zedekiya iiwananneeye ni athu attheene a o Yerusalemu wi yaattaphulle akaporwiiwa.

⁹ Attheene ayo yaari ni akaporo a Aheberi, aallopwana apaalle aatthiyana yaattaphulle. Kheyaaphwanella omusunga mu okaporo Muheberi mukhwiiwa.

¹⁰ Attekweene attheene ni athu shisha, yahiiwanana wi yaattaphulle akaporo ni wi ehaasungettho mu okaporo. Ddawoona, ddenndda ddaheereya nave yahaattaphulla.

¹¹ Koma vatulli viwa yaarukunuwa maganizo wawi allopwana ni atthiyana yaattaphunlliiwaalle, yahaapharattho okaporo.

¹² Vano mawu a Apwiya yaawa wa Yeremiya wi

¹³ allalleye wa athu mawu a Apwiya awi, “Kaakeraatthiha echipangano ni makhollwaanyu va nllapo nne kaakhumihalleemi o ellapo ya Iguputo o enyumba yookaporo.

¹⁴ Echipanganweeyo yaari yawi miyakha mitthanu ni miilli ddamalla, arive muthu mwa nyuwaano amuttaphulle mu okaporo arive Muheberi oyo iikullihalle wa nyuwaano aphara mutteko miyakha mitthanu ni mmodda. Koma makhollwaanyu kheyaakiiwellelle nave kheyapwathillewo naari vang'ono.

¹⁵ Komave mallapo evirallaayo mwaalapa nave mwahaamba weera nnddo kinapaalleemi. Attheene mwahiiwanana ddawaattaphulla akhwiinyu nave mwaalonjeza weera ddenndda mu enyumba eyo enadduwelliwa ni nnddina naka.

¹⁶ Koma vatulli viwa mwaarukunuwattho maganizo nave moonanariha nnddina naka. Attheenenyu mwahaapharattho okaporo athu mwaattaphunlleenywaalle.”

¹⁷ Sika vano Apwiya enallota wi, “Nyu khamukiiwellelle, khamullalleyille murendelle wi mwaattaphulle abalaanyu ni akhwiinyu. Ddaphaama! Vano mi kineerewuullalleyellanittho dda murendelle, murendelleene wookhwa ni nsupada, mullilli apaalle ettalla. Kineerewuutthattusani ello yawoopiha wa athu a moomwene a va ellapo yavatthi.

¹⁸ Khamwaasungalle echipangano eyo mwakeraatthihalleenyu ni miyaano nave khamwaasungalle lonjezano nno mweerilleenyu vamiitthoni vaka. Vano kineerewuutthattusani wonanko musaanaang'ombe olle yamuphaddilliiwa veelli nave enavira variyari va ezigawonnddo.

¹⁹ Ayo yavira variyari va ezigawo piillinnddo yaari attekweene a o Yuda ni a o Yerusalemu, oohoollella, allupa mukutho navettho athu a mwiillaponimmo.

²⁰ Attheenaayo kineerewaavelleella wa adaniiwa ni wa ayo enapaalla owiipha. Nave mitembo ddiwa ddinaakhalle yoocha ya epallame ni enama ddamuhakani.

²¹ Kineeromvelleella Zedekiya, mwene a o Yuda ni enduna ddaye wa adaniiwa ayo enapaalla owiipha. Olla sika mulloko wa mwene a o Babiloni oyo va enthawi yeella ohiyalle wuuhellani ekhoto.

²² Koma kineerewaalamula nave kineerewaahokollosellattho o muzinda yoolla. Eneerowuuhella ekhoto ni owaakha nave eneerowoosa ni munllo. Sika mizinda dda Yuda kineerodditthattusa ntepe, moohikhalla athu. Mi Apwiya koollota.”