Yeremiya 33 - Mawu a Mulluku

Lonjezo nimodda nootiyerella

¹ Mawu a Apwiya yaawa waneepiilli wa Yeremiya awallelliweve mu nthato na alonda a mwene wi,

² “Apwiya ayo yaphatusalle ellapo yavatthi, eyoopa ni oyikeraatthiha, ayo nnddina niwa tti Apwiya eni,

³ ‘Kiithane miyaano nave kineerowaakhulla. Kineerewuulleella ddoovittheya dduullupalli nnddo ohinaddidduwelleewe.

⁴ Apwiya Mulluku a Israele enallota dda enyumba dda muzindoolla ni dda mamwene a o Yuda nnddo athu yaddikumunlliiwa wi emake ddooteteza muzindooyo enthawi ya ekhoto.

⁵ Ababiloni enimawa wi ehelle ekhoto nave enyumba ddiwa ddineeroddalla ni mitembo dda athu ayo kawiiphalleemi moowalli ni moosha murima. Muzinda yoolla koowureya etulli ekaamba ya ddoonanara dda athwiiwa.

⁶ Koma muhoollo, muzindoolla kineerowuvaha okumi nave athwiiwa kineerewaachiriha ni waavaha ddaphaama ddawaata ni murendelle wawoona.

⁷ Athu a o Yuda ni a o Israele kineerewaahiya vaphaama ni waahokollosella mmo yakhallelliiwa vawaamba.

⁸ Kineeroweelliha voovenyihani machimwiiwa mattheene. Kineerewaakhululukella ddoonanara ddiwa ddittheddene nnddo yeerilliiwa vookiwukilani.

⁹ Muzinda yoolla oneerovuwiha epillaaka yaphaama nave oneerokivaha ehakallallo, othokoza ni olemu vamiitthoni va athu a mitundu ddittheddene vawiiwani ddaphaama ddittheddene nnddo keerelleemi muzindoolla. Nave eneerewoova ni otthukumella vawoonani wi koowudalisa ni eyuuma yooheerengeya.’ ”

¹⁰ Apwiya enallota wi, “Athu enallota wi nipuronna tti ntepe noohikhalla ni athu naari enama. Komave m'mizindani dda Yuda ni m'misewuni dda Yerusalemu mmo vano muri ellapo tuu, moohikhalla muthu naari enama,

¹¹ muneerewiiweya mawu oohakallalla ni oothapella, mawu a ootthella ni ootthelliwa. Mu enyumba ya Apwiya muneerewiiweyattho nchipo na athu oovelleella mikutho ddawaathokoza wi, ‘Athokozeni Apwiya Amasiva Mattheene vawi alliwa tti aphaama echikondiiwa tti yoohisintheya.’ “Kineerewaahokollosella ddaphaama ddiwa wonanko vawaamba. Mi Apwiya koollota.”

¹² Apwiya Amasiva Mattheene yaallota wi, “Mu ellapo yantepeella, yoohikhalla ni athu naari enama ni o mizinda ddiwa ddittheddene oneerokhallattho mapuro oochihellawo enama nko abusa enaachihekiiwawo eziweto ddiwa.

¹³ O mizinda dda omiyaangoni, dda omataponi, dda omwera, dda o echigawo ya Benjamini, dda o echigawo yawaapheella Yerusalemu ni o mizinda dda Yuda enkhosa ddineeroyattho vamiitthoni va muthu ooddeerengella. Mi Apwiya koollota.”

¹⁴ Apwiya enallotattho wi, “Ngoonani, enthawi enimawa mvo kinaakwakhwaniheemi nnddo kaalonjezilleemi athwaaka a o Israele ni a o Yuda.

¹⁵ Mallapo yaayo navettho va enthawi yeeyo, kineeromuphuwihella Davide enthambi yoolungama oyo aneere ddaphaama ni ddoolungama mu ellapo ettheene.

¹⁶ Enthawi yeeyo Yuda aneerovulluwa nave Yerusalemu aneerokhalla vamurendelleni. Sika muzindooyo onaaromolliweke wi, ‘Apwiya sika echilungamwaahu.’

¹⁷ Ddawoona, miyaano Apwiya kinalonjeza wi Davide khawa arama edduullu yoovollowa munipuroni mwaye va mpandwaaye woomwene wa Israele.

¹⁸ Allupa mukutho Aalevi khewa eramiwa muthu oowa wa miyaano enthawi ddittheddene ovelleella mikutho ddooshellelliha, ddoocha ni ddimoddattho wa enthawi yoohimalla.”

¹⁹ Mawu a Apwiya yaawa wa Yeremiya wi,

²⁰ “Mi kookeraatthiha echipangano ni otthaana ni mahiiyu vawi piillinndda ddinaphiya va enthawiiwa nave echipanganweeyo khewa etathilliwa.

²¹ Emoddamoddave yeeyo, kaakeraatthiha echipangano ni Davide, oorumeyellaaka wi enthawi ddittheddene kharamaka edduullu yookhalla va mpando woomwene. Kaakeraatthihattho echipangano emodda ni allupa mukutho Aalevi wi ekirumeyelleke wa enthawi ddittheddene. Nave echipangano ddenndda kheddiwa dditathilliwa.

²² Kineeroddiruuwiha edduullu dda oorumeyellaaka Davide ni oorumeyellaaka allupa mukutho Aalevi nave enaate wonanko etheneeri ddooddullu apaalle muhava wa mukhwipi mwa enyanja.”

²³ Apwiya yaamukoha Yeremiya wi, “Ethiyo khewiiwalle mmo athu amodda yallotelliiwa

²⁴ wi, ‘Apwiya ahaakhoota mabanja meellaalle yaatthoollilliiwa?’ Sika athwaayo enanyaambusa mullokwaaka oohiweesattho wonanko mutundu wa athu.

²⁵ Koma mi Apwiya kaakeraatthiha echipangano ni otthaana ni mahiiyu. Kaakeratthihattho malamulo aweetihella ddittheddene dda va ellapo yavatthi ni ddamuddullu.

²⁶ Vano wonanko mmo keerelleemi ddenndda moosimikiza, kineerosunga echipangano eyo kakeraatthihalleemi ni edduullu dda Yakobo ni Davide, oorumeyellaaka. Kineeromutthoolla mmodda mwa edduullu dda Davide wi alamulelleke edduullu dda Abrahamu, Isaki ni Yakobo. Vano kineerewaamorella ethakaraka ni waahokollosellattho ddaphaama.”