Yeremiya 32 - Mawu a Mulluku

Yeremiya anakulla emata

¹ Mawu a Apwiya yaawa wa Yeremiya muyakha waneekhumi wa omwene wa Zedekiya a o Yuda, muyakha wa 18 wa omwene wa Nebukadinezara.

² Va enthawi yeeyo akhoto a mwene a o Babiloni yaamwaapheella Yerusalemu ni misasa ddakhoto. Namallotella Yeremiya aari awallelliwe mu nthato na alonda, muwari mwa enyumba yoomwene ya o Yuda.

³ Zedekiya mwene a o Yuda sika amuwallenlle mwemmo. Mwenooyo aamukoha Yeremiya wi, “Ethiyo kaambiiwa tini onallotelleewe ddawi Apwiya enallota wi, ‘Muzindoolla kineerowuvelleella wa mwene a o Babiloni nave aneerowaakha.

⁴ Ddawoona, Zedekiya mwene a o Yuda khavulluwa wa Ababiloni koma aneerovelleelliwa wa mwene a o Babiloni, sika aneerewoonana vamiitthoni ni vamiitthoni nave aneerollotana.

⁵ Zedekiya aneerophariwa oya o Babiloni nave aneerokhalla wenko ophiyera kimuupuwenlle. Naari awanena mwawiidde Ababilonaayo, khapambana.’ ”

⁶ Nave Yeremiya aallota wi, “Mawu a Apwiya yaawa ni miyaano wi

⁷ Hanamele mwaana a Shalumu, apwiyaaka, enaaka ekoone nave ekilleella wi, ‘Kulla emataaka ya o Anatoti vawi weyaano sika oophwanella oyoopolla.’

⁸ Wonanko mmo Apwiya yallotelliiwa, Hanamele musuwanaaka aakaaryeryella o nthato na alonda. Olliye aallota wi, ‘Kulla emataaka o Anatoti mu ellapo ya Benjamini vawi weyaano sika oophwanella wi woopolle wi ekhalle yoohallanaawo. Sika kaadduwella wi olla tti othenga wa Apwiya.

⁹ Sika kaakulla emateeyo o Anatoti wa Hanamele musuwanaaka va mutengo wa makobiri a siliva 17.’

¹⁰ Kaamusayina kalata, kimmarella vamiitthoni va amboni nave kaalinga makobiri va sikelo.

¹¹ Vatulli viwa kaakusa makalataaka, mmodda oomarella mmo mwaari mawu mattheene ni mmodda oohimarella.

¹² Makalataayo kahaavelleella wa Baruki mwaana a Neriya, edduullu ya Maaseiya, vamiitthoni va Hanamele musuwanaaka ni va amboni ayo yasayinellena makalataayo vamiitthoni va Ayuda attheene ookhalla mu nthato na alonda.

¹³ Vamiitthoni va attheenaayo kaamulleella Baruki wi,

¹⁴ ‘Apwiya Amasiva Mattheene, Mulluku a Israele, aalamula wi weyaano okuse makalataalla, oomarella ni oohimarella, waasunge mwiipallini wi ekhalle enthawi yoorekama.

¹⁵ Apwiya Amasiva Mattheene, Mulluku a Israele, ellotille wi eneerophiya enthawi mvo athu enaakullekiiwa enyumba, emata ni miteekho ddampesa mu ellapo yeella.’ ”

Ovekella wa Yeremiya

¹⁶ Kimwinnyalle Baruki mwaana a Neriya, makalataalle, kahaamba ovekella wa Apwiya wi,

¹⁷ “Ha! Nyu Apwiya Mulluku! Nyu sika mwaphatusalle ellapo yavatthi ni eddullu ni masivaayu muullupalli ni muwonwaanyu weekophollo nave kheyiivo muhinaworeenyu weera.

¹⁸ Munnooniha echikondaanyu yoohisintheya wa athu ooheerengeya koma munnaallaka anamwani ekaamba ya machimo a makhollwiiwa. Nyu Mulluku muullupalli muri amasiva, nnddina nanyu tti Apwiya Amasiva Mattheene.

¹⁹ Ddoolinga ddanyu tti dduullupalli nave mitteko ddanyu tti ddamasiva. Miitthwaanyu ennoona ddaweera ddittheddene dda athu nave munnamullivella arive muthu moollikana ni mitteko ddaye.

²⁰ Nyuwaano mwaheera ezizindikiro ddoottikhiniha ni mitteko ddoorurumusa o Iguputo. Nave munnaddeera ophiyera ollello, variyari va Aisraele navettho va athu attheene. Sika moovuwiha nnddina nanyu ophiyera ollello.

²¹ Ni nnatta nanyu namasiva muullupalli ni muwonwaanyu weekophollo mwahaakhumiha athwaanyu Aisraele o Iguputo vaweerani echizindikiro ni ddoottikhiniha nnddo ddawoopihalle adanaahu.

²² Mwahaavaha ellapo ella yamukaka ni enwi mwaalonjezilleenyu moollupella makhollwiiwa.

²³ Koma yaavollowilliiwa mwiillaponimmu ni waakha wi ekhalla yayiwayayiwa, yaakhoota owiiwellellani apaalle othwara malamulwaanyu. Yaakhoota weera nnddo mwaalamulalleenyu. Sika ekaamba ya yeella, mohaamorihella ddoohoosa ddittheddenenndda.

²⁴ “Ngoonani, adani ahaapheella muzindoolla wi ewaakhe. Muzinda olla oneerovelleelliwa wa Ababiloni ofookille ni ekhoto, ettalla ni mullilli. Ddawoona, mwalloteenyunndde ddoheereya wonanko mmo moonilleenyu nyookha.

²⁵ Komave naari muzindoolla ovelleelliwaka wa Ababiloni, nyu Apwiya Mulluku, mwaakilamula wi kikulle emateelle vamiitthoni va amboni.”

²⁶ Vano mawu a Apwiya yaawa wa Yeremiya wi,

²⁷ “Mi tti Apwiya Mulluku a athu attheene. Ethiyo yookhallavo yoohiworeya ni mi?

²⁸ Sika ekaambiiwa kinalloteemi wi kineerowuvelleella muzindoolla wa Nebukadinezara mwene a o Babiloni nave aneerowaakha.

²⁹ Ababiloni eneerowuuhella ekhoto. Eneerowoosa munllo ni owukumulla makamaka enyumba nnddo athu yakishihereewavo murima vawoosani lubani* wa Baala ni voovelleellavo mikutho dda yoowirya wa milluku ddimodda vaddullu viwa.

³⁰ Athu a o Aisraele ni a o Yuda enneera ddoonanara vamiitthoni vaka ni okishiha murima ni mitteko ddiwa ddoonanara.

³¹ Muzinda yoolla wookishiha murima ni ottatthamulla owallaaka ovenyera enthawi yawumakilliiwa ophiyera ollello. Ekaamba ya yeella, kineerowuvenyihevo vamiitthoni vaka.

³² Athu a o Israele ni Yuda, mamweniiwa, enduna ddiwa, allupa mukuthwiiwa, anamallotelliiwa ni attheene ookhalla o Yerusalemu ni o Yuda, yaakishiha murima ni mitteko ddiwa ddoonanara.

³³ Aakireya etulli naari kavirellelle waahuddiha, kheyiiwalle apaalle waakhullella ohumullulla.

³⁴ Yahiimesa mafanwiiwa oonanara mu enyumba eyo enadduwanyeya ni nnddina naka nave yaayiripiha.

³⁵ Yaamaka nipuro noomullapellamo Baala mu ntapo na Mwaana a Hinomu wi yaavelleelle aniiwa aallopwana ni aatthiyana wonanko mukutho wa Moleki. Khe miyaano kaalamunle ddennddo nave naari vang'ono ngaaganizera wi alliwa ttuuweera ddoonanara ddawi ddiidda ni waachimwiha athu a o Yuda.”

Lonjezo nootiyerella

³⁶ Athu enallota dda muzindoolla wi oneerovelleelliwa wa mwene Nebukadinezara ofookille ni ekhoto, ettalla ni mullilli. Koma Apwiya Mulluku a Israele enallota wi,

³⁷ “Mi kineerewaatthukumaniha athwaalla ovenyera o ellapo ddittheddene kawiikarelleemiwo kishille murima navettho kinanariwalle wunchichi. Kineerewaahokollosellattho o nipuro nenna nave eneerokhalla wuno ni murendelle muttheene.

³⁸ Enaakhalle athwaaka nave miyaano kinaakhalle Mullukwiiwa.

³⁹ Kineerewaavaha murima mmodda ni meetello mamodda wi ekooveke enthawi ddittheddene. Sika alliwa ni aniiwa ddeko ddineerekoweetella phaama.

⁴⁰ Kineerokeraatthiha echipangano yoohimalla ni alliwa nave ngihiya oweerella ddaphaama. Kineerewaavaha murima wookova, mwawi ddiiddo khewa ekihiyattho.

⁴¹ Kineerohakallalla vooweerellani ddaphaama. Nave kineerewaakeraatthiha mu ellapweella moororomelleya ni murimaaka muttheene ni opaalla wake ottheene.

⁴² “Moollikana ni mmo kaamorihelleemi otulli athwaalla, emoddamoddave yeeyottho kineerewaavaha murendelle oyo kaalonjenzeemi.

⁴³ Athu eneerokullattho emata mu ellapo ella eyo nyu muneeseenyu wi tti yoohiyiwa, yoohikhalla ni athu naari enama, kaambiiwa yaavelleelliwa wa Ababiloni.

⁴⁴ Athu eneerokulla emata ni makobiri. Makalata eneerosayiniwa ni omarelliwa nave vineerokhalla omboni o echigawo ya Benjamini, o echigawo yawaapheella Yerusalemu, o mizinda dda o Yuda, dda omiyaangoni, ddootapo ni ddoomwera. Ddawoona, kineerewaahokollosella ddaphaama ddiwa. Mi Apwiya koollota.”