Yeremiya 31 - Mawu a Mulluku

Aisraele enahokollweella owaniwa

¹ Apwiya enallota wi, “Va enthawi yeeyo kineerokhalla Mulluku a mabanja mattheene a Israele nave alliwa eneerokhalla athwaaka.

² Mi Apwiya koollota. Athu ayo yavulluwalle o ekhoto kaaweerella echifundo mu echipululu. Aisraele yapaalliiwa wiithuuwa

³ mi kaawooneyella kiri voorekamella. Nyu Aisraele, kinnuukondani ni echikondi yoohisintheya nave kinnavirellella ni echikondaaka yoohisintheya wa nyuwaano.

⁴ Nyu Aisraele, kineerewuumakanittho wi mukeraattheye. Muneerohakallalla vawiipani asikoma nave muneerothaanana nimodda athu awiina moohakallalla.

⁵ Muneerollimattho emata yampesa va miyaango dda Samariya. Oollima eneerewaalla mpesa nave eneerocha ezipaso ddiwa.

⁶ Enthawi eneerophiya yawi alonda oomiyaangoni dda Efuremu enaakhuwiiwa wi, ‘Hankoni niye o Ziyoni, wa Apwiya Mullukwaahu!’ ”

⁷ Apwiya enallota wi, “Mwiipelleni moohakallalla Yakobo, muwukhuwelle wunchichi mutundu wookhwaranya mitundu ddittheddene. Llalleyani, titimihani wi, ‘Apwiya ahaavullusa athwiiwa, aawoopolla oohalla a Israele.’

⁸ Kineerewaakhumiha ovenyera o ellapo ya ompoto, kineerewaatthukumaniha ovenyera wookomella ellapo yavatthi, oohoona ni oorakalla, atthiyana eerukullu ni a va enthawi yooyara. Onaakhalle mulloko muullupalli wa athu oohokollweella wuno.

⁹ Eneerohokollweella owaniwa yinllaka nave evekellaka, miyaano kaawaahoollellaka mweechifundo. Kineerewahoollella o mihinje ddooddalla ni maaddi, khekwakwatuwa, ettilla ddiwa ddinaakhalle ddoomwaramwareya. Mi tti attiitthinnya a Israele, Efuremu tti mwanaka awaamba.”

¹⁰ Apwiya enallota wi, “Nyu mitundu dda athu ddittheddene, iwani mawu a Apwiya. Llalleyani mawu o ellapo ddawoorekama, dda mukhwipi mwa enyanja. Apwiya ayo yaapallallesille Aisraele eneerewaatthukumanihattho, eneerewaapwatha wonanko mbusa ni enkhosa ddaye.

¹¹ Ddawoona, Apwiya aawoopolla Aisraele ahaavullusa mu ddoohoosa ddoohiworeya okhumamo.

¹² Athu eneeroowa yiipaka mookhuwa va miyaango dda Ziyoni, eneerohakallalla wunchichi ekaamba ya ddaphaama ddinchichi ddoovenyera wa Apwiya. Ddaphaamanndda tti tirigu, vinyo anaanweene, makhura owaaka anamwanankhosa ni a asaanaang'ombe. Okumiiwa onaakhalle wonanko emata yoohellella, alliwa khewa emoriwa ethakaraka.

¹³ Anamwalli eneerewiina moohakallalla, asombwe ni awuulluvalleene eneerohakallalla. Winlla wiwa kineerowutthattusa ohakallalla, kineerewaahakallalliha ni waavutta miitthori ddiwa.

¹⁴ Allupa mukutho kineerewaachiha yoocha yaphaama, athwaaka eneerovona ddaphaama ddaka. Mi Apwiya koollota.”

Echifundo ya Apwiya va Israele

¹⁵ Apwiya enallota wi, “Okhuwa onniiweya o Rama, wa ekutho ni winlla wunchichi. Rakele anawinllella anaaye, animakhoota okhurumusiwa murima, kaambiiwa anaaye aakhwa.”

¹⁶ Koma Apwiya enallota wi, “Maalla winllanko, hiya omoriha miitthori. Vawi oneerothuviwa moollikana ni mitteko ddawo, anaawo eneerokhumawo o ellapo ya adani.

¹⁷ Vookhalla etiyerello, edduullu ddanyu ddineerohokollweella owaani wuno. Mi Apwiya koollota.”

¹⁸ “Koomwiiwa Efuremu inllaka mweethakaraka wi, ‘Nyu moonillaka, ddawoona, noollakiwa wonanko musaanaang'ombe oohihuddihiwa. Munihokollose wi niwore ohokollowa vawi nyu tti Apwiya Mullukwaahu.

¹⁹ Vano vawi noorukunuwa, ninnamoriwa ethakaraka. Vawi noohuddera, ninnadduukutha vakhakaddani. Noowulliwa muru nave noonyaambusiwa, ekaamba ya machimwaahu naariihu asombwe.’

²⁰ We Efuremu, mwanaka a vamurimani, mwaana oyo kinahakallalleemina. Enthawi ddittheddene kaamuhumullullaka, kinnavirellella omuupuwella mwa echikondi vawi murimaaka onnampaallesesa, kineeromweerella echifundo.

²¹ Wiihiyere echizindikiro, wiikhomelle ezikwangwani. Owehesese musewu, musewu eyo waweelleewe. We namwalli, Israele hokollowa, hokollweella o mizinda ddawo.

²² We mwanaka oohiroromelleya, Ethiyo onaahiye okayikella niini? Apwiya aaphatusa ello yanaanweene va ellapo yavatthi vawi mutthiyana sika anamwaashaasha mullopwana.”

Eyuuma yamuhoollo ya athu a Mulluku

²³ Apwiya Amasiva Mattheene, Mulluku a Israele, anallota wi, “Kaahokollosellattho athu mu ellapwiiwa eneerollota mu ellapo ya Yuda ni omizinda ddiwa wi, ‘We nipuro neechilungamo, we mwaango waweella, Apwiya yuudalise.’ ”

²⁴ Athu eneerokhalla o Yuda ni mizinda ddaye, oollima ni abusa ni enkhosa ddiwa.

²⁵ Kineerewaahihimulla athu oofooka nave athu eettalla kineerewaachiha ophiyera evonne.

²⁶ Sika vano kaavenya kimwaramwara miittho nave kahoona wi kaakhwavo ekhove.

²⁷ Apwiya enallota wi, “Enthawi enimawa mvo kinaadaliseemi ellapo ya Israele ni Yuda ni athu anchichi nave ni eziweto ddinchichi.

²⁸ Wonanko mmo kaweherelleemi phaama otulla, okuha, woononga, okumulla ni weera ddoonanara, emoddamoddavettho kineerowehera phaama omaka ni waalla.

²⁹ Enthawi yeeyo athwaalle khewa ellotattho wi, ‘Makhollo aacha mpesa ddoohiithwa koma anamwani sika eruruvanlle miino.’

³⁰ “Koma arive muthu anaakhwe ekaamba ya machimwaaye. Arive muthu oocha mpesa ddoohiithwa, olliye sika anaaruruvalle miino.”

³¹ Apwiya enallota wi, “Mallapo enimawa mvo kinaakeraatthiheemi echipangano yanaanweene ni athu a o Aisraele ni a o Yuda.

³² Khekhallattho wonanko echipangano elle kakeraatthilleemi ni makhollwiiwa kaaphareelleemi muwono kaakhumiha o Iguputo. Echipangano yeeyo yaayitathilla naari kaari pwiiwa. Mi Apwiya koollota.

³³ Koma echipangano eyo kakeraatthihalleemi ni Aisraele attheene emanlle mallapo yaayo tti yawi kineerohiya malamulwaaka mwa alliwa nave kinaalembe m'murimani mwiwa. Vano miyaano kinaakhalle Mullukwiiwa nave alliwa enaakhalle athwaaka.

³⁴ Va enthawi yeeyo khavikhallattho muthu oomuhuddiha mukhwaaye apaalle mbalaaye wi aadduwelle Apwiya. Vawi attheenaayo, anamwani ni attekweeneene, eneerokidduwella. Kineerokhululukella machimwiiwa nave ngiwa kuupuwellattho. Mi Apwiya koollota.”

³⁵ Apwiya ennoopiha nndduwa otthaana, ennawalihattho mweeri ni etheneeri mahiiyu. Ennaviddulla enyanja, wi mafundiiwa enyakulle, nnddina niwa tti Apwiya Amasiva Mattheene.

³⁶ Apwiya ennalonjeza wi ddaweereyanndda ddavirellellave, sikattho Israele aneerovirellella okhalla mutundu wa enthawi yoohimalla.

³⁷ Eeki aphwanyeye muthu oowora olinga oddullu aashaasha matthipello a ellapo yavatthi, vaavo kineerewaatathilla Aisraele ekaamba ya ddoonanara yeerilliiwa. Mi Apwiya koollota.

³⁸ Apwiya enallota wi, “Enthawi enimawa mvo miyaano Apwiya kinaamakelliweemi muzinda waambeella o nttattha na Hananele ophiya o mullako wa Ekona.

³⁹ Waambeella vaavo malireene eneerokhwaranyella o mwaango wa Garebu nave eneerohapuwa oya o Gowa.

⁴⁰ Ntapo nittheene mmo yatathillelliiwa mitembo ni ntuura navettho emata ddittheddene waambeella o muhinje wa Kidroni ophiya o Ekona ya Kavalo wookhuma nndduwa, ddittheddenennddo ddinaakhalle ddoopatuleya vamiitthoni va Apwiya nave khowa okumulliwattho apaalle woonongiwa.”