Yeremiya 30 - Mawu a Mulluku

Malonjezo a Apwiya wa athwiiwa

¹ Mawu a Apwiya Mulluku a Israele,

² Yaawa wa Yeremiya wi, “Olembe mu nibukhu ddittheddene kuulleelleemi.

³ Enthawi enimawa yawi kaahokolloselle ddaphaama athwaaka ni waahokollosellattho owaniwa, Aisraele ni Ayuda, o ellapo eyo kaavahilleemi makhollwiiwa wi ekhalle yayiwa.”

⁴ Apwiya enallota ni Aisraele ni Ayuda attheene wi,

⁵ “Nohiiwa winlla wootthukumella ni wawoova, murendelle khawiivo virive veko.

⁶ Kohani wi mudduwelle. Ethiyo mullopwana ttuumuyara mwaana? Kaambiiwa tini kinamooneemi arive mullopwana aphanre veerukulluni wonanko mutthiyana va enthawi yooyara? Kaambiiwa tini ekhove ddittheddene ddimorilliiwa?

⁷ Otulli! Nllapo nenno tti nuullupalli wunchichi, khaviwa vikhallattho nimodda noophwanaphwanana. Enaakhalle enthawi ya ddoohoosa wa Yakobo, komave aneerovulluwa o ddookatamihannddo.”

⁸ Apwiya Amasiva Mattheene eni, “Nllapo nenno kineerewinttaka nigoli* nookaporo munikohini mwiwa ni ophadda onyolo wowaamaka. Aisraele khekhallattho akaporo a alleto.

⁹ Vano enaarumeyelleke mi Apwiya Mullukwiiwa ni edduullu ya Davide eyo kinaayitthoolleemi.”

¹⁰ “We Yakobo, murummwaaka, ohoove. We Israele, ohitathille murima. Mi Apwiya koollota. Vawi Kineerewuuvullusani ovenyera o ellapo yawoorekama. Kineeroddoopollattho edduullu ddanyu ovenyera o ellapo dda wuukaporoni. Attheenenyu muneerohokollowattho, muneerokhalla ni murendelle oohikhallavo oowoopopihani.

¹¹ Miyaano kiri ni nyuwaano, Kineerewuuvullusani, mi Apwiya koollota. Kineerowoononga mitundu ddittheddene dda athu nko kupallalleselleemini, koma nyu nguutthollosani. Nguuhiyani oohillakiwa koma kinuullakeni mweechilungamo.”

¹² Apwiya enallota wi, “Nikhwata nanyu tti noohivolliheya, nikhwata nanyu nimmattatthareya.

¹³ Khaavo anaawore owaakiherani va mullatwaanyu, khawiivottho murete woochiriha eretaanyu.

¹⁴ Akhwiinyu attheene ahuutiwallani, alliwa khenuupwathanittho. Kohuullakani mweekuku wonanko mudani vawi mullatwaanyu tti muullupalli, machimwaanyu tti manchichi.

¹⁵ Munakhupanyella tini ni nikhwata nanyunna? Nikhwata nanyu khaninavolle. Mullatwaanyu tti muullupalli, machimwaanyu tti manchichi, sika ekaambiiwa kiweerelleemini ddenndda.

¹⁶ Koma attheene yawoonongilleni, kineerowoonongattho alliwaayo. Attheene awuuhoosani eneerophariwa okaporo. Attheene awaakha ddeko ddanyu alliwattho eneerewaakhiwa. Attheene awuumallihani, alliwattho eneeromallihiwa.

¹⁷ Koma nyuwaano, kineerochiriha ereta ddanyu, kineerovolliha makhwataanyu. Naari amodda yeesaka wi mootathilliwa, voollotani wi ‘Alla tti athu a o Ziyoni, khenna owaapwatha.’ Mi Apwiya koollota.”

¹⁸ Apwiya enallota wi, “Kineerohokollosellattho nibanja na Yakobo o ellapwiiwa, kineerewooniha echikondaaka omapuronaaye mattheene. Muzinda wa Yerusalemu oneeromakiwattho va ntepe nakhalle enyumba yoomwene eneeromakiwattho vanipuroni viwa.

¹⁹ Athu eneerewiipa machipo owaatitimiha, vineerewiiweya okhuwa woohakallalla. Kineerowaatiha, khekhallattho aweerengeya, kineerewaavaha eyuuma, khenyaambusiwa.

²⁰ Aniiwa eneerokhallattho wonanko yakhallelliiwa khalle, mutthukumano muttheene kineerowukeraatthiha kineerewaallaka attheene awaahoosa.

²¹ Oolamulella anaakhalle mmodda a alliwa, oohoollella anaavenyera variyari viwa. Kineeromususihella vakhuviru ni miyaano, olliye aneerewaatamana ni miyaano. Ttaani anaallipe murima wi aatamane ni mi?

²² Sika nyu muneerokhalla athwaaka, mi kineerokhalla Mullukwaanyu. Mi Apwiya koollota.”

²³ Ngoonani, ephevo yawoopiha ya Apwiya! Ephevo yawoopiha ya namangalle, ennoopa va miru dda athu oonanara.

²⁴ Owalli wa Apwiya khowa ovenyavo ophiyera omallihalle weera ddittheddene nnddo murima wa Apwiya onapaalliiwa. Mallapo enawaayo athu a Apwiya eneerewiiwesesa ddenndda.