Yeremiya 3 - Mawu a Mulluku

¹ Apwiya enallota wi, “Muthu amwallana ni mwaariye nave mutthiyanooyo avenyavo atthelliwa ni mullopwana mmodda, ethiyo mullopwana awaambooyo ttuumuhokollweella? Ethiyo eera ddenndda, ellapo kheripihiwa wunchichi? Koma we Israele, woheera ddoohule ni ookondiwa anchichi. Ethiyo ttuuhokollweella wa miyaano?

² Tukhulla miitthwaawo o asimiyaango. Ethiyo ttuuphwanyeya mvo oheerenlleewevo ddoohule? Wakhalla mukhwipi mwa musewu onatiyerella ookondiwaawo, wonanko Mwarabu oowiipitthella athu mu echipululu. Wooripiha ellapo ni makhallellwaawo oonanara oohule.

³ Sika ekaambiiwa murimu a ntthokollapallaka iimeselliweeye nave naari murimu awaallella kharupalle. Komave makhallellwaawo mattheene tti a hule nave khonawulliwa muru naari vang'ono.

⁴ “Nave vano onimakinllella wi, ‘Attiitthi, kiri ookondiwaanyu ovenyera enamwanaaka.

⁵ Ethiyo Apwiya ttuunishella murima wa enthawi yoohimalla? Ethiyo ttuunanariwa wa enthawi yoohimalla?’ Mmu sika wallotelleewe. Komave waavirellella weera ddoonanara moollikana ni mmo wapaallelleewe.”

Ayuda ni Aisraele erukunuwe murima

⁶ Va enthawi ya mwene wa Yosiya, Apwiya yaakilleella wi, “Ethiyo wohoona nnddo eerille Israele oohiroromelleya? Oowella orive mwaango ni vatthi va orive muteekho woovattha nave ooraruwa.

⁷ Kaganiza wi amalliha weera ddenndda aneerohokollweella wa miyaano koma khaahokollowille. Vano Yuda, mwanamunne oohiroromelleyoolle, aaddoona ddennddo.

⁸ Yuda ahoonattho wi Israele oohiroromelleyoolle kaamwallanana nave kaamwiikara ekaamba ya oraruwa waye. Komave Yuda, mwanamunne, khooville. Olliyettho aakhalla oohiroromelleya, aavirellella weera ddoohule.

⁹ Oraruwa wa Israele waari woowulliha muru vawi aaripiha ellapo. Aararuwa voollapellani mafano amalluku ni amiteekho.

¹⁰ Komave eerille ddittheddenenndda, Yuda mwanamunne oohiroromelleya aahokollweella wa miyaano koma moolleka ohiri ni murima muttheene. Mi Apwiya koollota.”

¹¹ Vano Apwiya yaakilleellattho wi, “Israele oohiroromelleya mullatwaaye tti wooyeva ohiyana ni wa Yuda oolleka.

¹² Khawe wallalleye ompoto othenga wawi, ‘We Israele oohiroromelleya, hokollowa, Apwiya sika ennallota. Owallaaka khuvirellella vawi miyaano tti eechifundo, ngiwa kuunanariwella wa enthawi yoohimalla.

¹³ Akhullella ochimwa wawo wi wahaawukila Apwiya Mullukwaawo wi waallapella milluku ddeelleto vatthi va orive muteekho woovattha navettho wi khawaawiiwellelle mawaaka. Mi Apwiya koollota.’

¹⁴ “Nyu athu oohiroromelleya, hokollowani nyu athu oohiroromelleya vawi apwiinyu tti miyaano. Kineerewuuhokollosellani o Ziyoni, mmodda ovenyera o orive muzinda nave eelli ovenyera o orive nibanja.

¹⁵ Wenko kineerewuuvahani abusa a vamurimani vaka. Eneerewuuhoollellani mweezeru ni mwawiiwesesa.

¹⁶ Vano mwaata mwiillaponimmo, athu khewa ellotattho dda nibokosi na echipangano na Apwiya. Khewa eniganizera m'murimani mwiwa apaalle onuupuwella apaalle onipaalla nave khewa enipangattho nimodda.

¹⁷ Enthawi yeeyo Yerusalemu aneeroromolliwa ‘Mpando woomwene wa Apwiya.’ Nave mitundu ddittheddene dda athu ddineerotthukumana wenko vamiitthoni va Apwiya. Khewa ekhalla awumma murima ni othwara murimiiwa woonanara.

¹⁸ Mallapo yaayo nlloko na Yuda ottakanyiherana ni nlloko na Israele. Attheene vamodda eneerovenyera o ya ompoto oya o ellapo kaavahilleemi makhollwiiwa wi ekhalle yayiwayayiwa.”

Ohiroromelleya wa Aisraele

¹⁹ Apwiya enallota wi, “We Israele, ddeerokiddivella wuuhiya variyari va anaaka, wi kuuvahe ellapo yaphaama, yoohallana yooreeresesa okhwaranya ellapo ya mitundu ddimodda dda athu. Kapaalla wi mukeereke attiitthi, wi khamuwa mukihiyattho miyaano.

²⁰ Koma ddawoona, wonanko mmo mutthiyana anamuthawelleeye mamune moolleka, we Israele khororomelleye wa miyaano. Mi Apwiya koollota.”

²¹ Mawu ahiiweya va asimiyaango, Aisraele eniminlla ni oveka echifundo, vawi aathwara ettilla ddoonanara, ahaatiwalla Apwiya Mullukwiiwa.

²² Nyu athwaaka oohiroromelleya hokollweellani wa miyaano, kineerewuuchirihani wi mukhalle ororomelleya. Nyu munallota wi, “Ninimawa wa Apwiya vawi alliwa tti Mullukwaahu.

²³ Khenaaphunrevo ello voollapellani va asimiyaango, vaweerani mutetho omiyaangoni khonna mutteko. Ddawoona, Apwiya Mullukwaahu sika ovullusa wa Aisraele.

²⁴ Waambeella khalle, Baala, mulluku oowulliha muru, ohoonongiha mphuro wa mutteko wa makhollwaahu monga enkhosa ni eng'ombe ddiwa, aniiwa aallopwana ni aatthiyana.

²⁵ Vano nikonaathi moowulliwa muru nave ovevuwa wahu onikhuneelle. Vallethi hiyaano ni makhollwaahu nahaachimwella Apwiya Mullukwaahu, waambeella enamwanaahu ophiyera ollello. Khaniiwellenlle mawu a Apwiya Mullukwaahu.”