Yeremiya 29 - Mawu a Mulluku

Kalata a Yeremiya wa Ayuda a wuukaporoni

¹ Yeremiya aamurumiha kalata ovenyera o Yerusalemu oya wa oohoollella a wuukaporoni navettho allupa mukutho, anamallotella ni athu amodda attheene ayo Nebukadinezara aaphanreeye okaporo o Yerusalemu aayaana o Babiloni.

² Nndda ddeereyille mvo Yehoyakini ni mwene aamutthiyana, enduna dda o enyumba yoomwene ni oohoollella a o Yuda ni a o Yerusalemu navettho athu attheene eeruso yavenyilliiwawo Yerusalemu.

³ Yeremiya amwinyenre kalatooyo Elasa mwaana a Shafani ni Gemariya mwaana a Hilikiya ayo Zedekiya mwene a o Yuda aarumalleeye o Babiloni wa mwene Nebukadinezara. Mukalatanimmo alembillemo wi,

⁴ “Apwiya Amasiva Mattheene, Mulluku a Israele, anaalleella athu attheene a o Yerusalemu ayo awaakhullelleeye wi ephariwe okaporo oya o Babiloni wi,

⁵ ‘Makani enyumba wi mukhallekemo. Llimani emata wi mucheke ezipaso ddiwa.

⁶ Tthellani wi mwaayare anamwani aallopwana ni aatthiyana. Anamwani aallopwana mwaatthoollelle atthiyana nave anamwani aatthiyana mwaatthoollelle allopwana wi yaayare anamwani aallopwana ni aatthiyana. Sika mwaate wenko nave muhiyeve.

⁷ Mwaashaasheke murendelle o muzinda nko kawiikarelleniimiwo, wuukaporoni wi ddeko ddiweetellekeni phaama. Muddivekelleke mizindannddo wa Apwiya ekaamba yawi ddaakhallaka mwamurendelle nyuwaano muneerekokhallattho phaama.’

⁸ Apwiya Amasiva Mattheene, Mulluku a Israele, enallota wi, ‘Anamallotella ehuullekeni naari awoombesa ayo eri variyari vanyu nave muhiiwellelleke ddoolloha ddiwa.

⁹ Alliwa enuulleellani ddawoottha mu nnddina naka naari kihaarumalle. Mi Apwiya Amasiva Mattheene koollota.’

¹⁰ “Apwiya enallota wi, ‘Ddamalla miyakha 70 dda Babiloni, kineeroweetellani ni weera kuulonjezilleemini nave kineerewuuhokollosellani o nipuronna.

¹¹ Vawi kinnadduwella maganizo ayo kinaganizeemi dda nyuwaano. Maganizo amurendelle ohiri oonanara, awuuvahani muhoollo mwaphaama ni etiyerello yawoona.

¹² Enthawi yeeyo muneerokiithana wi mukillapelleke nave kineerowaakhullani.

¹³ Muneerokaashaasha nave muneerokiphwanya. Ddawoona, mwakaashaasha ni murima muttheene,

¹⁴ muneerokiphwanya. Kineerewuuhokollosellani ddaphaama ddanyu ni wuutthukumanihani ovenyera o mitundu ddimodda dda athu ddittheddene ni orive nipuro nko kawiikarelleniimiwo. Kineerewuuhokollosellani o nipuro nko mwakhalleenyu kihinawiikarelleni wuukaporoni. Mi Apwiya koollota.’

¹⁵ “Nyu munallota wi Apwiya ahuuvahani anamallotella o Babiloni.

¹⁶ Koma ngiiwani nnddo Apwiya enallotiiwa dda mwene oyo ari va mpando woomwene wa Davide ni dda athu attheene ookhalla mu muzindoolla, sika wi akhwiinyu a mwiillaponimmo ayo yahiphariwe okaporo.

¹⁷ Apwiya Amasiva Mattheene enallota wi, ‘Kineerowiipha ni ekhoto, ettalla ni mullilli. Kineerewaatthattusa wonanko namukuyu awunta wunchichi, oohiphwanella omucha.

¹⁸ Kineerowiipha ni ekhoto, ettalla ni mullilli nave kineerewaatthattusa ello yawoopiha wa athu a ma omwene mattheene a va ellapo yavatthi. Enaakhalle ootembeleliwa ni awoopiha, oosoonyiwa ni oovevuwa variyari va mitundu ddittheddene dda athu nko kawiikarelleemiwo.

¹⁹ Nndda ddineereye ekaamba yawi kheyiiwellelle mawaaka mvo kaarumihelleemi anamallotella, amurummwaaka navettho mwaakhoota wiiwellella.

²⁰ Attheenenyu ayo kawiikarelleemini wuukaporoni ovenyera o Yerusalemu oya o Babiloni mwiiwellelle mawu mi Apwiya.’

²¹ “Apwiya Amasiva Mattheene, Mulluku a Israele, aallota mawu a dda Ahabu mwaana a Kalaya ni a Zedekiya mwaana a Maaseiya oyo uullotellani ddawoottha munnddina na Apwiya. Alliwa eni eneerewaavelleella m'mattani mwa Nebukadinezara mwene a o Babiloni nave olliye aneerowiiphani nyuwaano moonaka.

²² Ekaamba ya athu eellaayo, manddiniiwa eneerekoromolliwa ni Ayuda ookhalla o Babiloni vawaatembelelani akhwiiwa. Eneerekollota wi, ‘Apwiya eweerelle wonanko mmo yaweerenlliiwa Zedekiya ni Ahabu ayo yoosiwe mwene a o Babiloni!’

²³ Ddawoona, makhallellwiiwa o Israele yaari oonanara, yaanararuwa ni awara aaneena, yaanallotella ddawoottha munnddina naka kihaalamunle. Mi kinnadduwella, kineerella omboni ddenndda. Mi Apwiya koollota.”

Kalata a Shemaya

²⁴ Apwiya Amasiva Mattheene, Mulluku a Israele, yaakinnyera othenga wooya wa Shemaya a o Nehelamu

²⁵ oyo amurumihalle kalata mu nnddina naye wa athu attheene a o Yerusalemu, wa Zefaniya mullupa mukutho mwaana a Maaseiya ni wa allupa mukutho attheene. Mukalatanimmo Shemaya allotille wi,

²⁶ “Apwiya yahuutthoolla we Zefaniya wi okhalle mullupa mukutho munipuroni mwa Yehoyada. Ohuukeraatthiha wi okhalle kapitawo oowehera enyumba ya Apwiya. Omuhiyeke mundende ni ommakellella namang'ona arive muthu aanepa anaddeesa wi tti namallotella.

²⁷ Ethiyo kaambiiwa tini wahimweerenlleewe ddenndda Yeremiya o Anatoti oyo anaddeesa yeekha namallotella variyari vanyu?

²⁸ Hiyaano o Babiloni wuno Yeremiya oonirumihella mawu. Oonilleella wi okaporwaahu onaakhalle woorekama. Sika nimake enyumba wi nikhallekemo nave nillime emata wi nicheke ezipaso ddiwa.”

²⁹ Mullupa mukutho Zefaniya aamweerenga kalata a Shemaya vamiitthoni va namallotella Yeremiya.

³⁰ Vano Apwiya yaamulleella Yeremiya wi,

³¹ “Orumihe othenga wa akaporo attheene waalleelle mawu a Apwiya oollota dda Shemaya a o Nehelamu wi, ‘Shemaya ohuullotellani naari miyaano ngaamurumalle nave ohuullekani wi mukhulupilileke ddawoottha.

³² Mi Apwiya kineeromullaka Shemaya ni edduullu ddaye. Munibanjani nayenno khaavo muthu oyo anaakhalle variyari va mutundu olla wa athu onoone ddaphaama nnddo kinaaweerelleemi athwaaka kaambiiwa olliye oollalleya ddookiwukila. Mi Apwiya koollota.’ ”