Yeremiya 28 - Mawu a Mulluku

Yeremiya ni namallotella Hananiya

¹ Muyakheene yooyo, mweeri waneetthanu wa muyakha waneesese, vawaamba va omwene wa Zedekiya a o Yuda, Hananiya mwaana a Azuri namallotella a o Gibiyoni, aallota ni miyaano o enyumba ya Apwiya, allupa mukutho ni athu attheene yiiwaka wi,

² “Apwiya Amasiva Mattheene, Mulluku a Israele, anallota wi, ‘Kineerewinttaka nigoli* nookaporo na mwene a o Babiloni.

³ Ddihinamalle miyakha miilli, kineerohokollosella eziwiya ddittheddene dda o enyumbaaka onipuroni wuno nnddo Nebukadinezara, mwene a o Babiloni, addaakhilleeye addiyaana o Babiloni.

⁴ Kineeromuhokollosellattho wuno Yehoyakini mwaana a Yehoyakimu mwene a o Yuda vamodda ni akaporo attheene oovenyera o Yuda ayo yapharelliwe o Babiloni. Vawi kineerewinttaka nigoli nookaporo na mwene a o Babiloni. Mi Apwiya koollota.’ ”

⁵ Vano namallotella Yeremiya aamwaakhulla namallotella Hananiya, allupa mukutho ni athu attheene ayo yaari mu enyumba ya Apwiya yiiwaka wi,

⁶ “Amen! Apwiya yeere ddenndda. Apwiya esimikize ollotenlleewenndda voohokollosellani eziwiya dda o enyumbiiwa ni akaporo attheene o nipuronna ovenyera o Babiloni.

⁷ Komave weyaano ni athu attheenaalla iwani nnddo kinuulleelleemini.

⁸ Anamallotella attheene yahoollille khalle yallotella dda ekhoto, ettalla ni mullilli wi ddineeromorella ellapo ddinchichi ni moomwene oovuwa.

⁹ Koma namallotella allotella dda murendelle nave ddeereya aallotenlleeyennddo, ddaanadduwanyeya wi tti ddawoona Apwiya sika yamurumalle.”

¹⁰ Sika namallotella Hananiya aavenyihamo nigoli munikohini mwa Yeremiya aninttaka.

¹¹ Ahaalleella athu attheene wi, “Apwiya enallota wi mmu sika kinaawinttakelleemi nigoli na okaporo na Nebukadinezara mwene a o Babiloni. Kineeronivenyihamo munikohini mwa athu a mitundu ddittheddene ddihinamalle miyakha miilli.” Vano namallotella Yeremiya aavenyavo.

¹² Viviralle enthawi vang'ono Hananiya inttakille nigoli munikohini mwa Yeremiya, Apwiya yaamulleella Yeremiya wi,

¹³ “Khawe wamulleelle Hananiya mawu a Apwiya wi, ‘Winttakille nigoli namuteekho, munipuroni mwiwa kinaahiyemo nigoli namukoko.’ ”

¹⁴ Apwiya Amasiva Mattheene, Mulluku a Israele, aallota wi kinaahiyemo nigoli namukoko munikohini mwa athu a mitundu ddittheddene wi emurumeyelleke Nebukadinezara, mwene a o Babiloni. Ddawoona, eneeromurumeyella nave kineeromuvaha olamulello naari va enama ddamuhakani.

¹⁵ Vano Yeremiya aamulleella Hananiya wi, “We Hananiya, ngiiwa! Apwiya kheyuurumalle koma onaaroromelliha athwaalla ddawoottha.

¹⁶ Sika Apwiya enallota wi, ‘Ochenjere vawi eneerewuuvenyihavo va ellapo yavatthi. Onaakhwe muyakhoolla ohinamalle ekaamba yawi onallalleya ddookiwukila miyaano Apwiya.’ ”

¹⁷ Nave namallotella Hananiya aakhwa muyakha yooyo, mweeri waneetthanu ni piilli.