Yeremiya 27 - Mawu a Mulluku

Yeremiya aniimakellella nigoli

¹ Vawaamba va olamulello wa Zedekiya mwaana a Yosiya mwene a o Yuda mawu a Apwiya yaawa wa Yeremiya wi,

² “Kusa mikwe ddanttapara ni nigoli* namiteekho wiimakellelle munikohini mwawo.

³ Vano orumihe othenga wa mamwene a o Edomu, Mowabu, Amoni, Tiro ni Sidoni oyeella mwa amithenga ayo enawa o Yerusalemu wa Zedekiya, mwene a o Yuda.

⁴ Waalleelle wi yallote wa mamweniiwa wi Apwiya Amasiva Mattheene, Mulluku a Israele enallota wi,

⁵ ‘Kaaphatusa ellapo yavatthi ni masivaaka ni ekophollo ddaka. Kahaaphatusa athu ni enama va ellapo yavatthi nave kinnayivelleella wa oyo kinamooneemi wi tti oophwanella.

⁶ Vano koovelleella ellapo ddittheddenenndda vamodda ni enama ddittheddene ddamuhakani wi ddimurumeyelleke Nebukadinezara murummwaaka, mwene a o Babiloni.

⁷ Athu amitundu ddittheddene eneerekomurumeyella olliye, mwanaye ni edduullwaaye ophiyera ekwakhwanille enthawi yawi ellapwaaye yoonongeye. Vano athu amitundu ddinchichi ni mamwene amasiva eneerogonjiha omwenaaye.’

⁸ “Koma orive mutundu wa athu apaalle erive ellapo yakhoota omurumeyella Nebukadinezara mwene a o Babiloni apaalle waakhullella nigoli naye, kineerewaallaka ni ekhoto, ettalla ni mullilli ophiyera kaavelleellille attheene m'mattani mwaye.

⁹ Sika muhiwiiwellelle anamallotellaanyu, awoombesaanyu, oottaphullellaanyu ddoolloha, amavuwaanyu ni amasengaanyu, yaawuulleellakani wi muhimurumeyelle mwene a o Babiloni.

¹⁰ Ennawoottotthani, adanaanyu eneerewuuvenyihani mwiillaponi mwanyu, wuuyaanani woorekama. Kineerowiikarihani nave muneerewoonongeya.

¹¹ Koma orive mutundu anaakhullelle nigoli na mwene a o Babiloni ni omurumeyella kineerewuuhiya mwiillaponi mwiwa wi ollima ni okhalla mwemmo. Mi Apwiya koollota.”

¹² Mawu amoddamoddave yaayo kaamulleellattho Zedekiya mwene a o Yuda wi, “Ivelleelleni o nigoli na mwene a o Babiloni ni omurumeyella olliye ni athwaaye wi muvulluse okumaanyu.

¹³ Ethiyo yookhwella ni ekhoto, ettalla ni mullilli tti tini weyaano ni athwaawo? Nndda sika Apwiya ellotilliiwa wi ddineeromorella erive ellapo eyo enaakhoote omurumeyella mwene a o Babiloni.

¹⁴ Muhiwiiwellelle anamallotella ayo enuulleellani wi muhimurumeyelle mwene a o Babiloni vawi enimawoottotthani.

¹⁵ Khe miyaano kaarumalle naari ellotellaka mu nnddina naka. Sika kineerowiikarani nave muneerewoonongeya nyuwaano ni anamallotellaanyu.”

¹⁶ Vano kahaalleella allupa mukutho ni athu amodda attheene wi Apwiya enallota wi, “Muhiwiiwellelle anamallotellaanyu ayo enuulleellani wi embale dda mu enyumba ya Apwiya eneeroddihokollosattho vihinallekelle ovenyera o Babiloni. Alliwa enuullotellani ddawoottha.

¹⁷ Muhiwiiwellelle koma mumurumeyelleke mwene a o Babiloni wi muvulluse okumaanyu. Muzindoolla onaatthattuwelle tini ntepe?

¹⁸ Alliwa yaarimi eri anamallotellanamallotella nave yaarimi eri ni mawu a Apwiya, evekellettho wa Apwiya Amasiva Mattheene wi embale nnddo ddahanlle mu enyumba ya Apwiya navettho mu enyumba yoomwene o Yerusalemu ddihaakhiwe oya o Babiloni.

¹⁹ Apwiya Amasiva Mattheene sika enallota dda apoto, nibeseni namukuwa, meto ddiwa ni eziwiya ddittheddene nnddo ddahanlle m'muzindanimmu.

²⁰ Ddenndda Nebukadinezara mwene a o Babiloni khaaddaakhille va enthawi amuphareeye okaporo Yehoyakini mwaana a Yehoyakimu mwene a o Yuda ovenyera o Yerusalemu oya o Babiloni ni enduna dda o Yuda ni o Yerusalemu.

²¹ “Ddawoona, alla sika mawu a Apwiya Amasiva Mattheene oollota dda eziwiya nnddo ddahanlle mu enyumba ya Apwiya ni mu enyumba yoomwene ya o Yerusalemu awi,

²² ‘Ddineerewaakhiwa oya o Babiloni nave ddineerokhalla wenko ophiyera nllapo nno kinaaddupuwelleemittho. Sika kineeroddikusa ni oddihokollosella o nipuro nenna. Mi Apwiya koollota.’ ”