Yeremiya 26 - Mawu a Mulluku

Yeremiya aniipiwa mullatu

¹ Vawaamba va olamulello wa Yehoyakimu mwaana a Yosiya mwene a o Yuda mawu a Apwiya yaawa wa Yeremiya wi,

² “Khawe wiimelle mu nthato na enyumba ya Apwiya nave wallote wa athu attheene ookhalla m'mizindani dda o Yuda ayo enallapella onyumbani ddittheddene nnddo kuulamunleemi wi wallote oohihiyavo ello.

³ Apaalle ttuuwiiwellella nave arive muthu ttuuhiya machimwaaye wi kihaallake moollikana ni mmo kaganizelleemi ekaamba ya ddoonanara ddiwa.

⁴ Waalleelle wi Apwiya enallota wi, ‘Mwaahikiiwellella, mwaahithwara malamulo kuuvahilleemini,

⁵ mwaahiiwellella mawu a anamallotella, amurummwaaka, ayo kaarumalleemi wa nyuwaano naari muhiwiiwellellaka,

⁶ enyumba ella kineeroyoononga wonanko kamoonongelleemi Shilo. Vano muzindoolla kineerowutthattusa ello yootembeleleya wa mitundu ddittheddene dda va ellapo yavatthi.’ ”

⁷ Allupa mukutho, anamallotella ni athu attheene yaamwiiwa Yeremiya allotaka mawu yaalla mu enyumba ya Apwiya.

⁸ Vano Yeremiya amallihalle ollota mawu mattheene Apwiya yamulamunliiwa wi aalleelle athu attheene, amodda mwa allupa mukutho, anamallotella ni athu yamphara nave emulleella wi, “Onaphwanella wiiphiwa.

⁹ Kaambiiwa tini ollotenlleewe mu nnddina na Apwiya wi enyumba ella eneerewoonongiwa wonanko Shilo ni wi muzindoolla oneerotthattuwa ntepe, moohikhalla athu?” Sika athu attheene yaatthukumana emwaapheella Yeremiya mu enyumba ya Apwiya.

¹⁰ Oohoollella a o Yuda yiiwalle ddeereyillennddo, yaatimulla ovenyera o enyumba yoomwene oya o enyumba ya Apwiya yakeraatthi va nipuro niwa o Mullako Wanaanweene wa enyumba ya Apwiya.

¹¹ Vano allupa mukutho ni anamallotella yahaalleella oohoollella ni athu amodda attheene wi, “Muthoolla anaphwanella wiiphiwa! Mohiiwa ni maarwaanyu wi olliye anallotella ddoonanara dda muzindoolla.”

¹² Vano Yeremiya ahaalleella oohoollella ni athu attheene wi, “Apwiya sika yakirumalle wi killalleye mawu mattheene mwiiwalleenywaalla oollota dda enyumbiiwa ni muzindoolla.

¹³ Koma mwahiya machimwaanyu ni waamba wiiwellella mawu a Apwiya Mullukwaanyu eneerewuukhululukellani, kheyuullakani moollikana ni mmo yallotelliiwa.

¹⁴ Mi kiri m'mattani mwanyu nave mukeerena erive ello munapaalleenyu.

¹⁵ Koma vano dduwellani wi mwakiipha, muzinda olla ni athu attheene ookhallamo muneerottatthamulla mullatu woomwiipha muthu oohichimwa vawi tti ddawoona wi Apwiya sika yakirumalle wa nyuwaano wi mwiiwe ddittheddene kinalloteemi.”

¹⁶ Vano oohoollella ni athu amodda yahaalleella allupa mukutho ni anamallotella wi, “Muthoolla khaphwanenlle wiiphiwa vawi allotille ni hiyaano mu nnddina na Apwiya Mullukwaahu.”

¹⁷ Oohoollella amodda yahiimellattho yaalleella athu attheene yatthukumannaayo wi,

¹⁸ “Enthawi eyo Hezekiya aariiye mwene a o Yuda, Mika a o Moresheti aallotella. Nave ahaalleella athu attheene a o Yuda wi Apwiya Amasiva Mattheene enallota wi, ‘Ziyoni aneerollimiwa wonanko emata, Yerusalemu aneerotthattuwa ntepe nave mwaango wa enyumba ya Apwiya oneerotthattuwa otthako.’

¹⁹ Ethiyo mwene Hezekiya ni athu attheene a o Yuda yaamwiipha? Ethiyo mwene khaawooville Apwiya nave avekella wi emweerelle echifundo? Sika Apwiya yaahaakhululukella, kheyaawaallakille wonanko mmo yallotelliiwa. Koma hiyaano niri vakhuviru oddiithanella otulli wawoopiha.”

²⁰ Vaakhallattho muthu mmodda oyo allotella munnddina na Apwiya, nnddina naye naari Uriya mwaana a Shemaya a o Kiriyati Yearimu. Olliye aallotellattho dda woonongeya wawoopiha nko onaamorelle muzindoolla ni ellapweella wonanko mmo eerelle Yeremiya.

²¹ Mwene Yehoyakimu ni oohoollellaaye attheene navettho akhotwaaye yiiwalle allotilleeyennddo yapaalla omwiipha. Uriya iiwalleeye ahoova nave aathawella o Iguputo.

²² Komave mwene Yehoyakimu aamuruma Elinatani mwaana a Akibori ni athu amodda o Iguputo.

²³ Alliwa yaamphara Uriya o Iguputo wenko emuwaana wa mwene Yehoyakimu. Mwene aalamula wi Uriya iiphiwe nave mutembwaaye yaawuvittha o mahame a athu shisha.

²⁴ Koma Ahikamu mwaana a Shafani aamwaakihera Yeremiya sika khaavelleelliwe wi iiphiwe.