Yeremiya 25 - Mawu a Mulluku

Ollakiwa wa Yuda

¹ Alla sika mawu yawiille wa Yeremiya oollota dda athu attheene a o Yuda. Mawaalla yaphiyalle m'muyakha waneesese wa omwene wa Yehoyakimu mwaana a Yosiya mwene a o Yuda, muyakha wawaamba wa Nebukadinezara mwene a o Babiloni.

² Namallotella Yeremiya ahaalleella athu attheene a o Yuda ni a o Yerusalemu wi,

³ “Va miyakha 23, waambeella muyakha waneekhumi ni raru wa omwene wa Yosiya mwaana a Amoni a o Yuda ophiyera ollello, mawu a Apwiya yaawa wa mi nave kinnahoowa ni wuulleellani koma khamuniiwellella.

⁴ Nyu khamwiiwellenlle apaalle waapella maaru naari Apwiya yahihiyalle wuurumihellani oorumeyellaaye anamallotella.

⁵ Alliwa yaanallotella wi arive muthu mwa nyuwaano ahiye makhallellwaaye oonanara ni mitteko ddaye ddoonanara wi mukhalle mu ellapo eyo Apwiya yuuvahilliiwani nyuwaano ni makhollwaanyu wa enthawi yoohimalla.

⁶ Muhithwareke milluku ddimodda munaddirumeyella ni oddillapella. Muhittatthamulleke owalli wa mi Apwiya ni mafano oopangiwa ni mattaanyu wi kihiwoonongeni.

⁷ Koma nyuwaano khamwiiwellenlle nave mwaattatthamulla owallaaka ni mafano oopangiwa ni mattaanyu wi muhiddoononge.”

⁸ Sika vano Apwiya Amasiva Mattheene enallota wi, “Ekaamba yawi khamwiiwellenlle mawaaka,

⁹ kineerowiithaniha malloko mattheene ompoto ni oorumeyellaaka Nebukadinezara, mwene a o Babiloni. Kineerewaaruma wi ehelle ekhoto ellapweella ni athwiiwa navettho athu a mitundu ddimodda ddawaapheella ellapweella. Ddawoona, kineerewaatthollosa ni waatthattusa ello yoonanara, yoovevuwa ni yoosoonyiha wa enthawi yoohimalla.

¹⁰ Kineeromalliha mawu oohakallalla ni oottheya variyari viwa. Kineerohiiha mawu oothapella a ootthella ni ootthelliwa. Khowa wiiweyattho onyakulla wa nsillo nave kineerothiimiha enyali ddittheddene.

¹¹ Ellapo ettheeneella enaakhalle ntepe ni ello yoonanara. Va miyakha 70 mitundu ddenndda ddineeromurumeyella mwene a o Babiloni.

¹² Miyakha 70 ddamalla, kineeromullaka mwene a o Babiloni ni athwaaye ekaamba ya ddoonanara ddiwa nave ellapwiiwa kineeroyitthattusa ntepe wa enthawi yoohimalla.

¹³ Kineereweera ddittheddene kallotilleemi dda eellapweeyo, ddittheddene ddalembiwe m'mabukhuni navettho ddittheddene namallotella Yeremiya allotenlleeye ddawaavaanyiha athwaalla.

¹⁴ Alliwa enaakhalle akaporo a mitundu ddinchichi dda athu ni mamwene oovuwa. Sika kineerewaahokollosella moollikana ni ddaweera ddiwa ni mitteko dda mattiiwa.”

Apwiya eneerewaallaka athu a mitundu ddimodda

¹⁵ Apwiya Mulluku a Israele, yaakilleella wi, “Omukuse kapu olla ooddalla ni owallaaka nave waawiryihe athu a mitundu ddittheddene nko kinaawurumeemi.

¹⁶ Yawirya, eneerewaamba ohahareya nave eneerotthattuwa aanepa ekaamba ya ekhoto eyo kinaarumiheemi variyari viwa.”

¹⁷ Vano kaamukusa kapooyo kiwinnya athu a mitundu ddittheddene wi emuwirye moollikana ni mmo Apwiya yakilamulelliiwa.

¹⁸ Yaakiruma o Yerusalemu, o mizinda dda o Yuda, wa mamwenaaye ni enduna ddaye wi etthattuwe matepe, ello yawoopiha ni yoottheyiwa monga ddikhallelliiwa ollello.

¹⁹ Yaakirumattho wa mwene a o Iguputo, wa enduna ddaye, allupa muttekwaaye ni athwaaye attheene,

²⁰ owaakattho wa athu a mitundu ddimodda ookhalla mu Iguputo. Yaakirumattho wa mamwene mattheene a o Uzi, wa mamwene mattheene a o mizinda dda Afilisti, sika wi Ashikeloni, Gaza, Ekeroni ni o echigawo yoohalla ya o Ashidodi.

²¹ Yaakirumattho o Edomu, Mowabu navettho wa Aamoni

²² Yaakirumattho wa mamwene mattheene o Tiro ni Sidoni navettho wa mamwene a o ellapo dda mukhwipi mwa enyanja, sika wi

²³ o Dedani, o Tema o Buzi ni wa attheene oophaddera mphattamaaru.

²⁴ Yaakirumattho wa mamwene mattheene o Arabiya ni wa mamwene mattheene ookhalla mu echipululu.

²⁵ Yaakirumattho wa mamwene mattheene o Zimiri, wa mamwene mattheene a o Elamu, wa mamwene mattheene o Mediya

²⁶ wa mamwene mattheene a ompoto, a vakhuviru ni awoorekama ovenyera wa mmodda ophiyera wa mmodda. Nave yawirya attheenaalla, voomallihellani anaawirye tti mwene a o Babiloni.

²⁷ Vano Apwiya yaakilleella wi, “Alleelle athu wi mi Apwiya Amasiva Mattheene, Mulluku a Israele, kinalamula wi, ‘Wiryani, lezelani, rapheyani, ikuhani oohivenyattho ekaamba ya ekhoto kinaarumiheemi variyari vanyu.’

²⁸ Nave yaakhootaka omwaakhella kapu m'mattani mwawo wi ewirye, waalleelle wi, ‘Apwiya Amasiva Mattheene enallota wi munaphwanella owirya.

²⁹ Ngoonani, kinaambe ollaka muzinda oyo onadduwelliwa ni nnddina naka. Ethiyo munaganiza wi nyu khamullakiwa? Khe ddiiddo! Khamuwora othawa ollakiwa. Kineerorumiha ekhoto wa athu attheene ookhalla va ellapo yavatthi. Mi Apwiya Amasiva Mattheene koollota.’

³⁰ “Vano we Yeremiya, llotella mowaahumullulla wi, ‘Apwiya eneerothuruma oddullu, mawiiwa eneerewiiweya wonanko ogugudeya wa murimu woovenyera o nipuro niwa naweella. Apwiya eneerothuruma moowella waasimwella athwiiwa eneerokhuwa wunchichi wonanko athu oovota mpesa voollipanani ni athu attheene a va ellapo yavatthi.

³¹ Otokollolla wuullupalli oneerewiiweya va ellapo ettheene yavatthi Apwiya voowiipani mullatu athu a mitundu ddittheddene. Alliwa eneeroweeruza athu attheene, oochimwa eneerewiiphiwa ni nsupada. Mi Apwiya koollota.’ ”

³² Apwiya Amasiva Mattheene enallota wi, “Ngoonani vawi otulli wavenya va mutundu mmodda onaamorelleke va mutundu mmoddattho nave wookomella ellapo yavatthi oneerovenyera ephevo yawoopiha.”

³³ Va nllapo nenno attheene awiiphiwa ni Apwiya enaakhalle millumillu va ellapo ettheene yavatthi. Khaavo oyo anaawinlle apaalle waavittha mu mahame koma wonanko manyowa oomwareyella vatthi.

³⁴ Nyu abusa, inllani wunchichi ni okhuwa mwamasiva. Nyu oohoollella a athwaaka, ihelleni ntuura. Enthawaanyu yawiiphiwa yoophiya nave muneeropwesiwa ni omwaramwariwa wonanko epalli yoowallamella mutengo.

³⁵ Abusa eneerorama woothawella nave oohoollella khekhallana ettilla yoovulluwella.

³⁶ Ngiiwaani, abusa eniminlla, oohoollella eniminlla wunchichi vawi Apwiya ennoononga nibusa niwa.

³⁷ Makholla a enkhosa ayo yaari va murendelle eneerotthattuwa matepe ekaamba ya owalli wawoopiha wa Apwiya.

³⁸ Apwiya ahaahiya athwiiwa wonanko mukango woohiya nikhungu niwa nave ellapwiiwa yootthattuwa ntepe ekaamba ya ddoohoosa dda ekhoto ni osha murima wawoopiha wa Apwiya.