Yeremiya 24 - Mawu a Mulluku

Mitaanga ddanamukuyu

¹ Apwiya yaakooniha miyaano mitaanga miilli ddanamukuyu ddiri va enyumba ya Apwiya. Nndda ddeereyille Nebukadinezara, mwene a o Babiloni, ampharille okaporo Yehoyakini mwaana a Yehoyakimu mwene a o Yuda ovenyera o Yerusalemu. Ahaapharattho okaporo enduna ddittheddene dda o Yuda, athu attheene eeruso ni amoddattho aayaana o Babiloni.

² M'mutaangani wawaamba mwaari namukuyu aphaama wunchichi wonanko awaamba wiithwa. Koma m'mutaangani waneepiillooyo mwaari namukuyu oonanara wunchichi oohiphwanella omucha.

³ Vano Apwiya yaakikoha wi, “Yeremiya, ethiyo onoona tini?” Mi kahaakhulla wi, “Kinamoona namukuyu aphaama wunchichi ni mmoddattho oonanara wunchichi oohiphwanella omucha.”

⁴ Sika mawu a Apwiya yaawa wa mi wi,

⁵ “Mi Apwiya Mulluku a Israele, kinallota wi akaporo a o Yuda ayo kaakhumihalleemi o nipuronna ni waayaana o ellapo ya Babiloni, kinaaphwanaphwaniha ni namukuyu aphaama wa alliwa.

⁶ Kineerewoonesesa wi kiweerelle echifundo ni waahokollosella o ellapo ella nave kineerewaamakella vamodda ohiri waakumulla, kineerowaalla ohiri waatulla.

⁷ Kineerewaavaha murima wookidduwella wi mi tti Apwiya. Alliwa enaakhalle athwaaka, mi kinaakhalle Mullukwiiwa vawi eneerohokollweella wa mi ni murimiiwa muttheene.

⁸ “Koma wonanko namukuyu oonanaroolle, oohiphwanella omucha, tti mmo kinaamullakelleemi mwene Zedekiya a o Yuda, enduna ddaye ni attheene oohalla mu Yerusalemu ayo eri mwiillaponimmu navettho Ayuda ayo enakhalla o Iguputo.

⁹ Kineerewaatthattusa ello yawoopiha yoonanara wa mamwene mattheene a va ellapo yavatthi, ello yoovevuwa, yoohikhalla ni mutteko, yoottheyiwa ni yootembeleliwa orive weko kinaawiikarelleemiwo.

¹⁰ Kineerowiipha ni ekhoto, ettalla ni mullilli ophiyera attheene kaatthollosille mu ellapo eyo kaavahilleemi alliwa ni makhollwiiwa.”