Yeremiya 23 - Mawu a Mulluku

Etiyerello yamuhoollo

¹ Otulli wa abusa ayo enoononga ni opallallesa enkhosa dda va nibusa na Apwiya.

² Ekaamba ya yeella Apwiya Mulluku a Israele enallota dda abusa awaawehera athwiiwa wi, “Moopallallesa ni omwara enkhosa ddaka nave khamunaddipwatha phaama. Sika kineerewuullakani ekaamba ya ddoonanara ddanyu.

³ Nave kineerotthukumaniha eziweto ddaka ddoohalla ovenyera o ellapo ddittheddene kaddiikarelleemiwo. Kineeroddihokollosella o nibusa noowaniwa nave ddineerorellana ni waata.

⁴ Kineeroddihiyera abusa ooddiwehera phaama nave kheddiwa ddoovattho apaalle woopopiheya apaalle ohollowa. Mi Apwiya koollota.”

⁵ Apwiya enallota wi, “Enimawa mallapo kinaamuphuwihelleemi Davide enthambi yoolungama eyo enaakhalle mwene eezeru ni aweeruza mweechilungamo ni moohiweha ekhove mwiillaponimmu.

⁶ Va enthawi yoomwenaaye, Yuda aneerovulluwa nave Israele aneerokhalla vamurendelleni. Mwenooyo anaaromolliweke wi ‘Apwiya sika echilungamwaahu.’

⁷ “Mallapo enimawa mvo athu khellupellakattho wi, ‘Vamiitthoni va Apwiya Ookumi ayo yaakhumihalle Aisraele o ellapo ya Iguputo.’

⁸ Koma eneereke wi, ‘Va miitthoni va Apwiya ayo yaakhumihalle Aisraele o ellapo ya ompoto ni o ellapo ddittheddene nko yaapallalleselliiwa!’ Kineerewaahokollosella o ellapo eyo kaavahilleemi makhollwiiwa.”

Anamallotella awoottha

⁹ Ekaamba ya anamallotella, murimaaka woophweeya, masiva aakimallella. Kiri wonanko muthu oolezela, muthu oovirikanyiheya ni vinyo ekaamba ya Apwiya ni mawiiwa aweella.

¹⁰ Ellapo yooddalla ni athu ooraruwa ekaamba ya tembelelo na Apwiya. Mwiillaponi moovollowa ettalla, mapuro oochihellawo enama muhakani ahumma. Enathamakella ddoonanara, enallipihella ddoohilungama.

¹¹ “Ddawoona, anamallotella ni allupa mukutho, attheenaayo aaripihiwa. Kohaaphwanya yeeraka ddoonanara naari mu enyumbaaka. Mi Apwiya koollota.”

¹² Ekaamba ya yeella ettilla ddiwa ddinaakhalle ddoottherenya ni ddeepiphi. Kineerewaakwakwatuwiha ni waakuha vawi kineerewaawiihella ddoonanara va enthawi ya ollakiwa wiwa. Mi Apwiya koollota.

¹³ Variyari va anamallotella o Samariya kohoona yoonanara, yallotella mu nnddina na Baala, sika yahaahollosa athwaaka Aisraele.

¹⁴ Variyari va anamallotella o Yerusalemu kohoona ello yawoopihesesa, ennararuwa ni woottha. Navettho enaallipiha mirima athu oochimwa, wi ahikhallevo oohiya weera ddoonanara ddaye. Wa miyaano attheenaayo tti wonanko athu a o Sodomu ni Gomora.

¹⁵ Ekaamba ya ddenndda, voollotani dda anamallotella yaalla, Apwiya Amasiva Mattheene enallota wi, “Kineerewaachiha ddoomella ddoowaawa ni waawiryiha maaddi anttipwi ekaamba ya ddoonanara dda anamallotella a o Yerusalemu ddiddanlle ellapo ettheeneella.”

¹⁶ Apwiya Amasiva Mattheene enaalleella athu wi, “Muhiiwellelle nnddo enallota anamallotella, alliwa enuullotellani ddawoottha. Nnddo enuulleelliiwani wi ennaddoona m'masomphenya tti dda m'muruni mwiwa, khe ddoollota dda Apwiya.

¹⁷ Ennavirellella waalleella athu ookivevulla wi, ‘Muneerokhalla ni murendelle.’ Nave ayo enummellella othwara ddoopaalla dda murimiiwa enaalleella wi, ‘Khamuwa moona yoohoosa.’ ”

¹⁸ Mi kaallota wi, “Mwa anamallotellaayo, ttaani akhanlle mu mutthukumano wa Apwiya? Ttaani awoonille ni wiiwa mawiiwa? Ttaani mwa alliwaayo apwathille mawiiwa ni owiiwellella?

¹⁹ Onani ephevo yawoopiha yoovenyera wa Apwiya! Onani owalliiwa wawoopa wonanko ephevo yuullupalli, oneerewoopa va miru dda oonanara.

²⁰ Owalli wa Apwiya oneerovirellella ophiyera yeerille ddittheddene nnddo yasimikinziiwa m'murimani mwiwa. Nave muneeroddidduwella phaama ddenndda mallapo amuhoollo.”

²¹ Apwiya yaallota wi, “Anamallotella yaalla kaarumalle khe miyaano komave yaanathamaka nngu ni nngu enallotella wonanko kahaaruma.

²² Yakhanlleke ni miyaano va mutthukumanwaaka, yaaweerollalleya mawaaka wa athwaaka ni waavenyihamo athwaaka mu ettilla ddiwa ddoonanara wi ehiye machimwiiwa.”

²³ Apwiya enallota wi, “Ethiyo kiri Mulluku a vakhuviru ohiri Mulluku a voorekamella?

²⁴ Ethiyo muthu ttuuwiipittha vootiitheya wi mi kihimoone? Ethiyo mi ngiri viriveveko, oddullu ni va ellapo yavatthi?

²⁵ Kohiiwa ddoollota dda anamallotella mmo enallotelliiwa ddawoottha mu nnddina naka enakhuwa wi, ‘Koolloha, koolloha!’

²⁶ Ethiyo anamallotella awootthaalla ayo enallotella ddoolleka dda m'murimani mwiwa, enaaddisunge ddawootthanndda m'murimani mwiwa ophiyera niini?

²⁷ Anamallotellaalla enaganiza wi athwaaka eneerokitiwalla vawiiwani ddoollohannddo wonanko mmo makhollwiiwa yatiwallelliiwa voomullapellani Baala.

²⁸ Namallotella alloha, atthopoollettho olloha wayenko. Koma oyo ari ni mawaaka, allalleye mawaakaayo mwawoona. Ethiyo mallulla ttuuphwanaphwana ni tirigu? Mi Apwiya koollota.

²⁹ Vallethi mawaaka enaviha wonanko munllo nave tti wonanko hamala oopwesella nlluku.

³⁰ Ekaamba ya yeella kinnaakhoota anamallotella ayo eninnyerana mawu anayaayove voollotani wi mawaayo tti a miyaano.

³¹ Ngoonani, kinnaahumullulla ayo enaddivelliwa ollota ddawoottha wi, ‘Alla sika mawu a Apwiya.’

³² Kinnaakhoota anamallotella ayo enalloha ddawoottha, enaalleella athwaaka ni waavirikaniha ni ddawoottha ddiwannddo. Khe miyaano kaarumalle apaalle waalamula nave kheenaakavihera athu naari vang'ono. Mi Apwiya koollota.”

Katundu awaallemella Apwiya

³³ Apwiya yaallota ni miyaano wi, “Yeremiya, athu yaalla, khaya tti anamallotella apaalle allupa mukutho, ttuuwuukoha wi, ‘Ethiyo othenga woollemella wa Apwiya oni tini?’ Vano owaakhulle wi, ‘Nyu sika katundu awaallemella Apwiya nave eneerewuutathillani.’

³⁴ Nave namallotella, mullupa mukutho apaalle arive muthu allota wi, ‘Olla tti othenga woollemella wa Apwiya,’ yooyo kineeromullaka ni nibanja naye.

³⁵ Koma mawu awi arive muthu amukoheke mukhwaaye ekhalle awi, ‘Apwiya yaakhunlle tini? Apwiya ellotille tini?’

³⁶ Koma muhillotekettho wi, ‘Olla tti othenga woollemella wa Apwiya.’ Othenga woollemella wa arive muthu tti mawu mwaneenaaye vawi mwaavirikaniha mawu a Mulluku Ookumi, Apwiya Amasiva Mattheene, Mullukwaahu.

³⁷ Vano we Yeremiya omukohe namallotella wi, ‘Ethiyo Apwiya yaakhunlle tini?’ ‘Ethiyo Apwiya ellotille tini?’

³⁸ Koma ttuullota wi, ‘Olla tti othenga woollemella wa Apwiya.’ Vano eneerollota wi, ‘Moollota wi olla tti othenga woollemella wa Apwiya naari kuulleelleni wi muhillote mawu yaalla.

³⁹ Sika mi mwaneenaaka kineerewuutukhullani wonanko katundu oollemella ni wuutathillellani woorekama. Kineerewuuvenyihanivo vamiitthoni vaka nyuwaano ni muzinda oyo kuuvahilleemini nyuwaano ni makhollwaanyu.

⁴⁰ Kineerewuuvevullani wa enthawi yoohimalla, kineerewuuwullihani muru moohitiwalleya.’ ”