Yeremiya 22 - Mawu a Mulluku

Ollotella woomuhumullulla mwene a o Yuda

¹ Apwiya yaakilleella wi kiye o enyumba yoomwene ya o Yuda kaalleelle wi

² Nyu mwene a o Yuda iwani mawu a Apwiya. Nave oyo anakhalla va mpando woomwene wa Davide, oorumeyellaaye ni athwaaye ayo enavollowella va millakonndda yaapelle maaru.

³ Apwiya enallota wi, “Mweeruzeke mweechilungamo ni moohiweha ekhove erive enthawi. Mwaatetezeke athu ayo yiiyeriwe katundwiiwa. Muhaakatamiheke alleto, akhwaadduni apaalle anaamukhwelle nave muhiwiipheke athu oohichimwa va nipuronna.

⁴ Mwaawiiwellellaka mawu yaalla mamwene ookhalla va mpando woomwene wa Davide eneerovirellella olamulella. Eneerekovollowella va millako dda o enyumba yoomwene ewenlle va magareta ni va akavalo alliwa ni oorumeyelliiwa vamodda ni athwiiwa.

⁵ Koma waahiiwellella mawaaka kinallupella vamiitthoni vaka wi enyumba yeella eneerotthattuwa ntepe. Mi Apwiya koollota.”

⁶ Alla tti mawu a Apwiya oollota dda enyumba ya omwene ya o Yuda awi, “Naari kuukondaka wonanko Giliyadi apaalle wonanko etthoka ya mwaango wa Lebanoni komave kineerewuutthattusa ntepe, muzinda woohikhalla ni athu.

⁷ Kineerewaaruma athu wi ewoononge, arive muthu ari ni ezida ddaye. Eneerewuuha mikunguza ddawo ddaphaama nave eneeroddivokhella viikho.

⁸ “Vatulli viwa athu a mitundu ddimodda voovirani eneerekokoha wi, ‘Ethiyo kaambiiwa tini Apwiya yoonongilliiwa mwawi ddiidda muzinda muullupalloolla?’

⁹ Nave eneerewaakhulla wi kaambiiwa yaatathilla echipangano ni Apwiya Mullukwiiwa. Yahaambeella ollapella ni orumeyella milluku ddimodda.”

Othenga woollota dda Shalumu

¹⁰ Muhimwinllelle mwene oyo iiphiwe, muhimwiipelle nchipo namaliro. Koma mumwinllelle oyo opharelliwe wuukaporoni kaambiiwa khawa ahokollowattho, khawa ayoonattho ellapwaaye.

¹¹ Shalumu mwaana a Yosiya mwene a o Yuda oyo avollowille munipuroni mwa attiitthinnya va mpando woomwene aapharelliwa wuukaporoni nave Apwiya enallota dda olliye wi, “Khawa ahokollowattho.

¹² Anaakhwelle wuukaporoni nave khawa ayoonattho ellapweella.”

Othenga woollota dda Yehoyakimu

¹³ Ootulli tti muthu oyo anamaka enyumbaaye moohilungama, oomaka ezipinda ddaye moolleka vawaapharihani mutteko athu koma oohaallivella.

¹⁴ Ootulli tti oyo anallota wi, “Kineerewiimakella enyumba yuullupalli, ya ezipinda ddamuddullu dduullupalli.” Kineerohiyera mawindo, kineeroyikhomella matabwa amukunguza, kineeroyisiringa ni otooto woofiira.

¹⁵ Ethiyo onaganiza wi ori mwene kaambiiwa enyumba ddawo tti ddamukunguza? Attiittho yaakhalla ni erive ello, yaaneeruza moolungama ni moohiweha ekhove, ddittheddene ddaanaweetella phaama.

¹⁶ Yaanaateteza athu avatthi ni oohoowa, ddittheddene ddaanaweetella phaama. Ethiyo ddenndda khaddoonihalle wi yaanakidduwella? Mi Apwiya koollota.

¹⁷ Koma maganizwaawo ni murimaawo ddiri va mphuro wawoottha, va ddoowiipha oohichimwa ddeekuku ni waahoosa athu.

¹⁸ Sika kaambiiwa Apwiya enallotiiwa dda Yehoyakimu mwaana a Yosiya mwene a o Yuda wi, “Khavikhalla oomwinllella muthooyo wi, ‘Otulli, mwanamunnaka!’ Apaalle wi, ‘Otulli, murokoraka!’ Khavikhalla oomwinllella wi, ‘Otulli, apwiyaaka!’ Apaalle wi, ‘Otulli, mwenaaka!’

¹⁹ Enaamuvitthe wonanko bulu, oneeromukwekweresa wi yamutathille otte wa millako dda Yerusalemu.”

Otulli wa athu a o Yerusalemu

²⁰ “Nyu athu a o Yerusalemu, wellani o miyaango o Lebanoni, mwinlle mookhuwa wenko, mawaanyu yiiweye ophiya o Bashani. Mwinlle mookhuwa muri o Abarimu, kaambiiwa attheene mwaaroromellaanyu aagonjihiwa.

²¹ Kahuuchenjezani ddeko ddaweetelleewani phaama koma nyu mwaallota wi, ‘Nookhoota owiiwellellani.’ Nngu ttuukhalla wanyu ovenyera enamwanaanyu, khamuniiwellelleke mawaaka.

²² Ephevwaaka eneerewaatukhullavo abusaanyu attheene, akhwaawo eneerophariwa okaporo. Ddawoona, muneerovevulliwa ni onyaambusiwa ekaamba ya ddoonanara ddanyu ddittheddene.

²³ Nyu mwakhalla o Lebanoni, mwamakille enyumba ddamikunguza, muneerewiipullella wunchichi vawuumorellani ddoovoreya wonanko mutthiyana vooyarani.”

Apwiya eneeromullaka Yehoyakini

²⁴ Apwiya enallota wi, “Kinallupella vamiitthoni vaka wi we Yehoyakini mwaana a Yehoyakimu mwene a o Yuda naari waariki wonanko emphete ya onnattanatta waka, keerewuurulla kuutathille.

²⁵ Kineerewuuvelleella m'mattani mwa oopaalla owiipha, mwa ayo onawooveewe, Nebukadinezara mwene a o Babiloni ni athwaaye.

²⁶ We vamodda ni amaayo awuuyara kineerowiikarellani wuukaporoni, o ellapo eyo eellinyu mwahiyariwelleenyuwo koma munaakhwelle wenko.

²⁷ Muneeropaalla ohokollowa koma khemuwora ohokollowa.”

²⁸ Mi kaallota wi, “Ethiyo Yehoyakini ari wonanko epalli yoovevulliwa, yoophweeya apaalle ello yoohipwathiwa ni arive muthu? Kaambiiwa tini olliye ni anaaye enaavenyihiiwavo ni waavokhella o ellapo yoohidduwanyeya?”

²⁹ We ellapo, ellapo, ellapo, iwellella mawu a Apwiya!

³⁰ Apwiya enallota wi, “Mulembeni muthoolla wonanko oohikhalla ni anamwani, oyo ahinaphure ello va okumaaye. Vawi khaavo naari mmodda mwa edduullu ddaye oyo anaakhalle va mpando woomwene wa Davide wi ttuulamulellattho ellapo ya Yuda.”