Yeremiya 21 - Mawu a Mulluku

Ollotella dda ollakiwa wa Yerusalemu

¹ Mawu a Apwiya yaawa wa Yeremiya, Zedekiya mwene a o Yuda amurumalleeye Pashuri mwaana a Malikiya navettho mullupa mukutho Zefaniya mwaana a Maaseiya, aalleella wi,

² “Khaweni wa Yeremiya mwamuveke wi anillotelle wa Apwiya vawi Nebukadinezara mwene a o Babiloni oonihella ekhoto. Apaalle Apwiya ttuuneerella ddoottikhiniha wi Nebukadinezara avenyewo owanihu wuno.”

³ Koma Yeremiya ahaalleella oorumiwaalle wi,

⁴ “Mwamulleelle Zedekiya wi Apwiya Mulluku a Israele anallota wi, ‘Kineerowaakhani ezida ddakhoto ddiri m'mattani mwanyu munawaneenyuna ekhoto ni mwene a o Babiloni ni akhotwaaye ayo ewaaphenlleni ni misasa ddakhoto. Kineerodduukellella ezida dda akhotwaanyu muwari mwa muzindoolla.

⁵ Mi mwaneenaaka ni muwonwaaka wamasiva kineerowana ni nyuwaano moosha murima, moonanariwa ni moowalli.

⁶ Kineerowiipha ookhalla m'muzindoolla ni eziweto ddene, ddittheddene ddineerokhwa ni mullilli wawoopiha.

⁷ Vatulli viwa kineeromupharella wuukaporoni Zedekiya mwene a o Yuda ni enduna ddaye ni athu oohalla m'muzindoolla oovulluwa o mullilli, ettalla ni ekhoto. Kineerewaavelleella m'mattani mwa Nebukadinezara mwene a o Babiloni navettho wa adaniiwa ayo enapaalla owiipha. Ddawoona, eneerowiipha ni nsupada, kheyaamorella ethakaraka apaalle echifundo.’ ”

⁸ Apwiya enallota wi, “Waalleellettho athu yaalla waalleellettho wi etthoolle okumi apaalle okhwa.

⁹ Arive muthu oohalla mu muzindoolla aneerokhwa ni ekhoto, ettalla apaalle mullilli. Koma arive muthu aniivelleelle wa Ababiloni ayo ewaaphenlleni ni misasa ddakhoto aneerokhalla ni okumi vawi aneerovulluwa.

¹⁰ Koosimikiza oweerella ddoonanara, ohiri ddaphaama muzinda yoolla. Oneerovelleelliwa wa mwene a o Babiloni nave aneerowushellelliha.”

Ollakiwa wa nibanja noomwene

¹¹ Vano nibanja noomwene na o Yuda onilleelle wi, “Ngiiwani mawu a Apwiya,

¹² nyu a mu nibanja na Davide. Apwiya enallota wi mweeruzeke moothwara echilungamo erive enthawi. Mumutetezeke muthu oyo iiyeriwe katundwaaye woova wi osha murima waka onaakhare wonanko munllo woohithiimiheya ekaamba ya machimwaanyu.

¹³ Nyu ookhalla muntaponi, kinawiipani mullatu nyuwaano ookhalla wonanko nlluku na va ntapo. Nyu munallota wi, ‘Ethiyo ttaani anaanihelle ekhoto. Ttaani anaawore ovollowa m'millakoni mwahu?

¹⁴ Kineerewuullakani moollikana ni mitteko ddanyu. Kineerohella munllo enyumbaanyu yoomwene nave oneeroshellelliha erive ello yawaapheella. Mi Apwiya koollota.’ ”