Yeremiya 20 - Mawu a Mulluku

Yeremiya ni Pashuri

¹ Vano Pashuri mwaana a Imeri aamwiiwa Yeremiya allotellaka ddeko. Olliye aari mullupa mukutho oyo aari kapitawo o enyumba ya Apwiya.

² Vano Pashuri aalamula wi athu emuukuthe Yeremiya nave emuhiye mundendeni Mullako Wavaddullu wa Benjamini o enyumba ya Apwiya.

³ Ohinase Pashuri aamukhumiha Yeremiya mundendeni nave Yeremiya aamulleella Pashuri wi, “Apwiya khenaromollattho nnddina nawo wi Pashuri koma wi, ‘Ddawoopiha Orive Weko.’

⁴ Apwiya weekhiiwa aallota wi, ‘Kineerewuutthattusa yawoopiha wa weekhaawo navettho wa akhwaawo attheene. Akhwaawo eneerewiiphiwa ni adaniiwa ni nsupada woonaka ni miitthwaawo. Nave Yuda muttheene kineeromuvelleella wa mwene a o Babiloni. Amodda eneeropharelliwa wuukaporoni o Babiloni nave amodda eneerowiipha ni nsupada.

⁵ Eyuuma ettheene ya m'muzindanimmu, mphuro muttheene wa muttekwiiwa, ddeko ddittheddene ddoowallamella mutengo ni eyuuma ya mamwene a o Yuda ddineerovelleelliwa wa adaniiwa. Alliwa eneerewaakha ddennddo ni oddiyaana o Babiloni.

⁶ Nave we Pashuri ni attheene a munibanjani nawo eneerewuupharanittho okaporo wuuyaanani o Babiloni. Munaakhwelle ni ovitthiwa wenko, weyaano ni akhwaawo ayo waallotelleewe ddawoottha.’ ”

Okhupanya wa Yeremiya

⁷ Nyu Apwiya, mookilleka, ddawoona, kaallekeya. Nyu tti amasiva okikhwaranya miyaano, ddawoona, mookigonjiha. Arive muthu animakittheya nllapo nittheene, arive muthu animakivevulla moohihiyerera.

⁸ Voollotani, kinnawelliha mawu, kinnakhuwa wi, “Ekhoto wuno, nohoonongeya!” Nyu Apwiya, mawaanyu aakitthattusa oovevulliwa ni oohumullulliwa mallapo mattheene.

⁹ Kallota wi, “Ngiwa kiwuupuwellattho Apwiya, ngiwa killotellattho mu nnddina niwa.” Apwiya, mawaanyu ennakhara wonanko munllo m'murimani mwaka. Kinneeseesa waasunga muwari koma vatulli viwa kinnaakhumiha, oohivillella.

¹⁰ Kinnawiiwa anchichi enong'onaka wi, “Ddawoopiha ddiri orive weko!” Enallota wi, “Khaweni mwamootthere! Hankoni namusumelle!” Akhwaaka ennatiyerella olephela waka, ennallota wi, “Apaalle ttuumootthella, sika nineeromuphara wi nimuhokolloselle ddoonanara.”

¹¹ Koma Apwiya eri ni miyaano, alliwa sika mullupa akhoto awoopiha, ekaamba ya yeella ookihoosa eneerokwakwatuwa, ddawoona, khepambana. Eneerowulliwa muru wunchichi ekaamba yookilephela, eneeromora ekhove moohitiwalleya.

¹² Nyu Apwiya Amasiva Mattheene, munnaweeruza athu moolungama. Kinnavelleella mullatwaaka wa nyuwaano wi mwaahokolloselle ddoonanara adanaaka.

¹³ Muwiipelle nchipo Apwiya, mwaatitimihe alliwa vawi ennaavullusa oohoowa wa adaniiwa.

¹⁴ Nitembeleliwe nllapo na oyariwa waka, nihitthamalliwe nllapo nno yakiyanre amoowaaka.

¹⁵ Atembeleliwe oyo aahakallallihalle attiitthaaka ni othenga wawi, “Onyumbani wanyu wooyariwa mwaana aamullopwana.”

¹⁶ Muthu yooyo akhalle wonanko mizinda nndde Apwiya yoonongilliiwa moohimoriwa ethakaraka. Iiwe winlla wa ovoreya ohinase, onyakulla wa akhoto otthaana

¹⁷ kaambiiwa khaakiiphalle kihinayariwe wi erukullu ya amoowaaka etthattuwe mahamaaka.

¹⁸ Ethiyo kayarelliwe tini? Ethiyo kayarelliwe ohoowa ni ethakaraka wi okumaaka omallelle mu owulliwa muru?