Yeremiya 19 - Mawu a Mulluku

Epalli yoophweeya

¹ Apwiya yaakilleella wi, “Khawe wakulle epalli wa awoopa. Waakuse amodda mwa attekweene a athu ni amodda mwa uullupalli a allupa mukutho.

² Muye o ntapo na Mwaana a Hinomu vakhuviru ni mullako wa Mavalli wi wallalleye nnddo kinuulleelleemi

³ wi, ‘Nyu mamwene a o Yuda ni attheene a o Yerusalemu, ngiiwani mawu a Apwiya. Apwiya Amasiva Mattheene, Mulluku a Israele.’ Enallota wi, ‘Kineeromorihella otulli wawoopiha vanipuroninna ophiyera wi arive muthu iiwa ddenndda aneerorurumuwa wunchichi.

⁴ Kineere ddenndda ekaamba yawi athu aakikhoota nave aaripiha nipuronna. Enoosella lubani* milluku ddeelleto nnddo alliwa, makhollwiiwa ni mamwene a o Yuda yahiddidduwenlliiwa. Nave vanipuroninna yaamorihellavo nikhame na athu oohilakwa.

⁵ Yaamaka nipuro noomullapellamo Baala mmo yaavelleelliiwa aniiwa wi ekhalle mikutho ddooshellelliha. Ddenndda ngaalamunle apaalle oddiganizera naari vang'ono.

⁶ Sika vano enthawi enimawa mvo nipuronna khaniwa niromolliwattho Tofeti apaalle ntapo na Mwaana a Hinomu koma ntapo na Wiipha.

⁷ Va nipuro nenna kineerovirikaniha yoolinga ya athu a o Yuda ni a o Yerusalemu. Athu a mwemmo kineerowiiphiha wa adaniiwa okhotoni nave kineerowoonongiha wa athu awiitanana. Mitembo ddiwa kineerodditthattusa yoocha ya epallame ni enama ddamuhakani.

⁸ Muzindoolla kineerowutthattusa nipuro nawunkha ni nawoopiha musoonyo. Arive muthu ooviravo oneerekoriiryiwa mwiilli vawoonani woonongeya wiwa.

⁹ Kineerewaawatihera athwaayo wi yaattakhune aniiwa aallopwana ni aatthiyana. Eneerottakhunana va enthawi yawoopiha vawaapheelliwani ni adaniiwa wi yaahoose.’ ”

¹⁰ Sika Apwiya yaakilleella wi kiyipwese epalleelle vamiitthoni va athu yathaanane ni mi

¹¹ nave wi kaalleelle wi Apwiya Amasiva Mattheene enallota wi, “Kineerewaapwesa athu yaalla ni muzindoolla wonanko mmo epalliilla yapweselliwiiwa oohipotokoseyattho. Athu ookhwa eneerovitthiwa o Tofeti ekaamba yawi orive weko khowa okhalla nipuro nowaavittha.

¹² Mmu sika kinaaneerelleemi nipuronna ni athwiiwa. Nave muzindoolla kineerowutthattusa Tofeti.

¹³ Enyumba dda o Yerusalemu ni dda mamwene a o Yuda kineerodditthattusa ddooripihiwa wonanko Tofeti kaambiiwa tti enyumba nnddo vaddullu viwa yooselliiwavo lubani wa etheneeri ddooddullu, enavelleella mikutho ddoowirya wa milluku ddimodda.”

¹⁴ Vano Yeremiya aawaawo o Tofeti nko Apwiya yamurumalliiwa wi allotelle nave ahiimella munthatoni na enyumba ya Apwiya nave ahaalleella athu attheene wi,

¹⁵ “Apwiya Amasiva Mattheene, Mulluku a Israele, enallota wi, ‘Kineerowumorihella otulli muzindoolla ni va mizi ddiwa ddittheddene moollikana ni mmo kallotelleemi ekaamba yawi athwiiwa tti awumma murima nave enimakhoota wiiwellella mawaaka.’ ”