Yeremiya 18 - Mawu a Mulluku

Awoopa epalli ni olloko

¹ Mawu a Apwiya yaawa wa miyaano wi,

² “Timulla oye o enyumba ya awoopa epalli, wenko oneerewiiwa mawaaka.”

³ Sika kaaya o enyumba ya awoopa epalli nave kaamphwanya oopaka vawoopellavo.

⁴ Nave epalli emodda yaphwanyeya wi yohoonongeya eri m'mattani mwaye vawoopani, aanoopattho ni olloko yooyo epalli emodda moollikana ni opaalla waye.

⁵ Vano Mawu a Apwiya yaawa wa miyaano wi,

⁶ “Nyu Aisraele, ethiyo mi ngiwora weera ni nyu wonanko aneerella awoopa epalloolla? Ngoonani, muri m'mattani mwakammu wonanko olloko m'mattani mwa awoopa epalli.

⁷ Kachenjeza mutundu wa athu apaalle omwene wi kineerowukuha ni owoononga,

⁸ mutundu oyo kiwuchenzeemi wahiya machimwiiwa ngiwullaka moollikana ni mmo kaganizelleemi.

⁹ Emoddamoddave kapaalla waambiha apaalle okeraatthiha mutundu wa athu apaalle omwene

¹⁰ koma mutundooyo waavirellellaka weera ddoonanara vamiitthoni vaka, ohiiwellella mawaaka ngiweerella ddaphaama nnddo kaganizelleemi.

¹¹ Khawe vano waalleelle athu a o Yuda ni a o Yerusalemu wi Apwiya enallota wi, ‘Mi kookhozekella wuumorihellani otulli ni wuullakani. Nyu attheene, hokollowani, arive muthu ahiye ettilla ddaye. Nave potokosani makhallellwaanyu ni ddaweera ddanyu.’

¹² Koma alliwa eneerewaakhulla wi, ‘Ddennddo khaddinna mutteko. Nineereke ddoopaalla ddahu nave arive muthu anaathwareke ddoonanara dda murimaaye wawumma.’ ”

Athu enaakhoota Apwiya

¹³ Apwiya enallota wi, “Akohe athu a mitundu ddimodda ddittheddene, aarimi arivo oyo aambilleke wiiwa ddenndda. Israele olle aari wonanko namwalli, oheera yoonanara wunchichi.

¹⁴ Ethiyo nakhuttu annamalla va malluku a va mwaango wa Lebanoni? Ethiyo mihinje dda maaddi ooriirya oovenyera o mwaango wa Lebanoni ddinnawelleella?

¹⁵ Kheddiiddo! Koma athwaaka aakitiwalla, enoosella lubani* milluku ddawoottha nnddo ddaakwakwatuwiha mu ettilla ddaka ddakhalle, eneeta mu ettilla ddamuhakani, ohiya musewu waphaama.

¹⁶ Ellapwiiwa aayitthattusa ntepe ni yoonyaambusiwa wa enthawi yoohimalla. Arive muthu ooviramo aneerekottikhina navettho aneerekotikha muru.

¹⁷ Kineerewaapallallesa wonanko ephevo ya woovollowa nndduwa, eneerothawa voophiyani adaniiwa. Kineerewaareya etulli oohaakavihera va enthawi ya ddoohoosa ddiwa.”

Athu eniiwanana ddoomweerella echiwembu Yeremiya

¹⁸ Vano athu yaallota wi, “Hankoni niiwanane ddoomweerella echiwembu Yeremiya wi nivirellelle okhalla ni allupa mukutho oonihoollella, athu eezeru oonilangiza ni anamallotella oonillalleyella mawu a Mulluku. Hankoni nimwiipe mullatu nave nihiye opwatha mawaaye.”

¹⁹ Sika kaavekella wi, “Nyu Apwiya, kaapelleni maaru nave iwani nnddo adanaaka enallotiiwa dda miyaano.

²⁰ Ethiyo yoonanara ttuukhalla mallivello a ello yaphaama? Koma aakikatella nlliti wi kimorellemo. Upuwellani wi kaawa wa nyuwaano waavekellella wi muhaashelle murima.

²¹ Koma vano allakeni aniiwa ni ettalla ni ekhoto. Awariwa ekhalle anaamukhwelle, ehikhallena anamwani. Amamuniwa ekhwe ni mullilli nave asombwiiwa ekhwe ni nsupada okhotoni.

²² Mwaarumihelle mulloko wakhoto moorurumusa nave winlla wawoova wiiweye mu enyumba ddiwa vawi alliwa aakikatella nlliti nawi akivokhellemo nave aareya manyallwaaka musampha.

²³ Nyu Apwiya, munnadduwella eziwembu ddiwa ddittheddene ddoopaalla okiipha. Muhaakhululukelle ddoonanara ddiwa apaalle waavenyihellavo machimwiiwa. Egonjihiwe vamiitthoni vanyu nave mwaallake mu osha murima wanyu.”