Yeremiya 17 - Mawu a Mulluku

Ochimwa ni ollakiwa wa Yuda

¹ Apwiya enallota wi, “Machimo a Yuda elembiwe ni yoolembella yamukoko, ya etthoka yanlluku na daimondi va mirimani ddiwa ni va makuwiiwa.

² Aniiwa ennuupuwella mapurwiiwa oollapellamo ni mafanwiiwa a Asherimu vatthi va orive muteekho woovattha mwiillaponimmo.

³ Eyuumaanyu ni katundwaanyu muttheene kineeroddivelleella wa awaakha wi okhalle olliva wa machimwaanyu aweereya mwiillaponi mwanyu mutthemwene.

⁴ Muneerotathilla ellapo eyo kuuvahilleemini wi ekhalle yoohallanaayu. Kineerewuutthattusani akaporo awaarumeyella adanaanyu mu ellapo eyo muhinayidduwelleenyu vawi owallaaka oneerokhara wonanko munllo woohithiimiheya.”

Ezeru yoovenyera wa Apwiya

⁵ Apwiya enallota wi, “Otulli wa oyo anamuroromella muthu, oyo anahameella va muthu wi amukavihere, anakihiya mi Apwiya.

⁶ Ari wonanko nikukhu muchipululuni, khanoona ddaphaama voophiyani. Anaakhalle muutthakoni moohikhalla maaddi, mu ellapo yamwiinyu, moohikhalleya.”

⁷ “Koma oodala tti muthu oyo anaaroromella Apwiya, oyo anahameella va alliwa.

⁸ Ari wonanko muteekho wawaalliwa mukhwipi mwa muhinje, woorapa misisi ddiwa museresere mwa maaddi. Khonoova enthawi yooviha ekaamba yawi makukhwiiwa khenanyaalla. Va enthawi yoorama murimu khonakhupanya, khonahiya wimma ezipaso.”

⁹ “Murima wa muthu tti woolleka okhwaranya ddeko ddittheddene. Tti woonanara moohichiriheya, ttaani anaawore owiiwesesa?

¹⁰ Mi Apwiya kinnawumolleella murima nave kinnaweesa maganizo wi kimweerelle arive muthu moollikana ni ettilla ddaye moophwanellella ni mitteko ddaye.”

¹¹ Muthu oophwanya eyuuma mwawoottha ari wonanko ekhwalli yoopuramella mooche ehaarenlliiwa. Vihinallekelle eyuumeeyo ennammallella, voomallihella annatthattuwa ookarangeya.

¹² Enyumbaahu yoollapellamo tti mpando woomwene wantitimiho, wookeraattheya va mwaango woorekama waambeella khalle.

¹³ Nyu Apwiya, etiyerello ya Israele, attheene awuukhootani eneerowullihiwa muru. Attheene awuuhiyani eneerothiimihiwa wonanko manddina oolembiwa muthayani ekaamba yawaahiya Apwiya, neetuutu ookumi.

Yeremiya anaaveka Apwiya wi emukavihere

¹⁴ Nyu Apwiya, kichiriheni nave ddawoona kineerochira. Kivulluseni nave ddawoona kineerovulluwa ddawoona. Nyu tti oyo kinamuthokozeemi!

¹⁵ Ngoonani, athu enallota wa miyaano wi, “Nndde yallota Apwiya ddiri wuuwi? Ddeereyettho wi niddoone!”

¹⁶ Koma Apwiya mi nguuwatihereni wi muweena ddoohoosa. Munnadduwella wi nllapo na otulli nginanikhallella munkhella nave ddittheddene nnddo kallotilleemi munnaddidduwella.

¹⁷ Muhikoopopihe vawi nyu sika muri voothawellavo vaka va nllapo na otulli.

¹⁸ Koma mwaawullihe muru ookihoosa, ohiri miyaano. Muwoopopihe alliwa, ohiri miyaano. Nllapo na otulli naamorelle nave muwoononge moohihiyerera.

Osunga nllapo na Sabata

¹⁹ Apwiya yaakilleella wi, “Khawe wiimelle va mullako muullupalli woovirellavo athu anchichi mvo vinavollowella ni okhumella mamwene a o Yuda. Oyettho o millako ddittheddene dda o Yerusalemu.

²⁰ Waalleelle mamwene a o Yuda ni athu a o Yuda ni athu attheene ookhalla mu Yerusalemu, oovollowella va millakonndda wi yiiwellelle mawu a Apwiya.

²¹ Apwiya enallota wi mwapaalla osunga okumaanyu pwathani phaama nllapo na Sabata, muhimutukhulle katundu apaalle ovollowana va millako dda Yerusalemu.

²² Muhimutukhulle arive katundu okhumana mpa mwanyu apaalle ophara orive mutteko va nllapo na Sabata. Koma musungeke nllapo na Sabata wi nikhalle noopatuleya moollikana ni mmo kaalamulelleemi makhollwaanyu.

²³ Alliwa kheyiiwellelle apaalle opwathawo koma ni mirima ddawumma yaakhoota wiiwa ni waakhella malangizwaaka.”

²⁴ Vano Apwiya enallota wi, “Koma nyu mukiiwellelleke mi, muhiye omutukhulla katundu apaalle ovollowana va millako dda muzindoolla va Nllapo Sabata nave munisungeke oohiphara mutteko va nllapo nenno.

²⁵ Mwathwara ddenndda va millako ddenndda vinaavollewelleke mamwene ookhalla va mpando woomwene wa Davide. Enaavolloweke ewenlle va magareta ni va akavalo vamodda ni enduna ddiwa navettho athu a o Yuda ni a o Yerusalemu. Nave athu eneerokeraattheya mu muzinda yoolla wa enthawi yoohimalla.

²⁶ Athu eneerekovenyera o mizinda dda Yuda ni echigawo ettheene yawaapheella Yerusalemu, echigawo ya Benjamini, yamatapo, yamiyaango ni yoomwera, ekusalle mikutho ddooshellelliha, mikutho dda ddoocha, mikhutho ddalubani* ni mikutho ddoothokozella, oyaana o enyumba ya Apwiya.

²⁷ Koma mwaahikiiwellella, mwaahisunga Nllapo Sabata naka wi nikhalle noopatuleya nave mwamutukhulla arive katundu munavollowana va millako dda Yerusalemu va nllapo na Sabata kineerewoosa millako ddennddo. Munllo woohithiimiheya oneeroshellelliha enyumba ddoomwene dda o Yerusalemu.”