Yeremiya 16 - Mawu a Mulluku

Yoolinga ya Apwiya va okumi wa Yeremiya

¹ Mawu a Apwiya yaawa wa mi wi,

² “Ohitthella apaalle waayara anamwani aallopwana apaalle aatthiyana mu nipuro nenna.

³ Ollota dda anamwani aallopwana apaalle aatthiyana ooyarelliwa wuno apaallettho dda ameewa ni attiitthiiwa ayo yaayarille anamwanaayo mu ellapommu,

⁴ attheenaayo eneerokhwa ni ereta ddawoopiha. Malirwiiwa kheyinllelliwa apaalle ovitthiwa mu mahame, enaakhalle wonanko manyowa oomwareyella vatthi. Amodda enaakhwe ni ekhoto nave amodda ni ettalla. Nave mitembo ddiwa ddinaakhalle yoocha ya epallame ni enama ddamuhakani.”

⁵ Apwiya enallota wi, “Ohivollowe mu enyumba ya maliro. Ohivollowemo wi winlle apaalle waakhurumusa murima athu vawi koowaakha murendellaaka, echikondaaka yoohisintheya ni echifundwaaka.

⁶ Uullupalli ni ang'onong'ono, attheene eneerokhwa mu ellapommu koma malirwiiwa kheyinllelliwa apaalle ovitthiwa. Khaavo oyo anoonihe ethakaraka vawiiremaremani apaalle ochema meehi ekaamba ya malirwaayo.

⁷ Khaavo oyo anaamuvahe yoocha muthu awinlla wi amukhurumuse murima ekaamba ya ookhwaayo. Khamuvaha yoowirya wi amukhurumuse murima naari ookhwaayo eri attiitthinnya apaalle amennya.

⁸ “Ohivollowe mpa mmo muri machellello wi ochena ni owiryana.”

⁹ Apwiya Amasiva Mattheene, Mulluku a Israele enallota wi, “Vano va nipuro nenna kineerewaamalliha mawu eehakallallo ni oothapella nave kineerovenyihavo mawu a ootthella ni ootthelliwa nyu moonaka.

¹⁰ “Vano waalleella athwaayo mawu yaalla, yakoha wi, ‘Kaambiiwa tini Apwiya ellotilliiwa wi otulli wawiddiidda onimorella hiyaano? Ethiyo nilakwille tini? Ethiyo naachimwenlle tini Apwiya Mullukwaahu?’

¹¹ Vano weyaano waakhulle wi, ‘Ekaambiiwa tti yawi makhollwaanyu yaakihiya mi Apwiya. Yaathwara milluku ddimodda enaddirumeyella ni oddillapella. Yaakihiya miyaano nave kheyiiwellenlle malamulwaaka.

¹² Komattho nyuwaano mwaachimwa wunchichi okhwaranya makhollwaanyu arive muthu mwa nyuwaano anathwara ddoonanara ni murimaaye wawumma munipuroni mookiiwellella miyaano.

¹³ Sika kineerowiikarihani mwiillaponimmu ni wuuvollochihani mu ellapo eyo nyuwaano ni makhollwaanyu muhinayidduwelleenyu. Wenko muneerorumeyella milluku ddimodda otthaana ni mahiiyu kaambiiwa ngiweerellanittho echifundo.’ ”

Okhuma mu ellapo yeelleto

¹⁴ Sika ekaambiiwa Apwiya enallotiiwa wi, “Mallapo enimawa mvo athu khellupellakattho wi, ‘Vamiitthoni va Apwiya Ookumi ayo yaakhumihalle Aisraele o ellapo ya Iguputo.’

¹⁵ Koma eneereke wi, ‘Vamiitthoni va Apwiya ayo yaakhumihalle Aisraele o ellapo ya ompoto ni o ellapo ddittheddene nko yaapallalleselliiwa!’ Kineerewaahokollosella o ellapo eyo kaavahilleemi makhollwiiwa.”

Apwiya eneerewaallaka Aisraele

¹⁶ Apwiya enallota wi, “Kineerowiithana adani anchichi wonanko awiipha ehomba nave eneerewaaphara athwaalla. Vatulli viwa kineerowiithana adani amoddattho anchichi wonanko oosaya enama wi yaaphare athwaalla omiyaangoni, o asimiyaango ni m'makhunguni a m'mallukuni.

¹⁷ Miitthwaaka ennoona makhallellwiiwa mattheene oonanara nave tti oohiipittheeya vamiitthoni vaka. Khaniivo naari nichimo nimodda nno kihinanidduwelleemi.

¹⁸ Kineerewaahokollosella ddoonanara mookhwaranya ekaamba ya onanara wiwa ni machimwiiwa ekaamba yawi aaripiha ellapwaaka ni mafanwiiwa ayo tti wonanko mitembo nave ellapo eyo eri yoohallanaaka yaaddallihamo mafanwiiwa oonanara.”

Yeremiya anavekella mowaaroromella Apwiya

¹⁹ Nyu Apwiya tti masivaaka ni mpandaaka, voothawellavo vaka va enthawi ya ddoohoosa. Athu a mitundu ddittheddene eneeroowa wa nyu ovenyera o makomello mattheene a ellapo yavatthi. Nave eneerollota wi, “Makhollwaahu yaakhalla ni milluku ddawoottha, yaakhalla ni mafano oohikhalla ni mutteko.

²⁰ Ethiyo muthu ttuuwora wiipangella milluku ddawoona? Apanga, kheddikhalla milluku.”

²¹ Apwiya enallota wi, “Ekaamba ya yeella kineerewaahuddiha omoddave wenngu wi edduwelle masivaaka oopambana. Nave eneerodduwella wi nnddina naka tti Apwiya.”