Yeremiya 15 - Mawu a Mulluku

Otulli wa athu a o Yuda

¹ Vatulli viwa Apwiya yaakilleella wi, “Naari Mose ni Samuele yiimenlleke vamiitthoni vaka yaavekellaka athu yaalla, ngaamoriwelle ethakaraka. Avenyihenivoni vamiitthoni vaka, eye nko.

² Nave Yuukoha wi, ‘Ethiyo niye wuuwi?’ Waalleelle wi mi kinallota wi, ‘Oophwanella okhwa enaaye wuukhwaani, a o nsupada enaaye onsupadani, a o ettalla enaaye ottallani, a o okaporo enaaye wuukaporoni.’

³ “Kineerewaamorihella ddeko ddiraru wi ddiwoononge monga nsupada noowiipha, anapwa oolluma, epallame ni enama ddamuhakani wi ddiwiiphe ni waattakhuna.

⁴ Kineerewaatthattusa ello yawoopiha wa athu a moomwene mattheene a va ellapo yavatthi ekaamba ya nnddo Manase mwaana a Hezekiya, mwene a o Yuda, eerilleeye o Yerusalemu.”

⁵ Apwiya enallota wi, “Ethiyo ttaani anuumorelle ethakaraka we Yerusalemu? Ethiyo ttaani anuurukunuwelleni uupwatheni? Ethiyo ttaani anaawuupwatheni?

⁶ Mi mwaakihiya, munnavirellellave okireya etulli. Sika kahuullakani ni owoonongani ni muwonwaaka ekaamba yawi kaatopa ni okhululuka.

⁷ Kahaapallallesella nngu ni nngu, wonanko mmo eneerelliiwa vooveethani ni etthello. Kaawoononga athwaaka ni aniiwa kaambiiwa kheyaapanlle ohiya ddoonanara ddiwa.

⁸ Kawoonjerera anaamukhwelle okhwaranya mihava ddoonyanja. Amoowe kaawoonongella aniiwa eri asombwe, moorurumusa kahaamorihella otulli ni otathilla murima.

⁹ Moowe a anamwani atthanu ni eelli oongomowa, anavumella muddullu. Epiphi yommorella otthaana, oowullihiwa muru nave murima onimamvoreya. Oohalla attheene kineerewaavelleella wa adani wi ewiiphe ni nsupada. Mi Apwiya koollota.”

Yeremiya anakhupanya vamiitthoni va Apwiya

¹⁰ Nyu amoowaaka, mi kookhalla ni otulli vawi mwaakiyara mi muthu ookangana ni oovaanyana ni athu a va ellapo ettheene. Ngipolleyille erive ello wa muthu apaalle omupolleya ello muthu komave athu attheene enimakitembelera.

¹¹ Apwiya yaakaakhulla wi, “Ddawoona, kineerowaakihera wi ophwanye phaama. Ddawoona, adanaawo eneerewullapella va enthawi ya otulli ni ddoohoosa.

¹² Khaavo muthu anaawore ophadda mukoko, mukoko woompoto woottakanyihera ni mukuwa.”

¹³ Apwiya yaallota wi, “Kineerovelleella eyuumaanyu ettheene ni katundwaanyu wa adanaanyu moohillivella ekaamba ya machimwaanyu manchichi mu ellapo ettheene.

¹⁴ Kineerewuutthattusani akaporo a adanaanyu mu ellapo eyo muhinayidduwelleenyu vawi owallaaka wookhara nave oneerewuushellellihani.”

¹⁵ Mi kaallota wi, “Nyu Apwiya munnadduwella ddittheddene. Mukuupuwelle nave mukikavihere miyaano. Mwaahokolloselle ddoonanara athu ookihoosa nave muhaakhurumuwelle. Muhikaakhe okumi vawi munnadduwella wi kinnanyaambusiwa ekaamba ya nyuwaano.

¹⁶ Kiiwalleemi mawaanyu kaawaakhella wonanko yoocha nave yaakivaha othapella ni ehakallallo. Nyu Apwiya Amasiva Mattheene, valle miyaano kinadduwelliwa ni nnddina nanyu.

¹⁷ Ngaakhanlle m'mutthukumano wa athu oovudduwa naari ohakallallana alliwa. Koma kahanlle meekha ekaamba yawi nnatta nanyu niri va miyaano nave mwaaddalliha owalli murimaaka.

¹⁸ Kaambiiwa tini ddoohoosa ddaka ddihinamalliiwa, nikhwata naka nihinavolliiwa? Ethiyo munapaalla mukilleke wonanko mwanamuhinje wawumma apaalle muhinje woohikhalla ni maaddi?”

¹⁹ Sika Apwiya yahaakhulla wi, “Wahokollweella wa mi, kineerowaakhellattho nave oneerokirumeyellattho. Waallotaka ddawoona ohiri ddoohikhalla ni mutteko onaakhalle namallotellaaka. Athu yaalla eneerohokollweella wa weyaano koma we khohokollweella wa alliwa.

²⁰ Kineerewuutthattusa oollipa wonanko mpanda wamukuwa wa athwaayo. Alliwa eneerollipana ni we koma kheyuupambana vawi kiri ni we wi kiwaakihelle ni wuuvullusa.

²¹ Kineerowakihera wa athu oonanara nave kineerowoopolla wa athu eekuku. Mi Apwiya koollota.”