Yeremiya 14 - Mawu a Mulluku

Ettalla yawoopiha

¹ Mawu a Apwiya yaawa wa mi Yeremiya oollota dda ettalla wi,

² “Yuda animinlla, mizinda ddaye ddinimahoowa, athwaaye ahiikuha moomoriha ethakaraka, Yerusalemu aninllella nikavihero.

³ Eeyuuma ennaaruma allupa muttekwiiwa wi yarike maaddi, ennaphiya wiihimeni koma khewuri maaddi, sika ennahokollowa ni mino muhiri ello. Ennawulliwa muru nave ahiimella muru, ennawaramella vatthi.

⁴ Vatthi vookhalla mitthari vawi khewuri murimu, Oollima ennawulliwa muru, aawaaramella vatthi.

⁵ Naari epaalla ennamuhiya mwanaye ooyariwa wene ekaamba yawi munyepu woomalla.

⁶ Embizi ddinniimella vamutundani ddihinna ello, ddinnavumella muddullu wonanko khatwe. M'mwiitthoni moowa epiphi ekaamba yoorama munyepu.”

⁷ Athwaaka eninllella wa miyaano wi, “Nyu Apwiya, mweerevo ello ekaamba ya nnddina nanyu naari machimwaahu enihumullullaka aneeniihu, ohiroromelleya wahu tti wuullupalli, ddawoona, nohuuchimwellani.

⁸ Nyu Apwiya tti etiyerello ya Israele, oovullusaaye va enthawi ya ddoohoosa. Kaambiiwa tini munakhalleenyu wonanko mulleto mu ellapo ella, wonanko avoolendoni ookona mahiiyu mamodda?

⁹ Kaambiiwa tini munakhalleenyu wonanko awiimella muru, wonanko akhoto oohiwora ovullusa? Komave nyu Apwiya muri variyari vahu, ninnadduwelliwa ni nnddina nanyu, muhinihiye weekhiihu.”

¹⁰ Apwiya enallota dda athu yaalla wi, “Ennaddivelliwa weeteeta nko enapaalliiwa nave khenawora wiivaanyiha. Sika mi Apwiya nginawaakhella nave kineerewuupuwella onanara wiwa, kineerewaallaka ekaamba ya machimwiiwa.”

¹¹ Vatulli viwa Apwiya yaakilleella wi, “Ohaavekellelle athu yaalla, owaashella ddaphaama.

¹² Naari ehanlle ocha ngiiwa winlla wiwa. Naari evelleelleve mikutho ddooshellelliha ni dda ddoocha, ngaakhella. Koma kineerowoononga ni ekhoto, ettalla apaalle mullilli.”

¹³ Koma miyaano kaallota wi, “Ha, nyu Apwiya Mulluku, anamallotelliiwa enaalleella athu wi khewa ekhwa ni ekhoto nave khamuwa mumora ettalla mwiillaponi mwahu koma munaakhalle murendelleve.”

¹⁴ Koma Apwiya yaakaakhulla wi, “Ddawi anamallotellaayo ennallotella mu nnddina naka tti ddawoottha. Ngaatthoollille apaalle waaruma apaalle ollota ni alliwaayo. Alliwa enallotella ddawoottha nnddo eneeriiwa eddoonille m'masomphenya. Enoombesa mwawoottha, nnddo enallotiiwa tti dda m'muruni mwiwa.

¹⁵ Sika mi Apwiya kinallota dda anamallotella yaalla ayo enallotella munnddina naka naari kihaarumme, ayo enuulleellani wi khemukhwa ni ekhoto apaalle ni ettalla mwiillaponimmu wi kineerowiipha ni ekhoto apaalle ni ettalla.

¹⁶ Athu ayo yaallotenlliiwa eneerovokhelliwa m'misewuni dda mu Yerusalemu, ekhwille ni ekhoto apaalle ni ettalla. Alliwaayo, awariwa, aniiwa aallopwana ni aatthiyana, attheene eneerokhwa nave khavikhalla awaavittha. Kineerewaahokollosella ddoonanara.”

¹⁷ Apwiya yaakilamula wi kaalleelle athu dda ethakaraka ddaka wi, “Miitthwaaka eneerovirellella omora miitthori otthaana ni mahiiyu vawi athwaaka ookondiwa aakhalla ni nikhwata nuullupalli, aaphoriihiwa moonanara.

¹⁸ Kaaweetaka ohakani, kinnawoona awiiphiwa vakhotoni. Kaavollowaka m'muzindani, kinnawoona ookhwa ni ettalla. Anamallotella ni allupa mukutho ennavirellella ophara mitteko ddiwa mwiillaponi, koma khenadduwella nnddo eneeriiwa.”

Athu enapepesa wa Apwiya

¹⁹ Apwiya, ethiyo athu a o Yuda mohaatathilla? Ethiyo athu a o Ziyoni ennuunanarani mwaawoonaka? Kaambiiwa tini munoonongilleenyu mwawi ddiidda ophiyera wi khaninaworattho ochira? Natiyerella murendelle koma ddeko khaddineetenlle phaama. Natiyerella ochira koma nakumanne ni ddawoopihave.

²⁰ Nyu Apwiya, nohuuchimwellani wunchichi, ninnaakhullella machimwaahu ni a makhollwaahu.

²¹ Muhinitathille ekaamba ya nnddina nanyu, Muhivevulle mpandwaanyu woomwene ni wantitimiho. Upuwellani echipanganwaanyu ni hiyaano nave muhiyitathille.

²² Variyari va milluku ddawoottha dda mitundu ddimodda, ethiyo ookhallavo mulluku mmodda oowora omurupiha murimu? Ethiyo oddullu vaweekhiiwa onnamurupiha murimu? Otiyerella wahu ori mwa nyuwaano Apwiya Mullukwaahu ekaambiiwa tti nyuwaano muneera ddenndda.