Yeremiya 13 - Mawu a Mulluku

Ekuwo yoomakella muyuununi

¹ Apwiya yaakilleella wi, “Khawe wakulle wa ekuwo yabafuta wamakelle muyuununi koma ohiyiruweye m'maaddini.”

² Sika kaaya kakulla ekuwo moollikana ni mmo Apwiya yakilleellelliiwa nave kaawumakella muyuununi.

³ Apwiya yaakilleellattho wiilli wi,

⁴ “Kusa ekuwo wakunlleeweelle nave oyimakelle muyuununi. Khawe mwawaakuva o muhinje wa Yufurate wayivitthe m'mittharini mwa malluku.”

⁵ Sika kaatimulla kiya kawuvittha ekuweeyo o Yufurate moollikana ni mmo Apwiya yakilleellelliiwa.

⁶ Viviralle mallapo manchichi Apwiya yaakilleella wi, “Khawe o Yufurate wakuse ekuwo yamuyuununeelle kuulleelleemi wi wayivitthe.”

⁷ Sika kaaya o Yufurate nave kaakata vanipuroni kayivitthalleemi nave kaayikusa. Koma kahoona wi yahoonongeya nave kheyaarittho ni mutteko.

⁸ Apwiya yaakilleellattho wiilli wi,

⁹ “Mmu sika kinoonongelleemi wiitukhulla wa Yuda ni wiinyarulla wa Yerusalemu.

¹⁰ Athu oonanaraalla aakhoota wiiwellella mawaaka yahumma murima, yaathwara milluku ddimodda ni oddillapella. Alliwa enaakhalle wonanko ekuwo yoohikhalla ni muttekoolla.

¹¹ Wonanko ekuwo enaangellella muyuununi mwa muthu, emoddamoddave yeeyo, kaakeraatthiha wi nibanja nittheene na Israele ni na Yuda nikiwanddeellelle wi attheene ekhalle athwaaka wi ellapelleke ni otitimiha nnddina naka koma alliwa kheyiiwellelle.”

Muno wavinyo

¹² Apwiya yaakilleella wi, “We Yeremiya, khawe waalleelle athu a o Israele wi orive muno oddallihiwe ni vinyo. Alliwa eneerewaakhulla wi, ‘Ninnadduwella phaama wi orive muno oddallihiwe ni vinyo.’

¹³ Vano waalleelle wi, mi Apwiya kineerewaawiryiha vinyo athu attheene a mwiillaponimmo ophiyera elezele. Alla tti monga mamwene ookhalla va mpando wa Davide, allupa mukutho, anamallotella ni attheene ookhalla mu Yerusalemu.

¹⁴ Kineerowoopaniha miru wi enyenyane amoddamoddave, attiitthi ni aniiwa. Ngiweerella echifundo apaalle waamoriwella ethakaraka apaalle waakhululukella ophiyera kiwoonongille.”

Yeremiya anachenjeza dda wiitukhulla

¹⁵ Nyu athu a o Israele, ngiiwani nave apellani maaru, muhiitukhulleke vawi Apwiya sika enallota.

¹⁶ Atitimiheni Apwiya Mullukwaanyu, ehinamorihe epiphi wi mukwakwatuwe m'miyaangoni, ehinatthattuse owala nko mwatiyerellaanyu wi okhalle epiphi yoottikana.

¹⁷ Koma mwaahiiwellella, kineerewinlla m'murimanimurimani ekaamba ya wiitukhulla wanyu. M'mwiitthoni mwaka muneeroddalla miitthori ddoovoreya ekaamba yawi enkhosa dda Apwiya ddineerophariwa okaporo.

¹⁸ Mulleelle mwene ni amennya wi, “Kitthani va mipando ddoomwene vawi enduwira ddanyu ddooreera ddoomwene ddoomorella vatthi.

¹⁹ Mizinda ddanyu ddoomwera ddoowallelliwa otte nave khaavo mmodda anaawore oddihulla. Athu attheene a o Yuda aaphariwa okaporo.”

²⁰ Nyu a o Yerusalemu, tukhullani miitthwaanyu moone! Adanaanyu enavenyera ompoto! Ethiyo enkhosa nnddo ddahiyiwe m'mattani mwanyu ddiri wuuwi, enkhosa ddanyu ddooreeranndde?

²¹ Ethiyo muneere tini ddakeraatthihiwa wi mulamulelliweke ni ayo mwaweesaanyu akhwiinyu? Ethiyo khamoona ddoovoreya wonanko dda mutthiyana vooyarani?

²² Apaalle ttuuwiikoha wi kaambiiwa tini ddenndda dduumorenlliiwani. Ekaamba ya machimwaanyu awoopiha ddoowara ddanyu ddohaahulliwa nave moopharelliwa.

²³ Ethiyo Mkushi ttuusintha mooneyello a mwiillaaye apaalle nanthavi mankhaangaaye? Sika wi nyu ooddollweella ochimwanyu ttuuwora mwawiidde weera ddaphaama?

²⁴ Sika kineerewuumwarani wonanko mallulla oovava ni ephevo ya o chipululu.

²⁵ Muneerewaakhella ollaka nko kuukeraatthihelleemini ekaamba yawi mookitiwalla nave munaroromella milluku ddawoottha.

²⁶ Mi Apwiya kineerokwinya ddoowara ddanyu ophiyera omuruni nave muneerowulliwa muru.

²⁷ Kohoona ddoonanara ddanyu, oraruwa wanyu, minkhella ddanyu ni ohulaanyu omiyaangoni ni ohakani. Otulli nyu a o Yerusalemu! Ethiyo munaakhalleve ooheellihiwa ophiyera niini?