Yeremiya 12 - Mawu a Mulluku

Yeremiya anakoha dda echilungamo ya Apwiya

¹ Nyu Apwiya kaavaanyanaka ni nyuwaano, ddawoona, awoona munaakhalle nyuwaano, komave kineerewuukhupanyellani dda mullatwaaka. Ethiyo kaambiiwa tini athu oonanara ddeko ddinaweetelliiwa phaama? Ethiyo kaambiiwa tini oolleka enakhalliiwa mwamurendelle?

² Nyu mwaawaalla nave yaamella misisi, ennunnuwa nave enniima ezipaso. Muri muwano mwiwa koma mirima ddiwa ddiri woorekama ni nyuwaano.

³ Koma Apwiya munnakidduwella, munnakiweha nave munneesa murimaaka wi moone kaarimi kuukondakani. Mwaapurulle athu oonanara wonanko enkhosa ddookuselliwa wawiiphiwa, mwaahiye vakhwipi ophiyera nllapo nawi yiiphiwe.

⁴ Ethiyo ellapo eninlle ophiyera niini? Nave manasiiwa enaanyaalle ophiyera niini? Kheviri epallame apaalle enama ddoohalla vawi athu ookhallamo tti oonanara, enallota wi, “Mulluku khoona mamallihellwaahu.”

⁵ Apwiya yahaakhulla wi, “Waawuutopihaka othamaka ni athu ttuukhalla mwawiidde wi opikisane ni akavalo? Onakwakwatuwa mu ellapo yaphaama, ttuuwiidde mu otthako wa o Yordani?

⁶ Naari abalaawo ni a munibanjani mwawo alliwattho ennuulleka, attheenaayo enniiwanana va owiipa mullatu, ohaakhulupilile naari elloteve mawu ooddiva.”

Apwiya enaamorella ethakaraka athwiiwa

⁷ “Koovenyawo onyumbani waka, koohiya yoohallanaaka, koomuvelleella ookondiwa a vamurimani m'mattani mwa adanaaka.

⁸ Yoohallanaaka yookitthattuwella mukango wamuutthakoni, enakithurumella moowalli, sika ekaambiiwa kinawiitelleemi.

⁹ Yoohallanaaka tti wonanko epallame yamankhaanga, yawaapheelliwa otthewene ni aneekhwaambe. Khaweni mwatthukumanihe enama ddamuhakani, muweena o machellello.

¹⁰ Abusa anchichi yahoononga emataaka yampesa, yaanyingallella emataaka, emataaka yaphaama yaayitthattusa ntepe.

¹¹ Yaayitthattusa ntepe, enakinllella miyaano eri weekhiiwa. Ellapo ettheene yootthattuwa echipululu khaavo oyo anapwathawo.

¹² Athu awoononga aapallalleyella o asimiyaango a muutthakoni. Mi Apwiya kohaaruma akhoto wi yoononge ellapo ettheene, khaavo arive muthu anaakhalle mwamurendelle.

¹³ Athu yaammidda tirigu koma yahatille miiwa. Yahiitopiha voopharani mutteko koma kheyaaphunrevo ello naari vang'ono. Ddoohata ddiwa tti ddoowulliha muru ekaamba ya owalli wawoopiha wa Apwiya.”

Lonjezo na Apwiya wa awaatamana ni Israele

¹⁴ Apwiya enallota wi, “Athu oonanara attheene awaatamana ni Israele nave ayo enawaakha ellapo, yoohallana, eyo kaavahilleemi athwaaka kineerewaavenyihamo mu ellapo ddiwa nave kineerovullusa nibanja na Yuda m'mattani mwiwa.

¹⁵ Komave kaavenyihallevo kineeroweerellattho echifundo nave kineerohokollosella orive mutundu o yoohallaniiwa ni o ellapwiiwa.

¹⁶ Vano alliwa yahuddera phaama meetello a athwaaka nave yaamba ollupella mu nnddina naka wi, ‘Vamiitthoni va Apwiya Ookumi,’ wonanko mmo alliwa yaahuddihelliiwa ollupella mu nnddina na Baala, sika kineerewaakeraatthiha variyari va athwaaka.

¹⁷ Koma vaphwanyeya mutundu mmodda woohikiiwellella kineerowutthollosa.”