Yeremiya 11 - Mawu a Mulluku

Yeremiya ni echipangano

¹ Mawu a Apwiya yaawa wa Yeremiya wi,

² “Iwa mawu a echipangano nave ollote ni athu a o Yuda ni a o Yerusalemu wi,

³ ‘Mi Apwiya Mulluku a Israele kinnamutembelela arive muthu oohiisunga mawu a echipangano

⁴ eyo kakeraatthihalleemi ni makhollwaanyu kaakhumihalle o ellapo ya Iguputo.’ Kaakhumihalle mu eng'anjo yooviha kaallota wi, ‘Mwaakiiwellellaka ni weera nnddo kinuulleelleemini, nyu muneerokhalla athwaaka nave mi kineerokhalla Mullukwaanyu.

⁵ Sika vano kineereweera nnddo kaalonjezilleemi moollupella makhollwaanyu wi kineerewaavaha ellapo yamukaka ni enwi, ellapo munakhalleenyumweella.’ ” Sika kahaakhulla wi, “Amen, Apwiya.”

⁶ Vano Apwiya yaakilleella wi, “Ollalleye mawu mattheene o mizinda dda o Yuda ni mu misewu dda mu Yerusalemu nave waalleelle wi, ‘Ngiiwani mawu a echipangano nave mwaasunge.

⁷ Erive enthawi kaanaachenjeza makhollwaanyu ovenyera valle kaakhumihalleemi o Iguputo ophiyera ollello. Kaanaalleella wi yiiwellelleke mawaaka.’ ”

⁸ Koma alliwa kheyiiwellelle naari waapella maaru. Arive muthu aari awumma ni oonanara murima ni oothwara murimaaye woonanara. Kahaalamulella wi esunge echipanganwaaka koma alliwa kheyaasungalle. Sika kahaallaka moollikana ni mmo kallotelleemi.

⁹ Vano Apwiya yaakilleella wi, “Athu a o Yuda ni athu a mu Yerusalemu aakipanganella.

¹⁰ Aahokollweellattho o machimo a makhollwiiwa alle yakhootille okiiwellella vawi enathwara ni ollapella milluku ddimodda. A o Israele ni a o Yuda aatathilla echipangano eyo kakeraatthihalleemi ni makhollwiiwa.

¹¹ Sika vano mi Apwiya kinallota wi kineerewaamorihella ddoohoosa ddoohithaweya. Naari ekinllelleve mwawiidde ngaapella maaru.

¹² Athu a mu mizinda dda o Yuda ni mu Yerusalemu eneerewinllella nikavihero wa milluku nnddo yavelleelliiwawo mikutho koma kheddiwora waavullusa va enthawi ya ddoohoosa ddiwa.

¹³ Ddawoona, we Yuda, milluku ddawo tti ddinchichi wonanko mizinda ddawo. Makuwa oovelleellellavo mukutho wa Baala oowulliha muru tti manchichi wonanko misewu dda mu Yerusalemu.

¹⁴ We Yeremiya, ohaavekellelle athu yaalla, ohaapepeselle wa miyaano apaalle waakhupanyella mookiwatihera kaambiiwa miyaano ngiwiiwellella yaakiithanaka va enthawi ya ddoohoosa ddiwa.”

¹⁵ Apwiya enallota wi, “Ethiyo nyu ookondiwaaka munaashamo tini mu enyumbaaka vawi moheera ddoonanara ddinchichi? Ethiyo ollupella wanyu ni enama ddoovelleelliwa o mikutho ddanyu ttuuwuutetezani o otullaanyu? Ethiyo ddoonanara ddanyunnddo ttuuwuuhakallallihani?

¹⁶ Khalle Apwiya yuuphwanaphwanihellani ni muteekho wa olivi wookhalla ni makukhu oobiliwila ni ezipaso ddooreera. Koma vano eneerowoosa ni munllo woonyakulla wonanko ettari nave enthambi ddene ddineeroshellella.

¹⁷ “Apwiya Amasiva Mattheene ayo yawaallilleni sika yeeruzalle wi eneerewuullakani mwawoopiha ekaamba ya ddoonanara mweerilleenyu nyu a mu nibanja na Israele ni na Yuda. Mohaashiha murima voovelleellani mikutho wa Baala.”

Athu enampanganella Yeremiya

¹⁸ Apwiya yaakuupullullella nave kaadduwella vawi yaakoonihella mitteko ddittheddene ddoonanara dda athwaayo.

¹⁹ Kaari wonanko mwaanaankhosa oomaalleya oyo anakuselliwa wawiiphiwa. Ngaadduwenlle wi yakipanganella miyaano yallotiiwa wi, “Hankoni niwuuhe muteekhoolla ori ni okumi ddiidda. Hankoni nimwiiphe muthu yoolla wi ahuupuwelleyettho.”

²⁰ Sika kaavekella wi, “Nyu Apwiya Amasiva Mattheene ayo muneeruza moolungama, ayo muneesa murima ni maganizo, onesesani wi mohaahokollosella ddoonanara vawi kahiivelleella m'mattani mwanyu!”

²¹ Sika ekaambiiwa Apwiya enallotiiwa dda athu a o Anatoti ayo enapaalla woononga okumaaka voollotani wi, “Ohillotellettho mu nnddina na Apwiya wi nihiwiiphe.”

²² Sika Apwiya Amasiva Mattheene enallota wi, “Kineerewaallaka! Asombwiiwa eneerewiiphiwa okhotoni nave aniiwa aallopwana ni aatthiyana eneerokhwa ni ettalla.

²³ Khavulluwa naari mmodda vawi kineerowoononga athu a o Anatoti waphiya muyakhiiwa wa ollakiwa.”