Yeremiya 10 - Mawu a Mulluku

Ollapella mafano ni ollapella wawoona

¹ Nyu Aisraele, ngiiwani mawu ayo Apwiya enallotiiwa ni nyuwaano.

² Apwiya enallota wi, Muhithwareke makhallello a athu a mitundu ddimodda, muhaapheelleke muru ni ezizindikiro ddoottikhiniha ddooddullu naari athu a mitundu ddimodda eddoovaka.

³ Miyambo ya athu a mitundu ddimodda tti ddoohikhalla ni mutteko. Alliwa ennuuha muteekho wuutthakoni, muthu eeruso annawupotokosa ni kasemasema.

⁴ Athu amodda ennareeriha ni siliva ni golide, vano ennakhoma ni misomali wi ehisuseke.

⁵ Mafanwaalla tti wonanko yoowoopopihella anakhuku m'matani, khenawora naari ollota. Enaroromella otukhulliwa vawi kheneeta weekhiiwa. Muhiwooveke mafanwaayo vawi khewora oweerellani ddoonanara, khennattho naari masiva ooweerellani ddaphaama.

⁶ Khaavo oollikana ni nyu Apwiya, nyuwaano tti amasiva, nnddina nanyu nookhalla ni masiva muullupalli.

⁷ Ttaani oyo ahinaawooveni, nyu mwene a mitundu dda athu? Vawi munnaphwanella wooviwa. Variyari va eezeru attheene ni va mamwene mattheene a va ellapo yavatthi, khaavo mmoddattho oollikana ni nyuwaano.

⁸ Attheenaayo tti ookarangeya, khenna ezeru, ezeru ddiwa enahuddera o mafano, oohikhalla ni mutteko oopangiwa ni miteekho.

⁹ Mafanwiiwa enahuruwelliwa ni siliva oohanahana oovenyera o Tarishishi ni golidiine oovenyera o Ufazi, muttheenoolla tti mutteko wa athu eeruso. Ennaahuruwella mafanwaayo ekuwo ddabululu ni ddooreera ddoofiira, ddittheddenenndda ddoopotokosiwa ni athu eeruso.

¹⁰ Koma nyu Apwiya, tti Mulluku awoona, tti Mulluku Ookumi navettho Mwene a enthawi yoohimalla. Ellapo yavatthi ennatikheya ni owallaanyu, athu a mitundu ddimodda khewora ovillella ni osha murima wanyu.

¹¹ Athwaayo mwaalleelle wi milluku nnddo ddahiphatusalle ellapo yooddullu ni yavatthi ddineerotthollowa va ellapo yavatthi ni vatthi va eddullu.

Nchipo nawaatitimiha Apwiya

¹² Apwiya sika yaphatusalle ellapo yavatthi ni masiviiwa, yapangille ddittheddene ni ezeru ddiwa, yahaanddellella eddullu ni eruswiiwa.

¹³ Alliwa yallota onniiweya onyakulla wa maaddi ooddullu, ennawiiha mirapo ovenyera okomenlle ellapo yavatthi. Ennasherimiha ettari dda murimu, ennoopiha ephevo ovenyera nko enayisungiiwa.

¹⁴ Athu attheene tti ookarangeya, khenna ezeru, arive muthu eeruso annawulliwa muru ni mafanwaaye. Mafano ayo aapangilleeye tti awoottha, mwa alliwa khamuri okumi naari vang'ono.

¹⁵ Mafano khenna mutteko, tti oophwanella waavevulla, voollakiwani eneerewoonongiwa.

¹⁶ Koma Mulluku a Yakobo khari wonanko mafanwaalla, olliye sika oophatusa a ddittheddene. Israele tti mutundu wa yoohallanaaye, nnddina niwa tti Apwiya Amasiva Mattheene.

Owa wa okaporo

¹⁷ Nyu athu a o Yerusalemu, mohaapheelliwa ni athu akhoto! Mutthukumaniheni katundwaanyu.

¹⁸ Apwiya enallota wi, “Vano kineerewaavenyihamo athu attheene mwiillaponimmu. Kineerewuunyenyani ophiyera naari mmodda a nyuwaano khakhallavo oovulluwa.”

¹⁹ Arive muthu a o Yerusalemu aakhuwa wi, “Otulli, nikhwata naka tti nawoopiha! Nikhwata naka tti noomoriha ethakaraka, keesa wi nngu sika ollakiwa waka, sika kineerovillella.

²⁰ Musasaaka wohoonongeya, mikwe ddittheddene ddoophaddeya. Anaaka attheene aakihiya, kheyiivo, khaavo mmodda wi ttuukitthipellella musasa apaalle wi ttuukihuruwella ni ekuwo ddiwa.”

²¹ Kahaakhulla wi “Vawi abusaahu tti ookarangeya, khenaveka ezeru wa Apwiya. Ekaamba ya yeella ddeko kheddinaweetella phaama, enkhosa ddiwa ddaapallalleya.

²² Ngiiwani, othenga woophiya, ompoto onnavenyera mulloko woonyakulla wi woononge mizinda dda Yuda, wi dditthattuwe ntepe, mookhalla akhatweve.”

²³ Nyu Apwiya, kinnadduwella wi okumi wa muthu khe waaye, khanawora wiihoollella yeekha.

²⁴ Nyu Apwiya, kilangizeni mweechilungamo, muhikishelle murima wi mukoononge.

²⁵ Owallaanyu okharelle mitundu nnddo ddihinuudduwellani, athu ayo ehinatitimiha nnddina nanyu. Alliwa yaawiipha athwaanyu, yahaatthollosa oohimuhiya naari mmodda, ellapwiiwa yaayitthattusa ntepe.