Yeremiya 1 - Mawu a Mulluku

¹ Alla sika mawu a Yeremiya mwaana a Hilikiya, mmodda mwa allupa mukutho o Anatoti, mu ellapo ya Benjamini.

² Mawu a Apwiya yaawa wa olliye va enthawi ya mwene a o Yuda, Yosiya mwaana a Amoni, muyakha waneekhumi ni raru wa omwenaaye.

³ Mawu a Apwiya yaawattho wa olliye va enthawi ya Yehoyakimu, mwaana a Yosiya, mwene a o Yuda ophiyera mweeri waneetthanu wa muyakha waneekhumi ni mmodda wa Zedekiya mwaana a Yosiya mwene a o Yuda mvo athu a o Yerusalemu yaphariwiiwa okaporo.

Wiithaniwa wa Yeremiya

⁴ Apwiya yaallota ni mi wi,

⁵ “Kihinuuphatuse m'mirimani mwa amaayo kahuudduwella khalleve. Nave ohinayariwe, kahuupatula khalleve, kahuutthoolla wi okhalle namallotella wa athu a mitundu ddittheddene.”

⁶ Mi kahaakhulla wi, “Ha, Apwiya Mulluku! Nginadduwella ollota vawi kiri mwaana.”

⁷ Koma Apwiya yaakaakhulla wi, “Ohillote wi, ‘Mi kiri mwaana.’ Vawi ddawoona, oneeroya wa athu attheene nko kinuurumeemiwo nave oneerollota erive ello kinuulamuleemi.

⁸ Ohiwoove athwaayo vawi kiri ni weyaano wi kuuvulluse. Mi Apwiya koollota.”

⁹ Vano Apwiya yaattaphurusa nnatta niwa ettannya vayanoni vaka ekilleella wi, “Ngoona, koohiya mawaaka muwano mwawo.

¹⁰ Ovenyera ollello kohuuvaha olamulello va mitundu ddittheddene dda athu ni moomweniiwa a va ellapo yavatthi wi otulle ni okuha, woononge ni okumulla, omake ni waalla.”

Masomphenya meelli

¹¹ Apwiya yaakikoha wi, “We Yeremiya, ethiyo onoona tini?” Kahaakhulla wi, “Kinoona muteekho wa alimondi.”

¹² “Wohoona phaama. Kinnoonesesa wi nnddo kallotilleemi ddeereye.”

¹³ Apwiya yaakikohattho wi, “Ethiyo onoonattho tini?” Kahaakhulla wi, “Kinoona epalli yootokotha nave ethullamelle ompoto.”

¹⁴ Apwiya yaakilleella wi, “Nndda ddinattaphullella ompoto oneerovenyera otulli oyo onaamorelle athu a mu ellapo ella.

¹⁵ Ngoona, kineerowiithana athu a mitundu ddittheddene a moomwene ompoto. Mamweniiwa eneeroowa nave arive mwene aneerokeraatthiha mpandwaaye woomwene va millako dda Yerusalemu navettho vawaapheella mpanda. Alliwa eneerewaapheellattho mizinda ddittheddene dda Yuda.

¹⁶ Nave kineerowiipa mullatu athwaaka ekaamba ya machimwiiwa vookihiyani mi. Yaavelleella mikutho wa milluku ddimodda nave yaanallapella ddeko ddoopangiwa ni mattiiwa.

¹⁷ Koma we Yeremiya, okhozeke nave oye waalleelle erive ello kuulamulelleemi. Ohiwoove alliwa wi kihuutthattuse awoova vamiitthoni viwa.

¹⁸ Ngoona, ollello kohuutthattusa muzinda wa mpanda, opoto a mukoko ni esiri ddamukuwa wi ohimooveke arive muthu mu ellapo ettheene naari mamwene a o Yuda, enduna, allupa mukutho ni athu amwiillaponi.

¹⁹ Eneerollipana ni weyaano koma oneeropambana vawi kiri ni weyaano nave kineerewuuvullusa.” Mi Apwiya koollota.