Yawuupullulla 7 - Mawu a Mulluku

Dda athu 144,000 a Mulluku

¹ Ddimallille ddenndda kahoonattho masomphenya a angelo asese yiimenlle va makona masese a ellapo yavatthi. Yaari ephanre ephevo ddisese wi ddihoope va ellapo yavattheella apaalle va enyanja naari va orive muteekho.

² Nave kaamoona mungelo mmodda avenyeraka wookhuma nndduwa akusalle echidindo ya Mulluku Ookumi. Aakhuwa moowelliha mawaaye wa angelo asesaalle ayo yavahiwe masiva ni Mulluku wi yoononge ellapo yavatthi ni enyanja.

³ Mungelooyo aallota wi, “Muhoononge ellapo yavatthi apaalle enyanja naari miteekho ophiyera naadindalle oorumeyella a Mullukwaahu va eyuuchi ddiwa.”

⁴ Nave kaalleelliwa wi athu yadindiwe ni echidindo ya Mulluku va eyuuchi ddiwa yakwakhwanne 144,000 oovenyera o malloko khumi ni miilli dda Israele,

⁵ athu 12,000 sika yamariwe ovenyera o nirive nlloko. Nlloko na Yuda 12,000. Nlloko na Rubeni 12,000. Nlloko na Gadi 12,000.

⁶ Nlloko na Asheri 12,000. Nlloko na Nafutali 12,000. Nlloko na Manase 12,000.

⁷ Nlloko na Simiyoni 12,000. Nlloko na Levi 12,000. Nlloko na Isakara 12,000.

⁸ Nlloko na Zebuloni 12,000. Nlloko na Yosefe 12,000. Nlloko na Benjamini 12,000.

Dda mulloko muullupalli

⁹ Ddimallille ddenndda kahoona masomphenya a mulloko muullupalli wa athu ooheerengeya! Yavenyenre mu orive mutundu, nirive nlloko, erive ellapo ni erive ellotello nave yahiimella vamiitthoni va mpando woomwene ni mwaanaankhosa, ewanre ddoowara ddaweella nave ephareelle enthambi dda kanjeza m'mattani mwiwa.

¹⁰ Yaakhuwa ni mawu oowella wi, “Ovullusa sika wa Mullukwaahu oyo anakeraatthi vampandoni woomwene navettho wa mwaanaankhosa!”

¹¹ Angelo attheene yahiimella moowaapheella mpando wa omwene, attekweene ni ddoophatusiwa ddookumi ddisese. Nave yaapopheya ekhove ddiwa vatthi vamiitthoni va mpando woomwene emullapella Mulluku.

¹² Yaanallota wi, “Amen! Odalisa, otitimiha, ezeru, othokoza, oriiheya, masiva, ollipiha tti dda Mullukwaahu wa enthawi yoohimalla! Amen!”

¹³ Vano muttekweene mmodda aakikoha wi, “Athu ewanre ddoowara ddaweellaalla ttaani? Navettho enavenyera wuuwi?”

¹⁴ Kaamwaakhulla wi, “Apwiya, munadduwella tti nyuwaano.” Aakilleella wi, “Yaalla sika athu ayo yavillenlle mu ddoohoosa ddawoopiha. Yaahuwa nave yeelliha ddoowara ddiwa ni nikhame na mwaanaankhosa.

¹⁵ Ella sika ekaambiiwa yiimenlliiwa vamiitthoni va mpando woomwene wa Mulluku nave enamurumeyella otthaana ni mahiiyu mu enyumbaaye. Oyo anakeraatthi vampandoni wa omwene aneerewaakhuneella ni muuthuuchaaye ni waawehera.

¹⁶ Khewa evolliwa ettalla apaalle nthona naari nndduwa ni oviha wiwa khaddiwattho ddiwoosa.

¹⁷ Vawi mwaanaankhosa oyo ari vahoollo vampandoni woomwene sika anaakhalle mbusiiwa nave aneerewaahoollella ori aneetuutu amaaddi ookumi. Nave Mulluku aneerewaavutta miitthori ddittheddene m'miitthoni mwiwa.”