Yawuupullulla 6 - Mawu a Mulluku

Ddoomarella

¹ Nave kaamoona mwaanaankhosa amarullaka emodda ya ddoomarella dditthanu ni piillinndde navettho kahiiwa emodda ya ddoophatusiwa ddookumi ddisese ellotaka ni mawu oowella wonanko ogugudeya wa murimu wi, “Ngawa!”

² Kaaweha nave kaamoona kavalo aweella. Oomuwellooyo apharenlle muura nave aavahiwa korona.* Vano aakhumellella wonanko oopambana wi aagonjihe adanaaye.

³ Nave Mwaanaankhosoolle amarullalleeye yoomarella yaneepiilli kahiiwa yoophatusiwa yookumi yaneepiilli ellotaka wi, “Ngawa!”

⁴ Kavalo aneepiilli aakhumellella nave aari oofiira. Oomuwellooyo aavahiwa olamulello woovenyihavo murendelle muttheene va ellapo yavatthi wi athu yiiphaneke. Aavahiwattho nsupada nuullupalli.

⁵ Nave mwaanaankhosa amarullalleeye yoomarella yaneeraru kahiiwa yoophatusiwa yookumi yaneeraru ellotaka wi, “Ngawa!” Kaaweha nave kaamoona kavalo ooripa. Oomuwella oyo apharenlle esikelo m'mattani mwaye.

⁶ Kahiiwa mawu awiiweya wonanko enavenyera variyari va ddoophatusiwa ddookumi ddisese ellotaka wi, “Ntuka na tirigu nimodda ninaakulliweke ni makobiri manchichi navettho matuka mararu a tirigu enaakulliweke ni makobiri manchichi. Koma muhoononge miteekho dda olivi ni mpesa!”

⁷ Nave mwaanaankhosa amarullalleeye yoomarella yaneesese kahiiwa yoophatusiwa yookumi yaneesese ellotaka wi, “Ngawa!”

⁸ Kaaweha nave kaamoona kavalo awooneya wonanko ntuura. Oomuwellooyo nnddina naye naari Okhwa nave athwariwa ni ellapo ya ookhwa. Yaavahiwa olamulello va emodda ya ezigawo ddisese dda ellapo yavatthi wi ewiiphe athu ni ekhoto, ettalla, ereta ni enama ddoosavuwa.

⁹ Nave mwaanaankhosa aamarulla yoomarella yaneetthanu. Vano kahoona vatthi va nikuwa minepa dda athu ayo yiiphiwe ekaamba yoollalleya mawu a Mulluku ni wi yaari oororomelleya voovelleellani omboni wa echikhulupililwiiwa.

¹⁰ Yaakhuwa moowelliha mawu wi, “Apwiya, muri aweella ni awoona! Munatiyerella ophiyera niini ohiwiipa mullatu ni waallaka athu a va ellapo yavatthi yaniiphallaayo?”

¹¹ Arive muthu aavahiwa ddoowara ddaweella nave yaalleelliwa wi, “Tiyerani vang'ono ophiyera echiwerengero ya oorumeyella akhwiinyu vamodda ni asinninyu ni arokorinyu ekwakhwanne, ayottho enaphwanella wi yiiphiwe wonanko nyeene.”

¹² Nave kaamoona mwaanaankhosa amarullaka yoomarella yaneetthanu ni emodda. Vaakhalla echivomerezi yuullupalli nave nndduwa naathiima wonanko ekuwo yooripa ya naamukhwelle nave mweeri muttheene waatthattuwa okhalla woofiira wonanko nikhame.

¹³ Etheneeri ddaamorella va ellapo yavatthi wonanko namukuyu oovakaresiwa ekaamba yootikhiwa ni ephevo yuullupalli.

¹⁴ Oddullu waavenyihiwavo wonanko mwinlli woovillikiwa nave orive mwaango ni echilumba ddaavenyihiwa m'mapuroni mwiwa.

¹⁵ Nave mamwene a va ellapo yavatthi, oolamulella ni attekweene a akhoto, eeyuuma, amasiva, akaporo ni athu ehiri akaporo, yahiipittha m'makhunguni ni vatthi va malluku a m'mwaangoni.

¹⁶ Yaakhuwa wa miyaango ni malluku wi, “Munimorelle hiyaano nave munivitthe vamiitthoni va oyo anakeraatthi va mpando woomwene ni o osha murima wa mwaanaankhosa.

¹⁷ Nllapo nawoopiha ni noosha murimiiwa noophiya. Ethiyo ttaani anaawiimelle?”