Yawuupullulla 5 - Mawu a Mulluku

Dda nibukhu ni mwaanaankhosa

¹ Nave kahoona mu nnattanatta na oyo anakeraatthi vampandoni woomwene nibukhu noomariwa ni ddoomarella dditthanu ni piilli nilembiwe muwari ni otte wene.

² Navettho kaamoona mungelo amasiva, allalleyaka ni mawu oowella wi, “Ttaani anaphwanella omarulla ddoomarellannddo nave akhunuulle nibukhu?”

³ Nave khaarivo naari mmodda ooddullu, a va ellapo yavatthimva apaalle a vatthi va ellapo yavatthi aworille okhunuulla nibukhunno ni woona muwarimmo.

⁴ Miyaano kahinlla wunchichi kaambiiwa khaarivo aphwanyeye oophwanella okhunuulla nibukhunno apaalle woona muwari mwiwammo.

⁵ Vano mmodda a attekweene aallota ni miyaano wi, “Ohinlle. Ngoona, edduullu ya Davide, mukango woovenyera o mulloko wa Yuda, oopambana nave aneerowora omarulla ddoomarella dditthanu ni piilli navettho okhunuulla nibukhunno.”

⁶ Nave kaamoona mwaanaankhosa iimenlle vahoollo va mpando woomwene, aapheelliwe ni ddoophatusiwa ddookumi ddisese ni attekweene. Nave Mwaanaankhosooyo ooneya wonanko aneerewiiphiwa. Aakhalla ni manyaka matthanu ni meelli owaaka miittho matthanu ni meelli nave miitthwaayo sika minepa mitthanu ni miilli dda Mulluku ddoorumihiwa va ellapo yavatthi ettheene.

⁷ Nave mwaanaankhosa aaya aakhella nibukhu ovenyera mu nnattanatta na oyo anakeraatthi vampandoni woomwene.

⁸ Eerilleeye ddiiddo, ddoophatusiwa ddookumi ddisesenndde ni attekweene 24 yaakokhora vamiitthoni va mwaanaankhosooyo. Attheene yaakhalla ni magitala owaakattho embale dda golide ddooddalla ni mukutho wa lubani.* Ddawunkhellihanndda sika mavekello a athu a Mulluku.

⁹ Yaaniipa nchipo nanaanweene nawi, “Munaphwanella waakhella nibukhunno ni omarulla ddoomarella ddiwa. Vawi mwahiiphiwa nave ni nikhame nanyu mwaamoopollella Mulluku athu oovenyera mu nirive nlloko, erive ellotello, erive ellapo, orive mutundu.

¹⁰ Mwaaweeriha wi ekhalle omwene wa allupa mukutho oorumeyella Mullukwaahu, nave eneerolamulella ellapo yavatthi.”

¹¹ Kahoonattho nave kahiiwa mawu a angelo anchichi yiimenlle moowaapheella mpando woomwene, ddoophatusiwa ddookumi ddisese ni attekweenaalle. Nave vaakhalla angelo anchichi ooheerengeya.

¹² Nave yaaniipa ni mawu oowella wi, “Mwaanaankhosa iiphiwooyo sika anaphwanella waakhella masiva, eyuuma, ezeru ni ollipa, oriiheya, ntitimiho ni othokoza!”

¹³ Nave kahiiwa erive yoophatusiwa ya oddullu, ellapo yavatthi, vatthi va ellapo ni ya m'maaddini yiipaka. Sika ddookumi ddittheddene ddaaniipa wi, “Wa olliye anakeraatthi vampandoni woomwene ni wa mwaanaankhosa, okhalle ntitimiho ni oriiheya, owaaka masiva wa enthawi ddoohimalla!”

¹⁴ Ddoophatusiwa ddookumi ddisesenndde ddahaakhulla wi, “Amen!” Nave attekweene yaakokhora nave ellapella.