Yawuupullulla 4 - Mawu a Mulluku

Ollapella wa oddullu

¹ Ddimallille ddenndda kahoona masomphenya a nchiwi noohulliwa oddullu. Nave kahiiwa mawu wonanko nipallapata ekaakhullaka wonanko yaalle kiiwalleemi vawaamba valle ellotaka wi, “Ngawa oddullu wuno nave kineerowooniha ddinaaweereye muhoollo.”

² Enthawi yeeyo kaahoollelliwa ni Munepa Waweella nave kahoona oddullunko ori mpando wa omwene nave muthu mmodda akeraatthille vampandoni woomwenooyo.

³ Ekhovaaye yaari yoowala wonanko malluku ooreera a yasipi ni sardiyo nave mpando woomwenooyo wahaapheelliwa ni mwiisherima wawooneya wonanko nlluku nooreera na emeradi.

⁴ Waapheella mpando wa omwenooyo waakhallattho mipando ddoomwene 24, m'mipandonimmo mwaakeraatthi attekweene 24 ewanre ddaweella ni omuruni wiwa akorona* a golide.

⁵ Nave o mpando woomwenooyo waanavenyera ettari, onyakulla ni ogugudeya wa murimu. Vahoollo va mpando wa omwenooyo vaakhalla mitthiko ddookhara mitthanu ni miilli nnddo ddiri minepa mitthanu ni miilli dda Mulluku.

⁶ Navettho vahoollo va mpando woomwenooyo vaari vawooneya wonanko enyanja ya nigalasi noowala. Mpando wa omwenooyo wahaapheelliwa ni ddoophatusiwa ddookumi ddisese ddookhalla ni miittho muhoollo ni mutulli mwene.

⁷ Yoophatusiwa yookumi yawaamba yaari yawooneya wonanko mukango, yaneepiilli yawooneya wonanko musaanaang'ombe yaamullopwana, yaneeraru yaakhalla ni ekhove wonanko muthu nave yaneesese yaari yawooneya wonanko epallame ya mpungu enavava.

⁸ Erive yoophatusiwa yookumi yaakhalla ni muuphello matthanu ni nimodda nave yaakhalla ni miittho muwari ni otte wene. Ddakhallella wiipa otthaana ni mahiywiine woohihiya wi, “Aweella, aweella, aweella, tti Apwiya Mulluku Amasiva Mattheene, oyo aarivo khalle, arivo ollello ni oyo anaawe muhoollo.”

⁹ Ddoophatusiwa ddookumi ddisese ddinniipa machipo ootitimiha, ooriiha ni oomuthokoza oyo akeraatthille vampandoni woomwene, oyo arina okumi woohimalla. Vawiipani,

¹⁰ attekweene 24 yaanakokhora vamiitthoni va ookeraatthi vampandoni wa omwenooyo nave enamullapella oyo anakhalla ni okumi woohimalla. Yaanaarulla akorona omuruni wiwa enaahiya vatthi vahoollo va mpando woomwenooyo enallota wi,

¹¹ “Apwiihu ni Mullukwaahu! Nyuwaano munnaphwanella waakhella ntitimiho, oriiheya ni masiva. Vawi tti nyuwaano mwaphatusalle ddeko ddittheddene, nave mwaapaalla wi ddittheddenennddo ddikhalle ni okumi.”