Yawuupullulla 3 - Mawu a Mulluku

Kalata oolembella mpingo wa o Sarde

¹ “Omulembelle oohoollella a mpingo wa o Sarde wi, “Alla sika mawu oovenyera wa oyo anasunga minepa mitthanu ni miilli ddinamurumeyella Mulluku ni oyo akusalle etheneeri dditthanu ni piilli m'mattani mwaye awi, kinnadduwella makhallellwaanyu, epilli ddanyu tti ddawi mookhalla ni okumi naari mukhwille!

² Sika venyani nave muphare mooyillipiha eyo muriinyuna ehinaphiye vookokhowani. Vawi kohoona wi makhallellwaanyu khenakwakhwanella vamiitthoni va Mullukwaaka.

³ Vano upuwellani nnddo mwahuddenreenyu ni nnddo mwiiwalleenyu, mweereke ddennddo nave murukunuwe murima. Mwaahivenya, kineeroowa wa nyuwaano wonanko mullupaawiiya nave khamudduwellattho enthawi kineereemi kiweelle.

⁴ Koma athu ooyeva a nyuwaano o Sardenko khamwaaripihalle ddoowara ddanyu ni machimo. Muneereweeta ni miyaano, muwanre ddaweella kaambiiwa munnaphwanella weera ddennddo.

⁵ Oopambanaayo eneerowarihiwa ddaweella ddiidda nave ngivenyiha manddiniiwa mu nibukhu na akumi. Vamiitthoni va Attiitthaaka ni angelwaaye kineerewaakhullella wi tti athwaaka.

⁶ “Ngiiwani vano mwaarina maaru awiiwana ddinallota Munepa Waweella wa mipingo!”

Kalata oolembella mpingo wa o Filadelfiya

⁷ “Omulembelle oohoollella a mpingo wa o Filadelfiya wi, “Alla sika mawu oovenyera wa oyo ari aweella ni awoona, oyo arina makiiyi a olamulello a Davide nave ahulla nchiwi khaavo muthu anaawore owalla navettho awalla khaavo muthu anaawore ohulla awi,

⁸ kinnadduwella makhallellwaanyu, kinnadduwellattho wi mookhalla ni masiva ooyeva koma moothwara ehuddihwaaka nave khamukikhootille miyaano. Sika koohulla nchiwi vahoollo vanyu, khaavo muthu anaawore owalla.

⁹ Athu ayo eri a mulloko wa Satana, athu awoottha ayo enallota wi tti Ayuda ehiri yaayo, kineerowaana wi yuukokhorelleni. Attheenaayo eneerodduwella wi kinnuukondani.

¹⁰ Kaambiiwa mohiiwellella olamulella waka wi muvillelle, nameenettho kineerowaakihani va enthawi yaweesiwa eyo enaaweelle athu attheene a va ellapo yavatthi.

¹¹ Koma ophiyera kiwiille, nyuwaano munaphwanella muphare moollipiha eyo muriinyuna wi ahikhallevo mmodda anawaakheni emphaswaanyu.

¹² Athu enaapambanaayo kineeroweeriha wi ekhalle apoto a mu enyumba ya Mullukwaaka nave khevenyamo. Kineerolemba va alliwaayo nnddina na Mullukwaaka ni nnddina na muzinda wa Mullukwaaka, Yerusalemu anaanweene, oyo anawa akitthe vatthi ovenyera oddullu wa Mullukwaaka. Kineerolembattho va alliwaayo nnddina naka nanaanweene.

¹³ “Ngiiwani vano mwaarina maaru awiiwana ddinallota Munepa Waweella wa mipingo!”

Kalata oolembella mpingo wa o Laodikeya

¹⁴ “Omulembelle oohoollella a mpingo wa o Laodikeya wi, “Alla sika mawu oovenyera wa muthu oyo aneeriwa Amen, oororomelleya ni mboni awoona oyo arittho awaamba a ddeko ddittheddene ddaphatusiwe ni Mulluku.

¹⁵ Kinnadduwella makhallellwaawo wi khemuri ooriirya naari ooviha. Waaweerokhalla phaama mwaariki ooriirya apaalle ooviha!

¹⁶ Nave kaambiiwa muri variyari va oriirya ni oviha kineerowuumullani muwano mwaka.

¹⁷ Vawi munallota wi, ‘Nookhalla ni eyuuma, khannapaalla ello,’ koma khamunadduwella wi munnamoriha ethakaraka, athu oohoowa, oohiwara ni oohoonattho.

¹⁸ Vano kinaaka kuulleelleni wi, mumukulle golide ooreerihiwa wa miyaano wi mukhallena eyuuma. Mukullettho ddoowara ddaweella wi muware ni okhuneella epwillimwinddaanyu. Mukulle murete woohella m'miitthoni mwanyu wi mooneke.

¹⁹ Kinnaahumullulla ni waallaka attheene kinaakondeemi. Vano llipihellani wi murukunuwe murima.

²⁰ Ngoonani, kiimenlle vamullakoni nave kinnookotha. Muthu iiwa mawaaka nave ahulla nchiwi, kineerovollowa kichena vamodda.

²¹ Wa ayo enaapambane, kineerowaakhullella wi elamulelle vamodda ni miyaano mu omwenaaka. Emoddamoddave yeeyo kaapambana nave vano kinnalamulella ni Attiitthaaka mu omweniiwa.

²² “Ngiiwani vano mwaarina maaru awiiwana ddinallota Munepa Waweella wa mipingo!”