Yawuupullulla 22 - Mawu a Mulluku

¹ Mungelooyo aakoonihattho muhinje wa maaddi ookumi. Nave maaddaayo yaari oonyezimella wonanko nigalasi noowala, yavenyera o mpando woomwene wa Mulluku ni Mwaanaankhosoolle.

² Muhinjoolla wavira variyari va musewu muullupalli wa muzindoolla nave embali ddittheddene dda muhinje yoolla waakhalla muteekho wa okumi oyo wimma ezipaso ddiwa orive mweeri sika vamuyakhani wimma olendo khumi ni wiilli. Makukhwiiwa yaari murete woochiriha athu a mitundu ddittheddene.

³ M'muzindanimmo khamukhalla ello yootembeleliwa ni Mulluku. Mpando woomwene wa Mulluku owaaka wa mwaanaankhosa oneerokhalla m'muzindanimmo nave oorumeyellaaye eneeromullapella olliye.

⁴ Eneerewoona ekhovaaye nave nnddina naye nineerolembiwa va eyuuchi ddiwa.

⁵ Khowa okhallattho mahiiyu navettho ookhallawaayo khewa epaallattho enyali apaalle nndduwa kaambiiwa Apwiya Mulluku sika enaakhalle owala wiwa, eneerolamulellattho wonanko mamwene wa enthawi yoohimalla.

Dda owa wa Yesu

⁶ Nave mungelo aallota wa miyaano wi, “Mawu alla tti awoona nave oororomelleya. Nave Apwiya Mulluku, ayo enavaha Munepiiwa wa anamallotella, aamurumiha mungelwiiwa wi awoonihe oorumeyellaaye eyo eneereye veneva.”

⁷ Yesu anallota wi, “Ngiiwellani, kinimawa veneva! Oodalisiwa tti ayo eniiwellella mawu oollotelliwa mu nibukhunna!”

⁸ Miyaano, Yohane sika kiiwalle ni woona ddeko ddittheddenenndda. Nave kamallihalleemi wiiwa ni woona ddenndda, kaakokhora vamiitthoni va mungelo oyo akoonihalle ddeko ddenndda wi kimullapelle.

⁹ Koma aakilleella wi, “Oheere ddennddo! Mi tti oorumeyella mukhwaawo navettho a asinno anamallotella ni attheene ayo enathwara ddilembiwe mu nibukhunna. Mullapelle Mulluku!”

¹⁰ Nave aakilleella wi, “Ohaavitthelle athu mawu oollotelliwa mu nibukhunna kaambiiwa enthawi yohaatamella yawi ddittheddenenndda ddineereweereya.

¹¹ Oyo ari oohilungama avirellelle okhalla oohilungama navettho oyo ari ooripihiwa avirellelle wiiripiha ni ddoonanara, oyo ari oolungama avirellelle okhalla oolungama ni oyo ari aweella wi avirellelle okhalla aweella.”

¹² Yesu anallota wi, “Ngiiwellani! Kinimawa veneva! Kineerowaana ddoothuva ddaka wi kivelleelle wa athu attheene moollikana ni mitteko ddiwa.

¹³ Mi tti awaambeella ni oomallihella, waamba ni omalliha.”

¹⁴ Oodalisiwa tti ayo enachapa ddoowara ddiwa mwaweelliha wi yaakhullelliwe ovollowa va millako dda m'muzindani ni ocha ezipaso dda muteekho wa okumi.

¹⁵ Koma otte wa muzindooyo wookhalla anapwa, ayo eri athu aweera ddookhwiri, ddooraruwa ni ddawiipha, ayo enallapella nifano nave ayo eri awoottha mu mawu ni m'mittekoni ddiwa.

¹⁶ “Mi Yesu, koomurumiha mungelwaaka wi allalleye ddeko ddenndda wa mipingo. Miyaano sika edduullu ya Davide, etheneeri yoowala ya thanda.”

¹⁷ Munepa Waweella vamodda ni Ootthelliwa eni, “Waani!” Arive muthu oyo aniiwa, anaphwanellattho ollota wi, “Waani!” Arive muthu arina nthona awe, oyo anapaalla, aakhelle maaddi ookumi moohillivella.

Mawu oomallihella

¹⁸ Miyaano Yohane kinamuchenjeza arive muthu oyo aniiwa mawu oollotelliwa mu nibukhunna. Muthu aanjereravo ello va mawu yaalla, Mulluku aneeromwaanjerera ollakiwa waye ni millilli ddilembiwe mu nibukhunna.

¹⁹ Muthu avenyihavo ello va mawu oollotelliwa mu nibukhunna, Mulluku aneeromuvenyiherawo embali emodda ya ezipaso ddaye dda muteekho wa okumi ni nipuro naye mu Muzinda Waweella, nnddo ddilembiwe mu nibukhunna.

²⁰ Oyo anavelleella omboni wa ddittheddenenndda anallota wi, “Ddawoona miyaano kinimawa veneva!” Amen! Waani Apwiya Yesu.

²¹ Echisomo ya Apwiya Yesu ekhalle ni nyuwaano attheene.