Yawuupullulla 21 - Mawu a Mulluku

Oddullu wanaanweene ni ellapo yavatthi yanaanweene

¹ Kahoona oddullu wanaanweene ni ellapo yavatthi yanaanweene. Oddullu ni ellapo yavatthi ddawaambanndde ddaarimeella nave enyanja kheyaariwottho.

² Nave kahoona muzinda waweella, Yerusalemu anaanweene, akitthaka ovenyera oddullu, wa Mulluku, waari okhozekille wonanko mutthiyana ootthelliwa awarihiwe phaama wi akumane ni mamune.

³ Kahiiwa mawu oowella ellotiwaka ovenyera o mpando woomwene awi, “Vano enyumba ya Mulluku eri variyari va athu! Aneerokhalla ni athwaayo navettho eneerokhalla athwaaye. Mulluku aneerokhallana vamodda nave aneerokhalla Mullukwiiwa.

⁴ Olliye aneerewaavutta miitthori m'miitthoni mwiwa. Khowattho okhalla okhwa winlla wiiwa ovoreya naari ekutho. Ddeko ddakhalle ddoovira.”

⁵ Mulluku oyo akeraatthille vampandoni woomwene aallota wi, “Vano kinatthattusa ddeko ddittheddene ddikhalle ddanaanweene!” Aallotattho wa miyaano wi, “Lemba ddenndda vawi mawu yaalla tti awoona nave tti ororomelleya.”

⁶ Olliyooyo aallota wi, “Woomalla! Mi tti awaambeella ni oomallihella, waamba ni omalliha. Wa muthu ari ni nthona kineeromuvaha moohillivella wi awirye maaddi oovenyera va neetuutu amaaddi ookumi.

⁷ Enaapambanaayo eneerewaakhella yeella ovenyera wa miyaano, kineerokhalla Mullukwiiwa nave eneerokhalla anaaka.

⁸ Koma athu awoova, oohiroromelleya, ookonda ddoonanara, ooraruwa, owiipha, oweera ddookhwiri, oollapella mafano nave attheene awoottha, nipuro niwa sika enyanja ya munllo ni sulufure. Yeella sika okhwa waneepiilli.”

Dda Yerusalemu anaanweene

⁹ Nave mmodda a angelo atthanu ni eelli ayo yaari ni embale dditthanu ni piilli ddooddalla ni millilli mitthanu ni miilli ddoomalliha aawa wa miyaano allota wi, “Ngawa, kineerowooniha ootthelliwa, mwaariye a mwaanaankhosa.”

¹⁰ Vano kaahoollelliwa ni Munepa Waweella nave mungeloolle aakikusella vaddullu va mwaango woorekama. Aakooniha Yerusalemu, muzinda waweella okitthaka ovenyera oddullu, wa Mulluku,

¹¹ nave waanawala ni ntitimiho na Mulluku. Owala wiwa waari wonanko nlluku noowallamella mutengo, yasipi, nawooneya wonanko nigalasi noowala.

¹² Waakhalla ni esiri yoorekama ni yawiitivalla ni millako khumi ni miilli nave vamillakonimvo vaakhallattho angelo khumi ni eelli oowehera. Vamillakonimvo vaalembiwa manddina a malloko khumi ni meelli a Israele.

¹³ Erive embali yaari ni millako mirarumiraru, wookhuma nndduwa miraru, woovollowa nndduwa miraru, omwera miraru ni ompoto miraru.

¹⁴ Esiri ya muzindooyo yamakiwe va matthipello a malluku khumi ni meelli, mvo valembiwe manddina khumi ni meelli a amurummwa a mwaanaankhosa.

¹⁵ Mungelo allotille ni miyaanoolle aakhalla ni mulingo wagolide wi alingelle muzindooyo, millako ddiwa ni esiriiweeyo.

¹⁶ Muzindooyo waari woophwanaphwana embali ddittheddene naari oya muddullu. Mungelooyo aalinga muzindooyo ni mulingooyo nave erive embali yaari yoorekama makilomita 2,400 naari oya muddullu wiwa.

¹⁷ Mungelooyo aalingattho esiri nave yaari yoorekama oya muddullu mamita makhumi matthanu ni nimodda moollikana ni olinga wa athu nko ori woophwanaphwana ni olinga wa angelo.

¹⁸ Esiri yaari yoomakiwa ni malluku a yasipi, muzindooyo waari woomakiwa ni golide awooneella wonanko nigalasi.

¹⁹ Malluku a matthipello a esiri ya muzindooyo yaari oreerihiwa ni malluku oowallamella mutengo. Nlluku natthipelliwe mwawaambanno naari na yasipi, naneepiilli naari na safire, naneeraru naari na agate, naneesese naari na emeradi,

²⁰ naneetthanu naari na sardonu, naneetthanu ni emodda naari na sardiyo, naneetthanu ni piilli naari na krusolito, naneetthanu ni raru naari na berulo, naneetthanu ni sese naari na topaziyo, na khumi naari na krusoprazo, na khumi ni nimodda naari na yakinto nave na khumi ni piilli naari na ametusito.

²¹ Millako khumi ni miillinnddo ddaari dda malluku oowallamella mutengo nave orive mullako waamakiwa ni nlluku naayenaaye noowallamella mutengo. Nave musewu wa m'muzindanimmo waari woomakiwa ni golide, awooneyella wonanko nigalasi.

²² Ngaawoonille enyumba ya Mulluku m'muzindanimmo kaambiiwa Apwiya Mulluku Amasiva Mattheene ni Mwaanaankhosa sika enyumbeeyo.

²³ Khewaapaalleyettho wi m'muzindanimmo mukhalle nndduwa apaalle mweeri wi ddimolleellekemo kaambiiwa ntitimiho na Mulluku sika owala nave mwaanaankhosa sika enyaaliiwa.

²⁴ Athu a va ellapo yavatthi eneereweeta mu owalanko navettho mamwene a va ellapo yavatthi eneerowaana eyuumiiwa mwemmo.

²⁵ Millako dda m'muzindanimmo ddineerokhalla ddoohulla nllapo nittheene, khaddiwa ddiwalliwa vawi khowattho okhalla mahiiyu wenko.

²⁶ Mitundu ddittheddene ddineerowaana ddeko ddaphaama ni eyuumiiwa m'muzindanimmo.

²⁷ Nave khamuwa muvollowa ello yooheellihiwa m'muzindanimmo naari muthu aweera ddoonanara apaalle oollota ddawoottha. Yaayove manddiniiwa elembiwe mu nibukhu na akumi na mwaanaankhosa sika enaavollowe m'muzindanimmo.