Yawuupullulla 20 - Mawu a Mulluku

Dda miyakha 1,000

¹ Vano kaamoona mungelo akitthaka ovenyera oddullu, aphareelle onyolo woollemella ni makiiyi a o nlliti noowallamellesesa.*

² Aaphara enowa yuullupalleelle, enowa yakhalleelle yooromolliwa mdiyerekezi apaalle Satana, amumaka ni onyoloolle wa miyakha 1,000.

³ Mungeloolle aayivokhella enoweeyo mullitini mulle, awallawo nave amara omullakoninko wi ehiwettho ewoottottha athu attheene ophiyera ddimallille miyakha 1,000 nnddo. Ddawa ddimalla enaphwanella wi ettaphulliwe wa enthawi yooyeva.

⁴ Nave vano kahoona mipando ddoomwene nave ayo yakeraatthille va mipandonnddo yaari ayo yavahiwe olamulello waweeruza millatu. Kahoonattho minepa dda athu ayo yiiphiwe ekaamba ya mawu a Mulluku owaakattho ovelleella omboni dda Yesu. Kheyaallapenlle enama yuullupalli yawoopiha apaalle nifano niwa naari odindiwa ni echidindo ya enameeyo va eyuuchi ddiwa apaalle va mattiiwa. Yaavenyihiwa wa ookhwa nave elamulella wonanko mamwene vamodda ni Khrisitu wa miyakha 1,000.

⁵ (Ookhwa amodda attheene kheyaavenyille ophiyera omalla wa miyakha 1,000.) Nngu sika ovenya wowaamba wa ookhwa.

⁶ Oodalisiwa ni aweella tti athu ayo enaavenyihiwena va ovenya wawaambanko wa ookhwa. Okhwa waneepiilli khowinnattho masiva va alliwaalla vawi enaakhalle allupa mukutho a Mulluku ni a Khrisitu nave eneerolamulella vamodda ni olliye wa miyakha 1,000.

Dda ogonjihiwa wa Satana

⁷ Miyakha 1,000 nndda ddamalla, Satana aneerottaphulliwa mundendemmo.

⁸ Nave aneerokhuma wi aalleke athu attheene a va ellapo yavatthi, yaalla sika Gogi ni Magogi. Satana aneerewaatthukumaniha vamodda wi ewane ekhoto, waata wiwa wonanko mihava dda mukhwipi mwa enyanja.

⁹ Eneereweeta va ellapo yavatthi ettheene nave aneerewaapheella misasa dda athu a Mulluku nave ni muzinda oyo Mulluku anawukondeeye. Koma munllo oneerovenyera oddullu nave oneerewoononga attheene.

¹⁰ Vano Satana, aallekilloolle, aavokhelliwa mu enyanja ya munllo ni sulufure, nko enama yuullupalli yawoopiha vamodda ni namallotella awoottha yavokhelliweewawo khalle nave eneerollakiwawo wa enthawi yoohimalla.

Dda echiweruzo yoomallihella

¹¹ Nave kaamoona Mulluku akeraatthille vampandoni muullupalli waweella wa omwene. Ellapo yavatthi ni oddullu ddaathawa vamiitthoni vaye nave ddaarimeellattho.

¹² Nave kaawoona ookhwa, uullupalli ni ang'onong'ono, yiimenlle vamiitthoni va mpando woomwene. Mabukhu yaahulliwa, nibukhu nimodda nahulliwe naari nibukhu na akumi. Athu ookhwaayo yaheeruziwa moollikana ni mitteko ddiwa nnddo ddalembiwe m'mabukhunimmo.

¹³ Nave enyanja yahaavelleella athu yakhwenlle mwemmo. Okhwa ni ellapo ya ookhwa ddahaavelleellattho ookhwiiwa yaari wenko. Attheenaayo yaheeruziwa moollikana ni mitteko ddiwa.

¹⁴ Nave okhwa vamodda ni ellapo ya ookhwa ddaavokhelliwa mu enyanja ya munllo. (Enyanja ya munllweella sika okhwa waneepiilli.)

¹⁵ Attheene ayo manddiniiwa yahilembiwe mu nibukhu na akumi yaavokhelliwa munyanja ya munllo.