Yawuupullulla 2 - Mawu a Mulluku

Kalata oolembella mpingo wa o Efeso

¹ “Omulembelle oohoollella a mpingo wa o Efeso wi, “Alla sika mawu oovenyera wa oyo atukhunlle etheneeri dditthanu ni piilli mu nnattanatta mwaye nave aneeta variyari va ddoohiyavo enyali dditthanu ni piilli dda golide awi,

² kinnadduwella makhallellwaanyu, ophara mitteko moollipiha ni ovillella wanyu woohitikheya ni ddaweereya. Kinnadduwellattho wi khamuniiwanana ni athu aweera ddoonanara. Navettho mohoona makhallello a ayo eniiromolla weekhiiwa wi tti amurummwa ehiri yaayo nave mohaaphwanya wi tti athu awoottha.

³ Munnavillella, moohoowa ekaamba ya miyaano koma khamukihiyalle.

⁴ Koma kookhalla ni ello yawuuvaanyihani, khamunakikonda wonanko vawaamba valle.

⁵ Upuwellani nko mumorelleenyuwo. Rukunuwani murima nave mweereke mweereenyu vawaamba valle. Mwaahirukunuwa murima kineeroowa kivenyihevo yoohiyavo enyaalaanyu vanipuroni viwa.

⁶ Koma ello yaphaama muneereenyu tti yawi, munnaphwanaphwana ni miyaano vawiitanani ni ddaweera dda a Nikolai.

⁷ “Ngiiwani vano mwaarina maaru awiiwana ddinallota Munepa Waweella wa mipingo! Wa ayo enaapambane kineerowaakhullella wi eche ovenyera omuteekhoni wa okumi oyo ori mu paradizo a Mulluku.”

Kalata oolembella mpingo wa o Smurina

⁸ “Omulembelle oohoollella a mpingo wa o Smurina wi, “Alla sika mawu oovenyera wa oyo ari awaambeella ni oomallihella, oyo akhwille koma vano ookhallattho mukumi awi,

⁹ kinnadduwella ohoosiwa ni ohoowa wanyu naari ddawoona ddiwa ddiri ddawi mookhalla ni eyuuma m'munepani. Kinnadduwellattho wi ayo enaddeera Ayuda ehiri yaayo ennuuvaanyihani voollotani epewe, yaayo tti a mulloko wa Satana!

¹⁰ Muhoove dda ddeko ddittheddene munaakumaneneenyu. Ngoonani, Satanooyo aneeroweesani vawuuhiyani mundende amodda a nyuwaano nave ohoosiwanngu onaakhalle wa mallapo khumi. Khallani oororomelleya wa miyaano naari mwiiphiwe nave kineerewuuvahani emphaso yookumi.

¹¹ “Ngiiwani vano mwaarina maaru awiiwana ddinallota Munepa Waweella wa mipingo! Athu ayo enaapambane khevoreyiwa ni okhwa waneepiilli.

Kalata oolembella mpingo wa o Pergamo

¹² “Omulembelle oohoollella a mpingo wa o Pergamo wi, “Alla sika mawu oovenyera wa oyo arina nsupada nawiisha nngu ni nngu awi,

¹³ kinnadduwella muzinda oyo onakhalleewewo wi tti wa omwene wa Satana. Koma khonakikhoota miyaano nave khohiyalle okikhulupilila miyaano naari va enthawi eyo Antipa, mbonaaka oororomelleya iiphiweeye m'muzindani mwanyu mmo Satana anakhalleeye.

¹⁴ Koma kookhalla ni ddeko ddooyeva ddawuuvaanyihana. Variyari vanyu aakhallavo amodda ayo enathwara ehuddiho ya Balamu, oyo amuhuddihalle Balaki wi aahoollelle Aisraele weera ddoonanara vawaakopani wi echeke ddooheraatthiwa vamukuthoni wa mafano ni weera ddooraruwa.

¹⁵ Amodda a nyuwaano munneera emoddamoddave yeeyo voothwarani ehuddiho ya Anikolai.*

¹⁶ Vano rukunuwani murima! Mwaahirukunuwa murima, kineeroowa wa nyuwaano veneva wi kiwane ni athu yaayo ni nsupada nookhuma muwano mwaka.

¹⁷ “Ngiiwani vano mwaarina maaru awiiwana ddinallota Munepa Waweella wa mipingo! “Wa ayo enaapambane kineerewaavaha mana mmodda oovittheya. Kineerowaavahattho nlluku naweella noolembiwa nnddina nanaanweene noohidduwelliwa ni muthu mmodda koma yooyove aakhenllooyo.

Kalata oolembella mpingo wa o Tiyatira

¹⁸ “Omulembelle oohoollella a mpingo wa o Tiyatira wi, “Alla sika mawu oovenyera wa Mwaana a Mulluku, oyo miitthwaaye tti wonanko mallumi amunllo, manyallwaaye oowala wonanko mukoko wooreerihiwa awi,

¹⁹ kinnadduwella makhallellwaanyu, echikondaanyu, echikhulupilwaanyu, orumeyella wanyu ni ovillella wanyu. Kinnadduwella wi munneera phaama vano ohiyana ni vawaamba valle.

²⁰ Koma yawuuvaanyihani kiriimina tti ella yawi munniiwanana ni mutthiyanoolle Yezebele, oyo aniiromolla yeekha wi tti namallotella eetthiyana a Mulluku. Koma ni ehuddihwaayeella annaalleka oorumeyellaaka wi eraruweke ni ocha ddooheraatthiwa mukutho wa mafano.

²¹ Koomuvaha enthawi yawi arukunuwe murima koma khanapaalla ohiya oraruwa waye.

²² Ngoonani, kineeromullaka ni ereta nave ayo yararuwallena eneerohoowa wawoopiha. Kineereweera ddenndda ophiyera erukunuwalle murima ohiya yenriiwa ni olliyooyo.

²³ Kineerowiiphattho oomuthwaraaye wi mipingo ddittheddene ddidduwelle wi miyaano kinnadduwella maganizo ni mirima dda arive muthu. Nave kineeromuthuva arive muthu moollikana ni mitteko ddaye.

²⁴ “Koma wa athu amodda o Tiyatira ayo ehinathwara ehuddiho yoonanareella nave ayo yahihuddenre nnddo amodda enaddiromolliiwa wi ‘ddeko ddoovittheya ddoovenyera wa Satana.’ Kinimuulleellani wi nguullemellihani ni malamulo mamodda.

²⁵ Koma ophiyera kiwiille, nyuwaano munaphwanella muphare moollipiha eyo muriinyuna.

²⁶ Wa ayo enaapambane, yeeraka nnddo kinapaalleemi ophiyera omamallihello, kineerewaavaha olamulello va athu a mitundu ddittheddene.

²⁷ Eneerolamulella ni ekopo ya mukoko ni waapwesa wonanko epalli.

²⁸ Kineerewaavaha olamulello yoolla moollikana ni mmo kaakhellelleemi wa Attiitthaaka. Kineerewaavahattho etheneeri ya thanda.

²⁹ “Ngiiwani vano mwaarina maaru awiiwana ddinallota Munepa Waweella wa mipingo!”